ओ भव रत्न चिंतामणि सरिखो
O Bhav Ratna Chintamni Sarikho
1940
ओ भव रत्न चिंतामणि सरिखो — Lyrics
ओ भव रत्न चिंतामणि सरिखो
ओ भव रत्न चिंतामणि सरिखो बार-बार नहिं मिलसी रे। चेत सकै तो चेत जीवड़ला एहवो जोग न मिलसी रे।।१।।
च्यार गती चौरासी लख में, रुलतो रुलतो आयो रे। पुण्य योग सुपना री संपत मानव रो भव पायो रे।।२।।
बेहलो थांरै बोहलो जीवड़ला, ले जिनजी रो नामो रे। कुगुरु कुदेव कुधर्म छांड़ी नैं, कीजै उत्तम कामो रे।।३।।
ज्यूं ब्राह्मण नै चिन्तामणि लाधो, पुण्य तणै संजोगो रे। कांकर साटै राळी दीधो, फिर मिलवारो न जोगो रे।।४।।
धिन धिन साधू संयम पालै, सूधै मारग चालै रे। खरोज नाणो गांठे बांधै, खोटो दृष्टि न भालै रे।।५।।
एक काल थारो काल गयो छै, एक काल है नैड़ै रे। त्यां बिच में तू बैठो जीवड़ला, काल आहेडी लागो केडै रे।।६।।
मात-पिता तिरिया सुत बंधव, बहुविध ममता जोड़ै रे। यां सेती जीव री गरज सरै तो साधू घर क्यानै छोड़े रे।।७।।
मोह मिथ्यात विषय रसछांडी, संवर सामायिक कीजै रे। गुरु उपदेश सदा सुखदाई सुकृत अमृत-रस पीजै रे।।८।।
ज्यूं अंजलि में नीर समावै, खिण खिण अूणो धावै रे। घड़ी घड़ी घड़ियालज बाजै, खिण लाखीणी जावै रे।।९।।
(लय : मान मान मेरी सीख सयाणा!)
देव गुरु धर्म दृढ़ कर सेवो, समकित सुध आराधो रे। छ:काय जीवां री जयणा करतां, मुक्ति तणो पथ साधो रे।।१०।।
गुरु कंचन गुरु हीरा जीवड़ला, गुरू ज्ञान रा दरिया रे। गुरु उपदेश सुणी नैं आगे जीव अनन्ता तिरिया रे।।११।।
संयम मारग सुध कर सेवो, शिव रमणी फल होवै रे। मानव भव मुक्ती रो कारण, अहिलो तूं मत खोवै रे।।१२।।
कायर नर कादै में कलसी शूरा पार उतरसी रे। बाहर भीतर समता राखै, जनम मरण नहिं करसी रे।।१३।।
Roman Transliteration
o bhav ratna chintamni sarikho
o bhav ratna chintamni sarikho bar-bar nahin milsi re. chet sakai to chet jivadla ehavo jog n milsi re..1..
chyar gati chaurasi lakh men, rulto rulto ayo re. punya yog supna ri sampat manav ro bhav payo re..2..
behlo thanrai bohlo jivadla, le jinji ro namo re. kuguru kudev kudharma chhandi nain, kijai uttam kamo re..3..
jyun brahman nai chintamni ladho, punya tanai sanjogo re. kankar satai rali didho, phir milvaro n jogo re..4..
dhin dhin sadhu sanyam palai, sudhai marag chalai re. kharoj nano ganthe bandhai, khoto drishti n bhalai re..5..
ek kal tharo kal gayo chhai, ek kal hai naidai re. tyan bich men tu baitho jivadla, kal ahedi lago kedai re..6..
mat-pita tiriya sut bandhav, bahuvidh mamta jodai re. yan seti jiv ri garaj sarai to sadhu ghar kyanai chhode re..7..
moh mithyat vishay raschhandi, sanvar Samayik kijai re. Guru upadesh sada sukhdai sukrit amrit-ras pijai re..8..
jyun anjali men nir samavai, khin khin uno dhavai re. ghadi ghadi ghadiyalaj bajai, khin lakhini javai re..9..
(lay : man man meri sikh sayana!)
Dev Guru Dharm dridh kar sevo, samkit sudh aradho re. chh:kay jivan ri jayna kartan, mukti tano path sadho re..10..
Guru kanchan Guru hira jivadla, guru jnan ra dariya re. Guru upadesh suni nain age jiv ananta tiriya re..11..
sanyam marag sudh kar sevo, shiv ramni phal hovai re. manav bhav mukti ro karan, ahilo tun mat khovai re..12..
kayar nar kadai men kalsi shura par utarsi re. bahar bhitar samta rakhai, janam maran nahin karsi re..13..