भिक्षु-भिक्षु-भिक्षु म्हारी आत्मा पुकारे
Bhikshu-Bhikshu-Bhikshu Mhari Atma Pukare
467
भिक्षु-भिक्षु-भिक्षु म्हारी आत्मा पुकारे — Lyrics
भिक्षु-भिक्षु-भिक्षु म्हारी आत्मा पुकारे भिक्षु-भिक्षु-भिक्षु म्हारी आत्मा पुकारे, भिक्षु रो म्है साचो परचो पायो जी ओ। जद-जद भीड़ पड़ी भगतां में तो, स्वामीजी रो शरणो, आडो आयो जी ओ।।
1. शोभजी श्रावक नै नाथद्वारा जेल में, सदेह दरसण देण भिक्षु आया जी ओ। ऊठतां तड़ाक बेड्यां टूट दूरी पड़गी, तो देख सारा इचरज पाया जी ओ।।
2. स्वामीजी नै सिंवरया जद जोधपुर दरबार में। पटवोजी पूरी बाजी लेग्या जी ओ, रूपांजी रो खोड़ो टूट्यो रावळिया रे रावळै, राजी राजी घर का दीक्षा देग्या जी ओ।।
3. धगधगता खीरा बरस्या बीदासर में, होग्या सै बैहोश संत बाकी जी ओ। जयाचार्य तन्मय स्तवना सुणाई, 'मुणिन्द मोरा' ढाळ आज साखी जी ओ।।
4. जब्बलपुर जांवतां चम्पक मुनि नै, शेर दो बबरची मिलग्या जी ओ। भिक्षु-स्वाम भिक्षु-स्वाम नाम सहज्यां निकल्यो, बीस हाथ शेर दूर टळग्या जी ओ।।
5. स्वामीजी री ओट ली जसोल वाला मानजी, तो काळियै रो जहर उतरग्यो जी ओ। जंतर-मंतर झाड़ा-झपटा सारा उत्तर दे दिया, पर स्वामीजी रो नाम काम करग्यो जी ओ।।
6. बोरावड़ रै ठाकरां पर सेना चढ़ आई, मघवागणी शरणा सुणाया जी ओ। कोट स्यूं उतरती फोजां देखी अणगिणती, भागता कुचामण पाछा आया जी ओ।।
7. एक के अनेक छेक देखल्यो थे परचा, डूबतां री नाव कांठे आई जी ओ। बारे बारे फिरै पड़ी बीच में तिजूरी, डाकुआं री आंख्यां चुंधियाई जी ओ।।
8. रात नै विरात नै एकलो के दोकलो, जद जद डर भय लागै जी ओ। स्वामीजी रो नाम लियां खड़या हुवै रूंगटा, आतमा में पौरुष जागै जी ओ।।
9. दीपां रो दुलारो प्यारो हार हिया रो, संकट मोचन हारो अजमाल्यो जी ओ। अपणो जाण वत्सलता स्यूं सावळ बुचकार कर, 'चम्पक' नै एकरस्यां हियै लगाल्यो जी ओ।।
Roman Transliteration
Bhikshu-Bhikshu-Bhikshu mhari atma pukare Bhikshu-Bhikshu-Bhikshu mhari atma pukare, Bhikshu ro mhai sacho parcho payo ji o. jad-jad bhid padi bhagtan men to, svamiji ro sharno, ado ayo ji o..
1. shobhji shravak nai nathadvara jel men, sadeh darasan den Bhikshu aya ji o. uthatan tadak bedyan tut duri padgi, to dekh sara icharaj paya ji o..
2. svamiji nai sinvarya jad jodhpur darbar men. patvoji puri baji legya ji o, rupanji ro khodo tutyo ravliya re ravlai, raji raji ghar ka diksha degya ji o..
3. dhagadhagta khira barasya bidasar men, hogya sai baihosh sant baki ji o. Jayacharya tanmay stavna sunai, 'muninda mora' dhal aj sakhi ji o..
4. jabbalpur janvtan champak Muni nai, sher do babarchi milagya ji o. Bhikshu-svam Bhikshu-svam nam sahajyan nikalyo, bis hath sher dur talagya ji o..
5. svamiji ri ot li jasol vala manji, to kaliyai ro jahar utaragyo ji o. jantar-mantar jhada-jhapta sara uttar de diya, par svamiji ro nam kam karagyo ji o..
6. boravad rai thakran par sena chadh ai, maghvagani sharna sunaya ji o. kot syun utarti phojan dekhi anaginti, bhagta kuchaman pachha aya ji o..
7. ek ke anek chhek dekhalyo the parcha, dubtan ri nav kanthe ai ji o. bare bare phirai padi bich men tijuri, dakuan ri ankhyan chundhiyai ji o..
8. rat nai virat nai ekalo ke doklo, jad jad dar bhay lagai ji o. svamiji ro nam liyan khadya huvai rungta, atama men paurush jagai ji o..
9. dipan ro dularo pyaro har hiya ro, sankat mochan haro ajamalyo ji o. apano jan vatsalta syun saval buchkar kar, 'champak' nai ekarasyan hiyai lagalyo ji o..