सोना रूपा रो रवि (स्वागत-गीत)
Sona Rupa Ro Ravi (Svagat-Git)
2462
सोना रूपा रो रवि (स्वागत-गीत) — Lyrics
सोना रूपा रो रवि (स्वागत-गीत) सोना रूपा रो रवि ऊग्यो, म्हांरो सपनो साचो हूग्यो, पुर में परम पूज गुरु आया, भाग सितारो जागै। म्हांनै सद्गुरु रो दीदार प्यारो-प्यारो लागै।।
सूनो सो संसार गुरां बिन, गुरु असहायां रा सहारा, हार हिया रा आंखड़ल्यां रा तारा जीवन-रखवारा। पांव-पांव चल धरती पावन करता जग रा उजियारा, ग्राम नगर पुर घर-घर बरसे वाणी इमरत रसधारा। इरिया जोवत धीमै हालै, दर्शक जन थुथकारो घालै, झालै भगतां री बनणा जद सीन सुप्यारो लागै।।
दिवलो जल्यो आज घीरत रो, दूधां मेहड़लो बरस्यो, बाट जोवता खड्या-खड्या, गुरुवर म्हारो खेतर फरस्यो। मिल्यो मेघ रो मीठो पाणी, तिरपत है चातक तरस्यो। फल्या मनोरथ जन-जन मन रा, धरती रो कण-कण्ध हरस्यो। खुशियां रो सागर लहरावै, हरस हिया में नहीं समावै, सागी चौथे आरै जिस्यो बिस्यो बरतारो लागै।।
आज दशहरो गहरो घर-घर, आज मनावां दीवाली, आयो है त्यौहार अनोखो, छाई अनहद खुशहाली। फली बेलड़ी आशा री, है महरबान खुद गणमाली, स्वर्ग उतर आयो धरणी पर, पुलक उठी रूं-रंवाली। मिलजुल गीत बधावा गावां, इमरत रै झरणां में न्हावां, ध्यावां ध्यान हमेशा, मुलको मोहनगारो लागै।।
ऊठ सवारे दरसण प्रवचन, जी भर उपासना करस्यां, सुण उपदेश सतोला, शुभ संस्कार टाबरां में भरस्यां। जीवन नैया रा औ कुशल खवैया भवसागर तरस्यां, पायो है आधार सांत रो, साची शिवसंपद वरस्यां। जुग-जुग करो शासना स्वामी! चिरजीवी हो अन्तर्यामी! नामी जग में थां पर सारो दारमदारो लागै।।
Roman Transliteration
sona rupa ro ravi (svagat-git) sona rupa ro ravi ugyo, mhanro sapno sacho hugyo, pur men param puj Guru aya, bhag sitaro jagai. mhannai sadguru ro didar pyaro-pyaro lagai..
suno so sansar guran bin, Guru asahayan ra sahara, har hiya ra ankhadalyan ra tara jivan-rakhvara. panv-panv chal dharti pavan karta jag ra ujiyara, gram nagar pur ghar-ghar barse vani imarat rasdhara. iriya jovat dhimai halai, darshak jan thuthkaro ghalai, jhalai bhagtan ri banna jad sin supyaro lagai..
divlo jalyo aj ghirat ro, dudhan mehadlo barasyo, bat jovta khadya-khadya, guruvar mharo khetar pharasyo. milyo megh ro mitho pani, tirapat hai chatak tarasyo. phalya manorath jan-jan man ra, dharti ro kan-kandha harasyo. khushiyan ro sagar lahravai, haras hiya men nahin samavai, sagi chauthe arai jisyo bisyo bartaro lagai..
aj dashahro gahro ghar-ghar, aj manavan divali, ayo hai tyauhar anokho, chhai anahad khushhali. phali beldi asha ri, hai maharban khud ganmali, svarga utar ayo dharni par, pulak uthi run-ranvali. miljul git badhava gavan, imarat rai jharnan men nhavan, dhyavan dhyan hamesha, mulko mohangaro lagai..
uth savare darasan pravachan, ji bhar upasna karasyan, sun upadesh satola, shubh sanskar tabran men bharasyan. jivan naiya ra au kushal khavaiya bhavsagar tarasyan, payo hai adhar sant ro, sachi shivasampad varasyan. jug-jug karo shasna Swami! chirjivi ho antaryami! nami jag men than par saro daramdaro lagai..