मूरख लखजा रे
Murakh Lakhja Re
1723
मूरख लखजा रे — Lyrics
मूरख लखजा रे
मूरख लखजा रे, कनक मे कामणी जग में फास है। निज मन समझा रे, इण भव में विरचे नहीं थिर वास है।।
नाणो नेह तोड़ो कह्यो रे, जाणो अनरथ मूल, हेत ठिकाणो ना गिणे रे, सगपण जावै भूल। धन्य मुनिवर संसार में रे, धन कुं जाणै धूल रे।।१।।
श्रेणिक राय नो डीकरो रे, कौणिक नामे राय, बाप भणी दियो पींजरे रे, जोवो आगम मांय। इण परिग्रह रे कारणे रे, अनरथ होता जाय रे।।२।।
हार हाथी था बहिल पै रे, कौणिक करी अभिलाष, दोय दिवस में नर मुवा रे, एक कोड़ अस्सी लाख, महाभारत आगै हुवो रे, छै सूत्र नी साख रे।।३।।
यादवकुल में आयने रे, कमला कोधो वास, पुरी द्वारका सुर करी रे, सब सोवन घर वास। इक दिन ऐसो आवियो रे, हुवो यादव केरो नाश रे।।४।।
राय प्रदेशी रे हुंती रे, सूरिकन्ता नार, इष्ट कांत वाल्ही घणी रे, सूत्र में अधिकार। निज स्वारथ बिन पापणी रे, मार्यो निज भरतार रे।।५।।
जुट्ठल श्रावक रे हुंती रे, दइता तीस ने दोय, अग्नि मांही प्रजालियो रे, दया न आणी कोय, माठी गर्त नी पाहुणी रे, गई जमारो खोय रे।।६।।
(लय : हूं डरूं अकेली)
ब्रह्मदत्त चक्री तणी रे, हूंती चूलणी मात, व्यभिचारण चूकी गई रे, दीर्घराय के साथ। घात विचारी पुत्र नी रे, छै ए बहुली बात रे।।७।।
सहंस विद्या त्रिखण्ड धणी रे, रावण मोटो राय, सीता ने हरता थका रे, बैठो लङ्क गमाय। घर फूट्यो बैरी हण्यो रे, धक्का नरक में खाय रे।।८।।
पद्मोत्तर हुरमत' गई रे, गये कोचक नां प्राण, पाण्डव त्रिया द्रौपदी रे, मूल न राखी काण। माठी गत मरने गयो रे, मारै छै जमराण रे।।९।।
जिणऋषि ने जिनपालजी रे, बंधव हूंता दोय, रैणा देवी रे वश पड्या रे, यक्ष सहाई होय, जिणऋष साहमो जोवियो रे, लियो शूली में पोय रे।।१०।।।
रूपवन्त त्रिया देखने रे, जोवै विषय विकार, लपट परनारी तणा रे, गया जमारो हार, जम घालै आख्यां में ताकला रे, दे गुरझार री मार रे।।११।।
मलमूत्र नीं कोथली रे, अशुचि तणो भण्डार, ऊपर से कलली लगी रे, जिण ऊपर शिणगार। हींगा देवी सम त्रिया रे, जोवो हिये विचार रे।।१२।।
जर जोरू के कारणै रे, तूटै जूनो प्यार, जे नर जाणै आपणी रे, ते नर मूढ गिवार, त्याग न कर संग्रह करै रे, तिणने छै धिक्कार रे।।१३।।
कनक कामणी छोड़ने रे, पालै शुद्ध आचार, सुपना में वंछै नहीं रे, ते कहीये अणगार, राम कहै मुनिवर भणी रे, बन्दो बारम्बार रे।।१४।।
Roman Transliteration
murakh lakhja re
murakh lakhja re, kanak me kamni jag men phas hai. nij man samjha re, in bhav men virche nahin thir vas hai..
nano neh todo kahyo re, jano anarath mul, het thikano na gine re, sagapan javai bhul. dhanya munivar sansar men re, dhan kun janai dhul re..1..
shrenik ray no dikro re, kaunik name ray, bap bhani diyo pinjre re, jovo agam many. in parigrah re karne re, anarath hota jay re..2..
har hathi tha bahil pai re, kaunik kari abhilash, doy divas men nar muva re, ek kod assi lakh, mahabharat agai huvo re, chhai sutra ni sakh re..3..
yadavkul men ayane re, kamla kodho vas, puri dvarka sur kari re, sab sovan ghar vas. ik din aiso aviyo re, huvo yadav kero nash re..4..
ray pradeshi re hunti re, surikanta nar, ishta kant valhi ghani re, sutra men adhikar. nij svarath bin papni re, maryo nij bhartar re..5..
jutthal shravak re hunti re, daita tis ne doy, agni manhi prajaliyo re, daya n ani koy, mathi garta ni pahuni re, gai jamaro khoy re..6..
(lay : hun darun akeli)
brahmadatta chakri tani re, hunti chulni mat, vyabhicharan chuki gai re, dirgharay ke sath. ghat vichari putra ni re, chhai e bahuli bat re..7..
sahans vidya trikhanda dhani re, ravan moto ray, sita ne harta thaka re, baitho lanka gamay. ghar phutyo bairi hanyo re, dhakka narak men khay re..8..
padmottar huramat' gai re, gaye kochak nan pran, pandav triya draupdi re, mul n rakhi kan. mathi gat marne gayo re, marai chhai jamran re..9..
jinarishi ne jinpalaji re, bandhav hunta doy, raina devi re vash padya re, yaksha sahai hoy, jinarish sahmo joviyo re, liyo shuli men poy re..10...
rupavanta triya dekhne re, jovai vishay vikar, lapat parnari tana re, gaya jamaro har, jam ghalai akhyan men takla re, de gurjhar ri mar re..11..
malmutra nin kothli re, ashuchi tano bhandar, upar se kalli lagi re, jin upar shingar. hinga devi sam triya re, jovo hiye vichar re..12..
jar joru ke karnai re, tutai juno pyar, je nar janai apani re, te nar mudh givar, tyag n kar sangrah karai re, tinne chhai dhikkar re..13..
kanak kamni chhodne re, palai shuddha achar, supna men vanchhai nahin re, te kahiye anagar, Ram kahai munivar bhani re, bando barambar re..14..