मिनखां! थे जागो रे,
Minkhan! The Jago Re,
1601
मिनखां! थे जागो रे, — Lyrics
मिनखां! थे जागो रे, अब सोयां नहीं सरैला, थांरो रीतो है खजानो, बो जाग्यां स्यूं भरैला, मिनखां! थे जागो रे।।
१. हुयो उजाळो सूरज ऊग्यो, पण थे आंख्यां नहीं खोली। मोह-माया रै सपना स्यूं ही, भरी मिनखपण री झोळी। टाबरपणै में घणा हंस्या-खेल्या, जवानी में पापड़ नित नुंवां बल्या, आयो बुढ़ापो अब बजातो नगारा, लंका लुटैली घर में पड़ैला बघारा, मुरझावैला फूल खिल्योड़ा, दुख री घिरती रात में।।
२. पाको पान झड़े पलभर में, रोक नहीं पावै कोई। जनम्या है सो मरै एक दिन, बात नहीं आ अणहोई। हवा रो भरोसो करयो नहीं जावै, चालै अबार अगले पल रुक ज्यावै, जीवन अमोल थांरो इण ने संभाळो, अवगुण रो साथ छोड़ो, गुणां नै रुखाळो, लाख हाथ रो अन्तर होसी भलै बुरै री ख्यात में।।
३. भलो सोचणो भलो बोलणो, काम भलाई रो करणो। सब स्यूं हिल-मिल रहणो जग में, सदा बुराई स्यूं डरणो। विषमता रो मारग आछो नहीं है, समता री साधना बिलकुल सही है, उफणनै'र बूसणै री चलगत है खोटी, सूंपो मत दूजां रै हाथां में चोटी, 'बुद्व' सफळता ईं जीवन री है खुद रै ही हाथ में।।
Roman Transliteration
minkhan! the jago re, ab soyan nahin saraila, thanro rito hai khajano, bo jagyan syun bharaila, minkhan! the jago re..
1. huyo ujalo suraj ugyo, pan the ankhyan nahin kholi. moh-maya rai sapna syun hi, bhari minakhapan ri jholi. tabarapnai men ghana hansya-khelya, javani men papad nit nunvan balya, ayo budhapo ab bajato nagara, lanka lutaili ghar men padaila baghara, murjhavaila phul khilyoda, dukh ri ghirti rat men..
2. pako pan jhade palabhar men, rok nahin pavai koi. janamya hai so marai ek din, bat nahin a anahoi. hava ro bharoso karyo nahin javai, chalai abar agale pal ruk jyavai, jivan amol thanro in ne sambhalo, avagun ro sath chhodo, gunan nai rukhalo, lakh hath ro antar hosi bhalai burai ri khyat men..
3. bhalo sochno bhalo bolno, kam bhalai ro karno. sab syun hil-mil rahno jag men, sada burai syun darno. vishamta ro marag achho nahin hai, samta ri sadhna bilkul sahi hai, uphannai'r busnai ri chalagat hai khoti, sumpo mat dujan rai hathan men choti, 'budva' saphalta in jivan ri hai khud rai hi hath men..