क्षमा करो मन खतं स्यूं
Kshama Karo Man Khatam Syun
1349
क्षमा करो मन खतं स्यूं — Lyrics
क्षमा करो मन खतं स्यूं
भणूं पचीसी भाव स्यूं, क्षमा री मन खंत हो, भवियण! क्षमा धर्म पहिलो खरो, भाख्यो श्री भगवन्त हो, भवियण! क्षमा करो मन खंत स्यूं।।१।।
खर्च न लागे क्षमा कीयां, कष्ट हुवे नहिं कोय हो। यश कोरत हुवे लोक में, लाभ घनेरो होय हो।।२।।
क्षमा सुखां री खान छै, कोप दु:खां री खान हो। कोप तजी नैं क्षमा करै, जग में धन्य धन्य जान हो।।३।।
क्षमा खडग लेई हाथ में, कोप करे चकचूर हो। अरिहन्तां इम आखियो, ते साचेला शूर हो।।४।।
क्षमा अमृत सारीखी, क्षमा दाख खजूर हो। क्षमा सब भोजन सिरे, आपै सुख भरपूर हो।।५।।
क्षमा खाजानो खूब है, क्षमा तप श्रृंगार हो। क्षमा धर करणी करै, धन्य त्यांरो अवतार हो।।६।।
गहणा भारी अति घणा, वस्त्र विविध प्रकार हो। सुन्दर रूप सुहावणो, क्षमा बिना सब छार हो।।७।।
कुण कुण जीव क्षमा करी, अन्तर अग्नि बुझाय हो। नाम कहूं छूं तेहना, सांभलज्यो चित्त लाय हो।।८।।
परदेशी नैं पापिणी, युवती दीधो जहर हो। करड़ी नृप क्षमा करी, लीनी स्वर्गां लहर हो।।६९।।
(लय : भावधरी नित पालिए)
दमदत्त ऋषि नै देखनै, दुर्योधन दु:ख दीध हो। तिल मात्र डोल्यो नहीं, परम क्षमा रस पीध हो।।१०।।
दुष्टी भाणेजै दियो, जहर मामा नैं जाण हो। ऋषि उदाई क्षमा करी, पाम्या परम कल्याण हो।।११।।
खन्धक ऋषि की खालड़ी, अलगी कीधि उतार हो। नाक शल्य घाल्यो नहीं, पुंहतो मुक्ति मझार हो।।१२।।
पांचसौ ऋषि पीलिया, घाणी मांही घाल हो। क्षमा करी मुक्ते गया, मेट्या सर्व हवाल हो।।१३।।
अर्जुनमाली आदरी, क्षमा मन खुशहाल हो। हुआ अन्तगड केवली, वेगि वरी शिव बाल हो।।१४।।
क्रोध नमूची न कर्यो, क्षमावती गुण खान हो। सेठ सुता बहु सुलक्षणी, उपजी अमर विमान हो।।१५।।
क्षमावन्त नर नैं कहै, मोटो मनुष्य अमोल हो। तीनों लोक में तेहनो, बधै भारी तोल हो।।१६।।
क्षमावन्त री करणी सहु, सफल हुवै सुखदाय हो। भव भव में सुख ऊपजै, कमी न रहे कांय हो।।१७।।
क्षमा चिन्तामणि सारीखी, चिन्ता देवै चूर हो। क्षमा पारस सारीखी, आपै सुख अपूर हो।।१८।।
क्षमा सुरतरु सारीखी, काम कुम्भ सरीस हो। कामधेनु सरीखी कही, पूरे मन जगीश हो।।१९।।
क्षमा नावा सारीखी, पहुंचावै भव पार हो। क्षमा औषध सारीखी, काटे कर्म विकार हो।।२०।।
कर्म कठिन भव कोड़ रा, क्षमा देवै खपाय हो। सब नै लागै सुहावणी, वैर विघ्न टल जाय हो।।२१।।
शीत सहनो अति दोहिलो, घोर ग्रीष्म रो घाम हो। लोचादिक सब सोहलो, कठिन क्षमा रो काम हो।।२२।।
इम जाणी उत्तम नरा, किण सूं न करो क्रोध हो। सुख पामो ज्यों शाश्वता, मैं कह्यो सूत्र में शोध हो।।२३।।
संवत् अठारहसै त्रेसठे, आखातीज उम्मेद हो। चन्द्रवार घणी चूंप सूं, कीधो क्रोध निषेध हो।।२४।।
ऋषि चन्द्रभान रूड़े मने, क्षमा पचीसी सार हो। फतेहपुर में प्रकट करी, कीधी महा सुखकार हो।।२५।।
Roman Transliteration
Kshama karo man khatam syun
bhanun pachisi bhav syun, Kshama ri man khant ho, bhaviyan! Kshama Dharm pahilo kharo, bhakhyo shri bhagavanta ho, bhaviyan! Kshama karo man khant syun..1..
