आदीश्वर करसी पारणो
Adishvar Karsi Parno
139
आदीश्वर करसी पारणो — Lyrics
आदीश्वर करसी पारणो
ए म्हारी राज-सहेल्यां! आज आदीश्वर करसी पारणो। म्हारी सखी सहेल्यां! पहला तीर्थंकर करसी पारणो।।ध्रुपद।। सारां पहली संयम लियो, धर ऋषभदेव वेराग। गावां नगरां विचरता कांई, भव जीवां रा भाग।।१।।
बारह घड़ी री छींकी दीनी, नहीं की पाछी सार। बारह घड़ी रा बारह मासा, मिल्यो न पाणी आर।।२।।
कर्म अन्तराय आड़ी फिरी कांई, फिरिया घर-घर द्वार। नाभि राजा रा नीका पोता, नहीं कीनी मनुहार।।३।।
गोरी तो गोखां खड़ी कांई, तड़के ऊभी पाछ। रोटी तो धामे नहीं कांई, नहीं बेरावै छाछ।।४।।
भर मोतियन को थाल ल्याई कांई, स्हामी सज सिणगार। हाथी, घोड़ा, रथ, पालकी, से कीनी मनुहार।।५।।
ज्याजां आई बारणे कांई, जाण्या श्रेयांस कुमार। अमोल नै देखने बांरै, हिवड़े हर्ष अपार।।६।।
एक सौ आठ घड़ा भर््या काई, मांहे छै रस ऊख। उलट भाव बहरावियो कांई मांडी प्रभुजी बूक।।७।।
देव-दुन्दभि बाज रही छै सोनेयां री बिरखा। बारह मास सूं कियो पारणो कांई, भागे भूख र तिरखा।।८।।
रिद्धि-सिद्धि दोय कामणियां, मिल गावै मंगलाचार। घर-घर हर्ष बधावणा कांई, आखा तीज तिवार।।९।।
नाभि राजा मोरां दे माता, रा ऋषभ कुल चन्द। श्रावक ऊभा वीनवै लयो वन्दन प्रथम जिणन्द।।१०।।
बाह्मी-सुन्दरी लीनो संजम दोन्यूं अकनकुंवार। कर्म खपा कर मुक्ति गया बांरो नाम लियां निस्तार।।११।।
गुरु गोविन्द दोनूं खड़ा काई किसके लागूं पांय। बलिहारी गुरु देव री म्हाने गोविन्द दिया बताय।।१२।।
दान शील तप भावना काई शिवपुर मारग च्यार। आराधो भल भाव स्यूं कांई ज्यूं ऊतरो भव पार।।१३।।
एक सौ आठ अठावन कांई लाडनूं शहर मझार। 'मघवा गणपति' जोड़ी वीनती हियड़ै हर्ष अपार।।१४।।
Roman Transliteration
adishvar karsi parno
e mhari raj-sahelyan! aj adishvar karsi parno. mhari sakhi sahelyan! pahla Tirthankar karsi parno..dhrupad.. saran pahli sanyam liyo, dhar Rishabhdev verag. gavan nagran vicharta kani, bhav jivan ra bhaga..1..
barah ghadi ri chhinki dini, nahin ki pachhi sar. barah ghadi ra barah masa, milyo n pani ara..2..
Karm antaray adi phiri kani, phiriya ghar-ghar dvar. nabhi raja ra nika pota, nahin kini manuhara..3..
gori to gokhan khadi kani, tadke ubhi pachh. roti to dhame nahin kani, nahin beravai chhachha..4..
bhar motiyan ko thal lyai kani, shami saj singar. hathi, ghoda, rath, palki, se kini manuhara..5..
jyajan ai barne kani, janya shreyans kumar. amol nai dekhne banrai, hivde harsha apara..6..
ek sau ath ghada bhar्ya kai, manhe chhai ras ukh. ulat bhav bahraviyo kani mandi prabhuji buka..7..
Dev-dundabhi baj rahi chhai soneyan ri birkha. barah mas sun kiyo parno kani, bhage bhukh r tirkha..8..
riddhi-siddhi doy kamniyan, mil gavai manglachar. ghar-ghar harsha badhavna kani, akha tij tivara..9..
nabhi raja moran de mata, ra Rishabh kul chanda. shravak ubha vinvai layo vandan pratham jinanda..10..
bahmi-sundari lino sanjam donyun akankunvar. Karm khapa kar mukti gaya banro nam liyan nistara..11..
Guru govinda donun khada kai kiske lagun pany. balihari Guru Dev ri mhane govinda diya bataya..12..
dan shil tap bhavna kai shivpur marag chyar. aradho bhal bhav syun kani jyun utaro bhav para..13..
ek sau ath athavan kani ladnun shahar majhar. 'Maghava ganapti' jodi vinti hiydai harsha apara..14..