श्राविका श्रीमती
Shravika Shrimti
2316
श्राविका श्रीमती — Lyrics
श्राविका श्रीमती
श्रीमती सेठ तणी आ पुत्री, कियो अभिग्रह श्रीकार जी। पंच परमेष्ठी नाम जप्यां विन, न करूं काम लिगार जी। म्हारे रै हाथ में नवकरवाली, म्हानें अरिहन्त नों आधार जी।।१।।
उत्तम व्याह कियो अति सखरो, आई पिउघर हो हुसियार जी। हालत चालत ऊठत-बैठत, गिणै सुध मन नवकार जी।।२।।
गणमण करती देख बहू ने, सासू कूढै दिन रात जी। कियो फितूरो ईण घर आई, (तो) गुप्तपणे करूं घात जी।।३।।
सासू उठ दरजी रै चाली, ल्यायी बुगचा में सर्प डार जी। उठो बहूजी कपड़ा पहिरो, सजल्यो सब सिणगार जी।।४।।
सव सिणगार सजी ने बहुवर, आई सासू रै पास जी। पगां लागतां दिये दिलासा, (पिण) मनमें बहुत उदास जी।।५।।
सासू उठ सोनी रै चाली, लाई पेटी में सर्प डार जी। उठो बहूजी गहिणा पहिरो, वणग्यो नवसरहार जी।।६।।
हार पहिर सासू पे आई, हियडै़ अति हुलसाय जी। पगां लागतां सासू केरो, मुखड़ो गयो कुमलाय जी।।७।।
सासू उठ खाती रै चाली, ल्याई पेटी में सर्प घाल जी। उठो बहूजी पेटी खोलो, बण गई फूल नीं मालजी।।८।।
चिऊं दिशि पुप्प नीं खुशबू होई, सासू कीध विचार जी। पुष्पमाल अरु हार लेई नै, पहिरूं गला मझार जी।।६।।
(लय : बारै बरस स्यूस्यूं पिउ घर आयो)
सास बहू ने इण पर भाखै, उरो ल्याव मुझ हार जी। सति दियो नवकार गुणी नै, जब सर्प कियो फुंकार जी।।१०।।
सासू नैं सर्प टियो झपेरो, काढ्यो वहु रो बेर जी। सति उतार्यो जहर सासू रो, नवकरवाली फेर जी।।११।।
सास बहु नै सागै लेकर,, आई नदी किनार जी। लारै रही नै धक्को दीधो, बहु पहुंची पेले पार जी।।१२।।
संगति कीधी साधवियां री, लीधो संयम भार जी। तप-जप करणी करने अधिकी, पहुंती स्वर्ग मझार जी।।१३।।
सासू किया जिसा फल पाया, वह गई नदी जल मांय जी कर्म तणे-बस चाक तणी पर, चिहूं गति गोता खाय जी।।१४।।
इम जाणी उत्तम नर नारी, शील नै समकित धार जी। मोह मायादिक दूर करी नै, उतरो भव जल पार जी।।१५।।
Roman Transliteration
shravika shrimti
shrimti seth tani a putri, kiyo abhigrah shrikar ji. panch parmeshthi nam japyan vin, n karun kam ligar ji. mhare rai hath men navakarvali, mhanen arihanta non adhar ji..1..
uttam vyah kiyo ati sakhro, ai piughar ho husiyar ji. halat chalat uthat-baithat, ginai sudh man Navkar ji..2..
ganaman karti dekh bahu ne, sasu kudhai din rat ji. kiyo phituro in ghar ai, (to) guptapne karun ghat ji..3..
sasu uth darji rai chali, lyayi bugcha men sarpa dar ji. utho bahuji kapda pahiro, sajalyo sab singar ji..4..
sav singar saji ne bahuvar, ai sasu rai pas ji. pagan lagtan diye dilasa, (pin) manmen bahut udas ji..5..
sasu uth soni rai chali, lai peti men sarpa dar ji. utho bahuji gahina pahiro, vanagyo navasarhar ji..6..
har pahir sasu pe ai, hiydai ati hulsay ji. pagan lagtan sasu kero, mukhdo gayo kumlay ji..7..
sasu uth khati rai chali, lyai peti men sarpa ghal ji. utho bahuji peti kholo, ban gai phul nin malji..8..
chiun dishi puppa nin khushbu hoi, sasu kidh vichar ji. pushpamal aru har lei nai, pahirun gala majhar ji..6..
(lay : barai baras syusyun piu ghar ayo)
sas bahu ne in par bhakhai, uro lyav mujh har ji. sati diyo Navkar guni nai, jab sarpa kiyo phunkar ji..10..
sasu nain sarpa tiyo jhapero, kadhyo vahu ro ber ji. sati utaryo jahar sasu ro, navakarvali pher ji..11..
sas bahu nai sagai lekar,, ai nadi kinar ji. larai rahi nai dhakko didho, bahu pahunchi pele par ji..12..
sangti kidhi sadhviyan ri, lidho sanyam bhar ji. tap-jap karni karne adhiki, pahunti svarga majhar ji..13..
sasu kiya jisa phal paya, vah gai nadi jal many ji Karm tane-bas chak tani par, chihun gati gota khay ji..14..
im jani uttam nar nari, shil nai samkit dhar ji. moh mayadik dur kari nai, utaro bhav jal par ji..15..