क्रोध कदेय नहिं कीजिए
Krodh Kadey Nahin Kijie
1336
क्रोध कदेय नहिं कीजिए — Lyrics
क्रोध कदेय नहिं कीजिए
क्रोध कदेय नहिं कीजिये।।ध्रुपद।। क्रोध कदेय नहिं कीजिये, क्रोध अग्नि री झाल हो! भवियण। करूं पचीसी क्रोध री, सुणज्यो सूरत सम्भाल हो, भवियण।।१।।
पींजी रूई होवै जेह में, अग्नि चिनगारी एक हो। पड़ियां बाळै पलक में, इम गुण बाळै अनेक हो।।२।।
क्रोध किया न हुवे कदे, आछी बात रो अंश हो। घर में दु:ख व्यापे घणो, बधै कर्मां रा वंश हो।।३।।
जहर हलाहल अति बुरो, खाधां मरे एक बार हो। क्रोध सूं बहु बिरियां मरे, खावै अनन्ती मार हो।।४।।
प्रीति पुराणी क्रोध सूं, बादल जेम विलाय हो। फेर मिलाप हुवे नहीं, पीछे घणो पछताय हो।।५।।
दासी मींढ़ो देखलो, खेद सूं हुआ खुवार हो। मर्कट ने महीपति तणो, पूरो हुवो परिवार हो।।६।।
द्वैपायन द्वारका दही, कीधो कोप अपार हो। तपस्या बहु वर्षां तणी, क्षण में कोधी छार हो।।७।।
खन्धक ऋषि क्रोधे करी, बाळयो देश नै जोय हो। उत्तम जप तप आपरो, क्षण में दीधो खोय हो।।८।।
गोशालो भगवन्त रो, बाळया दो अणगार हो। झींखा खासी जिन कह्यो, भगवती सूत्र मझार हो।।९।।
(लय : भावधरी नित पालिए)
क्रोध कियो निज कन्त सूं, नामे अतुंकारी नार हो। बेची बर्बर देश में, पामी दु:ख अपार हो।।१०।।
कोटि पूर्व तपस्या करी, देश ऊणी दिन रात हो। क्षण में खोवे क्रोध सूं, मरने दुर्गति जात हो।।११।।
धिक् धिक् क्रोधी जीव ने, फिट फिट करै बहु लोय हो। बाल्हा पिण बैरी हुवै, देवे जन्म डुबोय हो।।१२।।
क्रोधी रे रहवो करे, जिण तिण सेती विरोध हो। बोध न आवे क्रोध सूं, क्रोध सूं जावे बोध हो।।१३।।
क्रोध सूं बाजै कूंजड़ो, क्रोध सूं बाजे चाण्डाल हो। क्रोध सूं कुल लाजे घणो, क्रोध सूं मरे अकाल हो।।१४।।
क्रोध सू विष खाई मरै, खाय कटारी तरवार हो। फांसी खाय कूवे पड़े, पलक में हुवै खुवार हो।।१५।।
माथो फोड़ अपचो करे, बोले आल पंपाल हो। क्रोध करीने उछलै, क्रोध सूं मारे बाल हो।।१६।।
क्रोधी नर क्रोधे करी, सिंह चीतो हुवे सांप हो। दुष्टी ते मारै देखने, क्रोध तणै प्रताप हो।।१७।।
चारित्रिया क्रोधे चढ़े, कहो ज्ञानी बाल हो। उत्तराध्ययन में ओपमा, दीधी दीनदयाल हो।।१८।।
लाठी बाजे क्रोध सूं, शिर जाय छै फूट हो। राजा रोके रावले, लेवे दोनों घर लूट हो।।१६।।
क्रोधी नर अलखावणो, कुटीजै ठोड़ ठोड़ हो। क्रोधी सूं भेलप कियां, लागे झगड़ा झोड़ हो।।२०।।
क्रोधी कुढ़ कुढ़ दुखां मरै, उठे घट में आग हो। क्रोधी ने सुख हुवै नहीं, क्रोधी ने दु:ख अथाग हो।।२१।।
क्रोध अग्नि बुझायवा, नाखो क्षमा नो नीर हो। सुख पामो ज्यों शाश्वता, भाख गया महावीर हो।।२२।।
आगम मांही अनेक छै, क्रोध तणा अवदात हो। क्रोध तजी ने क्षमा करो, सौ वातां एक बात हो।।२३।।
संवत अठारहसै त्रेसठे, वदी नवमी सोमवार हो। आश्विन मास आनन्द सूं, बोल्या वचन विचार हो।।२४।।
चूरू पुर चावो घणो, वर्णन हद्द विशाल हो। ऋषि चन्द्रभाण रूड़े मने, जोड़ी जुगते ढाल हो।।२५।।
Roman Transliteration
krodh kadey nahin kijie
krodh kadey nahin kijiye..dhrupad.. krodh kadey nahin kijiye, krodh agni ri jhal ho! bhaviyan. karun pachisi krodh ri, sunajyo surat sambhal ho, bhaviyana..1..
