[१६]

Roman Transliteration

[16] satya ki mahima aparampar. satya svayam Bhagwan rup hai, satya lok men sar..

sadachar sachai men ho, jiski gahri nishtha, usako milti sada samaj men, ijjat aur pratishtha. pata nahin kyon karta manav, chhalna ka vyavhar..

chhod saral path sachchai ka, karta rahe kutilta, usake angan men samriddhi ka, kalpavriksha kab phalta? chinta aur tanavon se, khulta durgati ka dvar..

sanch barabar tap nahin duja, tap n jhuth barabar, jake hirde sanch vahan par, sada viraje ishvar. nahin sanch ko anch kabhi bhi, jage ye sanskar..

krodh, lobh, bhay, hasya, vikath ke karan ye ban jate, bat-bat men jhuth bolte, kabhi nahin sakuchate. kho dete vishvas svayam ka, adat ke lachar..

kayik, vachik aur mansik rijuta ko jo sadhen, kathni-karni ki samanta, ko pal-pal aradhen. param-satya ka 'kanak' vahi kar pata sakshatkar.. [17]

chetan! tan ke mandir men tu tap ka dip jala, jivan bagiya men shanti ke phul khila..

agi men tap-tap kar svarna nikharta hai, pavan veg se badal svayam bikharta hai. tap-jal se dho chitta-chadriya ko kar le ujala..

agam, pitak, ved tap ke gun gate hain, tap se adbhut vibhutiyan rishi pate hain. samrangan men datakar shubh yogon ke tir chala..

mati ka tan, mati men mil jata hai, tap ke bal par jiv amar pad pata hai. jaga parakram 'kanak' saghan karmon ki shila hila..