kharcha n lage Kshama kiyan, kashta huve nahin koy ho. yash korat huve lok men, labh ghanero hoy ho..2..
Kshama sukhan ri khan chhai, kop du:khan ri khan ho. kop taji nain Kshama karai, jag men dhanya dhanya jan ho..3..
Kshama khadag lei hath men, kop kare chakchur ho. arihantan im akhiyo, te sachela shur ho..4..
Kshama amrit sarikhi, Kshama dakh khajur ho. Kshama sab bhojan sire, apai sukh bharpur ho..5..
Kshama khajano khub hai, Kshama tap shrringar ho. Kshama dhar karni karai, dhanya tyanro avatar ho..6..
gahna bhari ati ghana, vastra vividh prakar ho. sundar rup suhavno, Kshama bina sab chhar ho..7..
kun kun jiv Kshama kari, antar agni bujhay ho. nam kahun chhun tehna, sambhalajyo chitta lay ho..8..
pardeshi nain papini, yuvti didho jahar ho. kardi nrip Kshama kari, lini svargan lahar ho..69..
(lay : bhavadhri nit palie)
damadatta rishi nai dekhnai, duryodhan du:kh didh ho. til matra dolyo nahin, param Kshama ras pidh ho..10..
dushti bhanejai diyo, jahar mama nain jan ho. rishi udai Kshama kari, pamya param kalyan ho..11..
khandhak rishi ki khaldi, alagi kidhi utar ho. nak shalya ghalyo nahin, punhto mukti majhar ho..12..
panchsau rishi piliya, ghani manhi ghal ho. Kshama kari mukte gaya, metya sarva haval ho..13..
arjunmali adari, Kshama man khushhal ho. hua antagad kevli, vegi vari shiv bal ho..14..
krodh namuchi n karyo, kshamavti gun khan ho. seth suta bahu sulakshani, upaji amar viman ho..15..
kshamavanta nar nain kahai, moto manushya amol ho. tinon lok men tehno, badhai bhari tol ho..16..
kshamavanta ri karni sahu, saphal huvai sukhday ho. bhav bhav men sukh upajai, kami n rahe kany ho..17..
Kshama chintamni sarikhi, chinta devai chur ho. Kshama paras sarikhi, apai sukh apur ho..18..
Kshama suratru sarikhi, kam kumbha saris ho. kamdhenu sarikhi kahi, pure man jagish ho..19..
Kshama nava sarikhi, pahunchavai bhav par ho. Kshama aushadh sarikhi, kate Karm vikar ho..20..
Karm kathin bhav kod ra, Kshama devai khapay ho. sab nai lagai suhavni, vair vighna tal jay ho..21..
shit sahno ati dohilo, ghor grishma ro gham ho. lochadik sab sohlo, kathin Kshama ro kam ho..22..
im jani uttam nara, kin sun n karo krodh ho. sukh pamo jyon shashvata, main kahyo sutra men shodh ho..23..
sanvat atharahsai tresthe, akhatij ummed ho. chandravar ghani chump sun, kidho krodh nishedh ho..24..
rishi chandrabhan rude mane, Kshama pachisi sar ho. phatehpur men prakat kari, kidhi maha sukhkar ho..25..