कड़वो बोल्यां अनरथ हुवै
Kadvo Bolyan Anarath Huvai
1260
कड़वो बोल्यां अनरथ हुवै — Lyrics
कड़वो बोल्यां अनरथ हुवै
कड़वो बोल्यां अनरथ होवै, मरने दुर्गति जावै, इह भव मांही भूंडो दीसै, परभव में दु:ख पावै, बोलो नांजी नांजी नांजी नांजी, तिण सूं कड़वा बोलो नांजी।।१।।
किण ही जीव नै दु:ख नहीं देणो, आ भगवंत की मरजी। छेदन भेदन मर्म की भाषा, ए सूतर में बरजी।।२।।
जिम करतां तुझ पाप न लागै, पहिली हियै बिचारी। सावद्य भाषा टाली बोली, निर्वद्य छै हितकारी।।३।।
घणा काल की हित मित्राई, हूंतो हेत अपारो। किण बिरियां में तोड़ी न्हाखै, वचन कह्यां मुख खारो।।४।।
अग्नि झाल उठे मन माही, खावै जहर कटारी। पग सूं लेई मस्तक सूधी, लागै वचन कुल्हारी।।५।।
आघो पाछो सोच न आणै, कूवो बावड़ी ताकै। लेवै झंपापात डूंगर सूं, कूद अगन में झांकै।।६।।
अकाम मरण सूं जीव अनंता, जामण मरण बधारै। सूत्र भगवती में भगवंत भाख्यो, जन्म वृथा मत हारै।।७।।
एक साहूकार तणे घर नारी कूवै नाख्यो भरतारो। मांहि पड़ते दांतो पकड्यो, तुरत आयो बिणजारो।।८।।
विणजारै बालद में राख्यो, लाखां द्रव्य कमायो। सासरिया थी लेई पद्मण, साहूकार घर आयो।।९।।
अनुक्रमें एक बेटो जायो, यौवन वय परणायो। तिण रै नार करकसा आयी, सासू थकी सवायो।।१०।।
एक दिन साहजी भाणै बैठा, त्रिया परोसै भाणो। झांको पड़ियो तावड़िया नों, थाली पर चिलकाणो।।११।।
ले ओढ़णो साहजी पर ढांक्यो, साहजी नै हांसो आयो। बा बिरिया तो भूल गई, पिउ कूवा माहि धमकायो।।१२।।
पुत्रवधू घूंघट में देखी, लागी करण विचारो। भाणे बैठा साहजी हंसिया, तिण रो कवण प्रकारो।।१३।।
साहूकार रा बैटा सेती, खांच लियो मन दूती। बतलाई मूंढै नहीं बोलै, चढि बाधण ने भूती।।१४।।
पिता तुमारो भाणै बैठ्या, क्यूं हसियो ते दाखो। नहि तर नेम पाणी पीवण रा, जीवंतड़ा फल चाखो।।१५।।
बेटै जाय बाप नै पूछ्यो, जाणी कलह अपारी। भूली ने सब बात सुणायी, पुत्र कही निज नारी।।१६।।
पुत्र बहू सुण मन में हरसी, हाथे खरची आई। दोय चार दिन आडा घाली, मांडी ताम लड़ाई।।१७।।
ऊंचो नाक लेई सू बोलो, मर्म थांरो मैं पायो। बा बेला तो भूल गया, पिउ कूवा में धमकायो।।१८।।
रीस घणी सासू नै आई, बहू पर चढ़ी चंडाली। चढ़ मेडी पर फांसी लीधी, मरण लह्यो तत्काली।।१९।।
इतला मां साहजी घर आया, घर नारी नहिं पाई। देखी मेड़ी माही लटूंबी, इण पिण फांसी खाई।।२०।।
मात पिता नें मूवा जाणी, बेटे पिण यू कीधी। तीन जीवां रो अनरथ देखी, बहू पिण फांसी लीधी।।२१।।
घर को घर सहु होग्यो पूरो, अपजस अधिक उपायो। इम जाणी ने भवियण कोई, कटुक वचन मति बायो।।२२।।
Roman Transliteration
kadvo bolyan anarath huvai
kadvo bolyan anarath hovai, marne durgati javai, ih bhav manhi bhundo disai, parabhav men du:kh pavai, bolo nanji nanji nanji nanji, tin sun kadva bolo nanji..1..
kin hi jiv nai du:kh nahin deno, a bhagavant ki marji. chhedan bhedan marma ki bhasha, e sutar men barji..2..
jim kartan tujh pap n lagai, pahili hiyai bichari. savadya bhasha tali boli, nirvadya chhai hitkari..3..
ghana kal ki hit mitrai, hunto het aparo. kin biriyan men todi nhakhai, vachan kahyan mukh kharo..4..
agni jhal uthe man mahi, khavai jahar katari. pag sun lei mastak sudhi, lagai vachan kulhari..5..
agho pachho soch n anai, kuvo bavdi takai. levai jhampapat dungar sun, kud agan men jhankai..6..
akam maran sun jiv ananta, jaman maran badharai. sutra bhagavti men bhagavant bhakhyo, janma vritha mat harai..7..
ek sahukar tane ghar nari kuvai nakhyo bhartaro. manhi padte danto pakadyo, turat ayo binjaro..8..
vinjarai balad men rakhyo, lakhan dravya kamayo. sasriya thi lei padman, sahukar ghar ayo..9..
anukramen ek beto jayo, yauvan vay parnayo. tin rai nar karaksa ayi, sasu thaki savayo..10..
ek din sahji bhanai baitha, triya parosai bhano. jhanko padiyo tavdiya non, thali par chilkano..11..
le odhano sahji par dhankyo, sahji nai hanso ayo. ba biriya to bhul gai, piu kuva mahi dhamkayo..12..
putravdhu ghunghat men dekhi, lagi karan vicharo. bhane baitha sahji hansiya, tin ro kavan prakaro..13..
sahukar ra baita seti, khanch liyo man duti. batlai mundhai nahin bolai, chadhi badhan ne bhuti..14..
pita tumaro bhanai baithya, kyun hasiyo te dakho. nahi tar nem pani pivan ra, jivantda phal chakho..15..
betai jay bap nai puchhyo, jani kalah apari. bhuli ne sab bat sunayi, putra kahi nij nari..16..
putra bahu sun man men harsi, hathe kharchi ai. doy char din ada ghali, mandi tam ladai..17..
uncho nak lei su bolo, marma thanro main payo. ba bela to bhul gaya, piu kuva men dhamkayo..18..
ris ghani sasu nai ai, bahu par chadhi chandali. chadh medi par phansi lidhi, maran lahyo tatkali..19..
itala man sahji ghar aya, ghar nari nahin pai. dekhi medi mahi latumbi, in pin phansi khai..20..
mat pita nen muva jani, bete pin yu kidhi. tin jivan ro anarath dekhi, bahu pin phansi lidhi..21..
ghar ko ghar sahu hogyo puro, apajas adhik upayo. im jani ne bhaviyan koi, katuk vachan mati bayo..22..