विघ्न-हरण
अ. भी. रा. शि. को. उदारी हो, धर्ममूर्ति धुन धारी हो,
विघ्नहरण वृद्धिकारी हो, सुख संपत्ति दातारी हो ।
भजो मुनि गुणां रा भंडारी हो ।
1.भिक्षु भारीमाल ऋषिरायजी, खेतसीजी सुखकारी हो,
हेम हजारी आदि दे, सकल संत सुविचारी हो ।
प्रणहूं हर्ष अपारी हो ।।
2.दीपगणी दीपक जिसा, जयजश करण उदारी हो,
धर्म—प्रभावक महाधुनी, ज्ञान गुणां रा भण्डारी हो ।
नित प्रणमै नर—नारी हो ।।
3. सखर सुधारस सारसी, वाणी सरस विशाली हो,
शीतल चन्द सुहावणो, निमल विमल गुण न्हाली हो ।
अमीचंद अघ टाली हो ।।
4.उष्ण शीत वर्षा ऋतु समै, वर करणी विस्तारी हो,
तप जप कर तन तावियो, ध्यान अभिग्रह धारी हो ।
सुणतां इचरजकारी हो ।।
5.संत धनो आगे सुण्यो, ए प्रगट्यो इण आरी हो,
प्रत्यक्ष उद्योत कियो भलो, जाणै जिन जय कारी हो ।
ज्यांरी हूं बलिहारी हो ।।
6. धोरी जिन—शासन धुरा, अहोनिशि में अधिकारी हो,
परम दॄष्टि में परखियो, जबर विचारण थांरी हो ।
सुजश दिशा अनुसारी हो, प्रगट्यो ऋषि तूं भारी हो ।।
7. वृद्ध सहोदर जीत नों, जस धारी जयकारी हो,
लघु सहोदर सरूप नों, भीम गुणां रो भंडारी हो ।।
सखर सुजस संसारी हो ।।
8. समरण थी सुख संपजै, जाप जप्यां जस भारी हो,
मन वांछित मनोरथ फलै, भजन करो नर—नारी हो ।
वारूं बुद्धि विस्तारी हो ।।
9. रामसुख रलियामणो, तेसठ उदक आगारी हो,
अड़सठ पैंतालिस भला, बलि उगणीस चौविहारी हो ।
बड़ तपसी तपधारी हो ।।
10. मन दृढ़ बच दृढ़ महामुनि, शील दृढ़ सुविचारी हो,
परम विनीत पिछाणियो, श्रद्धा दृढ़ सुधारी हो ।
समरण सुखदातारी हो ।।
11. शिव वासी लावा तणो, तप गुण राशी उदारी हो,
आश्वासी निज आतमा, षटमासी लग धारी हो ।
शीतकाल मझारी हो, सह्यो शीत अपारी हो ।
12. उष्ण शिला तथा रेत नीं, आतापन अधिकारी हो,
तप वर्णन चौमासा तणो, सुणतां इचरजकारी हो ।
गुण निप्पण नाम भारी हो ।।
13. कोदर तप करड़ो कियो, षटमासी लग धारी हो,
ब्यावचियो मुनि बाल हो, छठ-छठ अठम उदारी हो ।
जावजीव जयकारी हो ।।
14. शीत—उष्ण बहु तप कियो, सुगुरु थकी इकतारी हो,
परम प्रीत पाळी मुनि, जाझी कीरत ज्यांरी हो ।
समरण सुख दातारी हो ।।
15. विघ्न मिटै अरियण हटै, प्रगटै सुख भारी हो,
‘दल रूप दोहग’ दारिद्र दटै, नाम रटै नर-नारी हो ।
एहवो भजन उदारी हो ।।
16.कर्म निर्जरा कारणै, जाप जपो नर—नारी हो,
निरवद्य कारज निरमलो, शिव सुख नो सहचारी हो ।
सावद्य आणा वारी हो ।।
17.भीम अमीचन्द मुनि भला, कोदर शिव वृद्धिकारी हो,
राम सुख रलियामणो, समण पंच सिरदारी हो ।
जाप परम जस धारी हो ।।
18.शिव मंगल सुख साहिबी, संपत सरस सुधारी हो,
अधिक आनन्द सुजस भलो, होवै हरष अपारी हो ।
एहवो भजन उदारी हो ।।
19.उदधि अग्नि अरि विष तणो, सकल विघ्न परिहारी हो,
सत्य—शील प्रभावे जिन कह्यो, दशमा अंग मझारी हो ।
तिमज भजन तंत सारी हो, परम मंत्र सम धारी हो ।।
20.तस्कर तास न पराभवै, चरश्चा में जयकारी हो,
भूत रोग आपद हरै, अघ दल रूप परिहारी हो ।
समरण महा सुखकारी हो ।।
21.चन्दपन्नती सूत्र नीं, गाथा द्वितीय विचारी हो,
तिमज भजन ए ऋषि तणो, अधिष्ठायक अधिकारी हो ।
थिर दृढ़ आसता थारी हो ।।
22.दवदन्ती सुरी दीपती, जयवन्ती जसधारी हो,
इन्द्राणी सुरी आदि दे, स्हाज करण सुखकारी हो । |
पुण्यवती प्यारी हो ।।
23.गुण ठाणे चोथे गुणी, समण—सत्यां हितकारी हो,
अ. सि. आ. उ. सा. नैं सदा, प्रणमै बारम्बारी हो ।
तास विचारणा भारी हो ।।
24. सिणगारांजी मोटी सती, हरखूजी हितकारी हो,
माता तास सुहामणी, अणसण चरण उदारी हो ।
आराध्यो हितकारी हो ।।
25. हिम्मतवान सती हुंती, व्यावच करण विचारी हो,
विघ्न हरण बच्छलकरी, दिल संपत्ति दातारी हो ।
जयजश हरष अपारी हो ।।
26. श्री जिन—शासन शोभतो, अधिष्ठायक अधिकारी हो,
अहोनिशि अवधि प्रजूझती, वंछित पूरण हारी हो ।
सुख संपत्ति सहचारी हो ।।
27. जाण तिके नर जाणता, अवर न जाणे लिगारी हो,
धर्म उद्योत करण धुरा, निरवद्य कारज सारी हो ।
आणा तास मझारी हो ।।
28. परम प्रीत सद्गुरु थकी, विडद वहै इकधारी हो,
पूरण आशा आसता, म्हारा मन मझारी हो ।
जबर दिशा जयकारी हो ।।
29. अधिक विनय गुण आगलो, थिर ढृढ़ आसता धारी हो,
तसु मिटवा जोग उपद्रव मिटै, ते अघ दल रूप परिहारी हो ।
निश्चय री बात न्यारी हो, न टलै होणहारी हो ।
जिम जिन अतिशय उदारी हो ।।
30. उगणीसै तेरे समै, वस्त पंचमी सोमवारी हो,
पंच ऋषि नो परवड़ो, स्तवन रच्यो तंत सारी हो ।
प्रसिद्ध शहर सिरियारी हो, गणपति ‘जयजश’ कारी हो ।।
31. विघ्न हरण नीं स्थापना, भिक्षु नगर मझारी हो,
महासुदि चवदश पुष दिने, कीधी हरष अपारी हो,
तास सीख बच धारी हो, तीरथ च्यार मझारी हो ।
ठाणां एकाणू तिवारी हो ।।
रचयिता : श्रीमज्जयाचार्य
लय : सो ही तेरापंथ पावै