pinji rui hovai jeh men, agni chingari ek ho. padiyan balai palak men, im gun balai anek ho..2..
krodh kiya n huve kade, achhi bat ro ansh ho. ghar men du:kh vyape ghano, badhai karman ra vansh ho..3..
jahar halahal ati buro, khadhan mare ek bar ho. krodh sun bahu biriyan mare, khavai ananti mar ho..4..
priti purani krodh sun, badal jem vilay ho. pher milap huve nahin, pichhe ghano pachhtay ho..5..
dasi mindho dekhlo, khed sun hua khuvar ho. markat ne mahipti tano, puro huvo parivar ho..6..
dvaipayan dvarka dahi, kidho kop apar ho. tapasya bahu varshan tani, kshan men kodhi chhar ho..7..
khandhak rishi krodhe kari, balyo desh nai joy ho. uttam jap tap aparo, kshan men didho khoy ho..8..
goshalo bhagavanta ro, balya do anagar ho. jhinkha khasi Jin kahyo, bhagavti sutra majhar ho..9..
(lay : bhavadhri nit palie)
krodh kiyo nij kanta sun, name atunkari nar ho. bechi barbar desh men, pami du:kh apar ho..10..
koti purva tapasya kari, desh uni din rat ho. kshan men khove krodh sun, marne durgati jat ho..11..
dhik dhik krodhi jiv ne, phit phit karai bahu loy ho. balha pin bairi huvai, deve janma duboy ho..12..
krodhi re rahvo kare, jin tin seti virodh ho. bodh n ave krodh sun, krodh sun jave bodh ho..13..
krodh sun bajai kunjdo, krodh sun baje chandal ho. krodh sun kul laje ghano, krodh sun mare akal ho..14..
krodh su vish khai marai, khay katari tarvar ho. phansi khay kuve pade, palak men huvai khuvar ho..15..
matho phod apacho kare, bole al pampal ho. krodh karine uchhalai, krodh sun mare bal ho..16..
krodhi nar krodhe kari, sinh chito huve samp ho. dushti te marai dekhne, krodh tanai pratap ho..17..
charitriya krodhe chadhe, kaho jnani bal ho. uttaradhyayan men opama, didhi dinadyal ho..18..
lathi baje krodh sun, shir jay chhai phut ho. raja roke ravle, leve donon ghar lut ho..16..
krodhi nar alakhavno, kutijai thod thod ho. krodhi sun bhelap kiyan, lage jhagda jhod ho..20..
krodhi kudh kudh dukhan marai, uthe ghat men ag ho. krodhi ne sukh huvai nahin, krodhi ne du:kh athag ho..21..
krodh agni bujhayva, nakho Kshama no nir ho. sukh pamo jyon shashvata, bhakh gaya Mahavir ho..22..
agam manhi anek chhai, krodh tana avadat ho. krodh taji ne Kshama karo, sau vatan ek bat ho..23..
sanvat atharahsai tresthe, vadi navmi somvar ho. ashvin mas ananda sun, bolya vachan vichar ho..24..
churu pur chavo ghano, varnan hadda vishal ho. rishi chandrabhan rude mane, jodi jugte dhal ho..25..