समाई सुखदाई हो
Samai Sukhdai Ho
2382
समाई सुखदाई हो — Lyrics
समाई सुखदाई हो
समाई सुखदाई हो चित ल्याई कीजै चूंप स्यूं कांई आतम रो उद्धार। दोय घड़ी परमाणे जी बातां नहिं कीजै दूसरी, कांई धर्मशुक्ल मन धार।।१।।
समता भाव समाई जी बताई वीर सिद्धान्त में, कांई ममता देवो मार। नेम धरी नवकोटी जी नव कोटी रूड़ी पालज्यो, कांई पाप सकल परिहार।।२।।
साहिब समरण कीजै जी पीजै रस समता शील री, कांई उलट घणो मन आण। जनम मरण मिट ज्यावै जी जोखो नहि थावै जीव नैं, कांई कोड़ हुवै कल्याण।।३।।
प्रभु रै घर री बातां जी गुणदाता कीजै प्रेम स्यूं कांई स्तवन सज्झाय सुतंत। भणीजै गुणीजै सुणीजै जी सीखीजै चरचा गुरु कन्हैं, कांई खरी धर्म नीं खंत।।४।।
निद्रा विकथा आलस जी कषायां च्यार निवारज्यो, कांई परहरो पंच प्रमाद। झूठी बातां छोड़ो जी मन मोड़ो झगड़ा राड़ स्यूं, कांई बरजो फोगट बाद।।५।।
(लय : चण्डाली चोकड़ियां हो)
वर्षा चिह्न बखाण्यो जी, जाणो घण बादल बीजली, कांई नरपति चिह्न निसाण। आछी रीत समाईजी सुखदाई रूडी आदरो, कांई ए श्रावक अहनाण।।६।।
कोड़ भवां रा कीधा जी उडावै पातक आपणा, कांई शुद्ध समाई एक। सुर नर पदवी पावै जी शिवपुर नां सुख लहे शाश्वता, कांई आणन्द लील अनेक।।७।।
अफल दिहाड़ो जावै जी पाछो नहिं आवै आपरो, कांई धर्म बिना करी द्वन्द्व। सफल दिहाड़ो तेही जी चित देई धर्म समाचरो, कांई जपो वीर जिणन्द।।८।।
करणी रूड़ी कीजै जी लाहो भल लीजै कोड स्यूं, कांई अवसर लाधो आज। काल अनन्तो दोहरो जी नहीं छै सोरो जिन क्यो, काई सारो आतम काज।।६।।
संवत अठारै गुणसट्ठै जी तिथि महासुद भली सप्तमी, कांई शनिवार सुखदाय। चन्द्रभाण सराईजी समाई रूड़ी रीत स्यूं, कांई चाड़वास चित ल्याय।।१०।।
Roman Transliteration
samai sukhdai ho
samai sukhdai ho chit lyai kijai chump syun kani atam ro uddhar. doy ghadi parmane ji batan nahin kijai dusri, kani dharmashukla man dhara..1..
samta bhav samai ji batai vir siddhanta men, kani mamta devo mar. nem dhari navkoti ji nav koti rudi palajyo, kani pap sakal parihara..2..
sahib samaran kijai ji pijai ras samta shil ri, kani ulat ghano man an. janam maran mit jyavai ji jokho nahi thavai jiv nain, kani kod huvai kalyana..3..
Prabhu rai ghar ri batan ji gundata kijai prem syun kani stavan sajjhay sutant. bhanijai gunijai sunijai ji sikhijai charcha Guru kanhain, kani khari Dharm nin khanta..4..
nidra viktha alas ji kashayan chyar nivarajyo, kani parahro panch pramad. jhuthi batan chhodo ji man modo jhagda rad syun, kani barjo phogat bada..5..
(lay : chandali chokdiyan ho)
varsha chihna bakhanyo ji, jano ghan badal bijli, kani narapti chihna nisan. achhi rit samaiji sukhdai rudi adaro, kani e shravak ahanana..6..
kod bhavan ra kidha ji udavai patak apana, kani shuddha samai ek. sur nar padvi pavai ji shivpur nan sukh lahe shashvata, kani ananda lil aneka..7..
aphal dihado javai ji pachho nahin avai aparo, kani Dharm bina kari dvandva. saphal dihado tehi ji chit dei Dharm samachro, kani japo vir jinanda..8..
karni rudi kijai ji laho bhal lijai kod syun, kani avasar ladho aj. kal ananto dohro ji nahin chhai soro Jin kyo, kai saro atam kaja..6..
sanvat atharai gunasatthai ji tithi mahasud bhali saptami, kani shanivar sukhday. chandrabhan saraiji samai rudi rit syun, kani chadvas chit lyaya..10..