काया री बाड़ी निरखी नै हरी रे
Kaya Ri Badi Nirkhi Nai Hari Re
1249
काया री बाड़ी निरखी नै हरी रे — Lyrics
काया री बाड़ी निरखी नै हरी रे क्यूं तूं फूल रे, हां रे हां, क्यूं तूं भूलै रे इक दिन कुम्हलावै बावला पत्ता झड़ ज्यावै रे, हां रे हां पतझड़ आवै रे, नर देख दशा घबरावै रे, कर ले जरा विचार।।
आवै है दोड्या दोड्या आज हुलसाया जो पंखीड़ा हां रे हां, करे अठे क्रीडा, जावेला सब मुंह मोड़ नै सारा है स्वारथिया, हां रे हां नहीं परमार्थिया, किण नै अपणौ बतलावै रे,करलै--।।
सुख में है साथी सारा दु:ख में कुण आडो आवेलो, हां रे हां, हाथ बंटावेलो, किण खातिर दौड़ा दौड़ है आ, समझ न आवै रे, हां रे हां जन भरमावै रे, क्यूं विषयां में मुरझावै रे, करलै--।।
यौवनियो साथी दिन च्यार रो बुढापो आवेलो, हां रे हां, रोक न पावेलो, थांरो नष्ट हुवेलो तेज ओ, सपना सब ढह ज्यासी, हां रे हां मनड़ो घबरासी, क्यूं अब भी मोड़ न ल्यावै रे, करलै--।।
माटी री काया थांरी है बणी माटी में मिल ज्यासी, हां रे हां, इक दिन जल ज्यासी, यम खड्यो अडीकै द्वार पर, कर धर्म कमाई रे, हां रे हां सदा भलाई रे, आ शिक्षा संत सुणावै रे, करलै।।
खोयो अमोलो अवसर व्यर्थ में ही अब तो जाग अरे, हां रे हां आलस त्याग अरे, मत हीरो यूं ही हार तूं, क्यूं कीमत विसरावै, हां रे हां हाथ नहीं आवै, फिर 'विजय' मिनख पछतावै रे, करले।।
Roman Transliteration
kaya ri badi nirkhi nai hari re kyun tun phul re, han re han, kyun tun bhulai re ik din kumhalavai bavla patta jhad jyavai re, han re han patajhad avai re, nar dekh dasha ghabravai re, kar le jara vichar..
avai hai dodya dodya aj hulsaya jo pankhida han re han, kare athe krida, javela sab munh mod nai sara hai svarthiya, han re han nahin parmarthiya, kin nai apanau batlavai re,karlai--..
sukh men hai sathi sara du:kh men kun ado avelo, han re han, hath bantavelo, kin khatir dauda daud hai a, samajh n avai re, han re han jan bharmavai re, kyun vishyan men murjhavai re, karlai--..
yauvniyo sathi din chyar ro budhapo avelo, han re han, rok n pavelo, thanro nashta huvelo tej o, sapna sab dhah jyasi, han re han mando ghabrasi, kyun ab bhi mod n lyavai re, karlai--..
mati ri kaya thanri hai bani mati men mil jyasi, han re han, ik din jal jyasi, yam khadyo adikai dvar par, kar Dharm kamai re, han re han sada bhalai re, a shiksha sant sunavai re, karlai..
khoyo amolo avasar vyartha men hi ab to jag are, han re han alas tyag are, mat hiro yun hi har tun, kyun kimat visravai, han re han hath nahin avai, phir 'vijay' minakh pachhtavai re, karle..