सती राजीमती
Sati Rajimati
2490
सती राजीमती — Lyrics
सती राजीमती
राजीमती इम वीनवै, हो मुनिवर! मन चलियो तूं घेर। थोड़ा सुख नें कारणे, हो मुनिवर! क्यों हारे नर भव फेर।।१।।
पंच महाव्रत आदर्या, हो मुनि० मेरू जितरो भार। बमियां री बांछा करो, हो मुनि० लीधो संजम भार।।२।।
वैरागे मन बालने, हो मुनि० लीधो संजम भार। अब कायर होवे किसूं, हो मुनि० देख पराई नार।।३।।
राजपन्थ नै छोड़ने, हो मुनि० तूं उज्जड मत जाय। अमृत भोजन चाखनैं, हो मुनि० अब कूकस किम खाय।।४।।
गज असवारी छोड़नैं, हो मुनि० खर ऊपर मत बैस। स्वर्ग तणा सुख पायनैं, हो मुनि० पातालै मत पैस।।५।।
चंदन बाळ कोयला करै, हो मुनि० आंबो काट बबूल। कुण रोपै घर आंगणे, हो मुनि० काई थारी भूल।।६।।
घर-घर फिरस्यो गोचरी, हो मुनि० देखस्यो सुन्दर नार। हड़ नामा द्रुम नीं परे, हो मुनि० डिगतां न लागे बार।।७।।
बमिया ने बाछां करी, हो मुनि० गन्धन कुल मती होय। रत्न चिन्तामणि पायें, हो मुनि० कीचड़ में मती खोय।।८।।
कुल मोटो आपां तणो, हो मुनि० तिण साहमो तूं जोय। काम भोग तू बाछंसी, हो मुनि० भलो न कहसी कोय।।९।।
(लय : सुण सुण साधजी)
गोकल भण्डारी सारिखो, हो मुनि० हमाल उठायो भार। बोझ मजूरी अरथियो, हो मुनि० नहीं मालं सिरदार।।१०।।
घणो रूप नारी तणो, हो मुनि० वस्त्र गहणा सार। देख देख सीदावसी, हो मुनि० जासी जमारो हार।।११।।
मन गमता इन्द्री तणां, हो मुनि० सुख विलसे घर मांय। त्यागी अस्त्री न्यारो रहै, हो मुनि० त्यागी कह्यो जिनराय।।१२।।
आवै वैश्रमण देवता, हो मुनि० नल कुवेर नीं जात। सुपना में बांछू नहीं, हो मुनि० थांरी किसीक बात।।१३।।
जिहां तिहाई विचरसी, हो मुनि० नगरां ने बलि ग्राम। स्त्री देखी चित्त डोलसी, हो मुनि० नारी नरक नीं ठाम।।१४।।
सहु सरीखा तो घर नहीं, हो मुनि० न हुयै सरीखी नार। केई भूण्डा मैं केई भला, हो मुनि० चलियो जाय संसार।।१५।।
बाह्मी सुन्दरी बहनडी, हो मुनि० सतियां में सिरदार। करणी कर मुगते गई, हो मुनि० नाम लियां निस्तार।।१६।।
तीर्थंकर वावीसमा, हो मुनि० जग में मोटा सोय। बालपणे तज निसर्या, हो मुनि० बांधव साहमो जोय।।१७।।
नारी दुख नीं बेलडी, हो मुनि० नारी दुख नीं खान। इम जाणी ने चेतज्यो, हो मुनि० कहणो म्हारो मान।।१८।।
वचन सुणी राजुल तणां, हो मुनि० हियो ठिकाणै ल्यार। धन धन तु मोटी सती, हो मुनि० गई मुगत मझार हो।।१९।।
ए दोनूं उत्तम हुवा, हो मुनि० पाम्या केवलज्ञान। ए दोनूं उत्तम हुवा, हो मुनि० कोज्यो तिण रो ध्यान।।२०।।
संवत अठारै बावनै, हो मुनि० श्रावण मास मझार। चौथमल कहे पीपाडे, हो मुनि० सुदि पंचम मंगलवार।।२१।।
Roman Transliteration
sati Rajimati
Rajimati im vinvai, ho munivar! man chaliyo tun gher. thoda sukh nen karne, ho munivar! kyon hare nar bhav phera..1..
panch mahavrat adarya, ho muni0 meru jitro bhar. bamiyan ri banchha karo, ho muni0 lidho sanjam bhara..2..
vairage man balne, ho muni0 lidho sanjam bhar. ab kayar hove kisun, ho muni0 dekh parai nara..3..
rajapantha nai chhodne, ho muni0 tun ujjad mat jay. amrit bhojan chakhnain, ho muni0 ab kukas kim khaya..4..
gaj asavari chhodnain, ho muni0 khar upar mat bais. svarga tana sukh paynain, ho muni0 patalai mat paisa..5..
chandan bal koyla karai, ho muni0 ambo kat babul. kun ropai ghar angane, ho muni0 kai thari bhula..6..
ghar-ghar phirasyo gochri, ho muni0 dekhasyo sundar nar. had nama drum nin pare, ho muni0 digtan n lage bara..7..
bamiya ne bachhan kari, ho muni0 gandhan kul mati hoy. ratna chintamni payen, ho muni0 kichad men mati khoya..8..
kul moto apan tano, ho muni0 tin sahmo tun joy. kam bhog tu bachhnsi, ho muni0 bhalo n kahsi koya..9..
(lay : sun sun sadhji)
gokal bhandari sarikho, ho muni0 hamal uthayo bhar. bojh majuri arathiyo, ho muni0 nahin malam sirdara..10..
ghano rup nari tano, ho muni0 vastra gahna sar. dekh dekh sidavsi, ho muni0 jasi jamaro hara..11..
man gamta indri tanan, ho muni0 sukh vilse ghar many. tyagi astri nyaro rahai, ho muni0 tyagi kahyo jinraya..12..
avai vaishraman devta, ho muni0 nal kuver nin jat. supna men banchhu nahin, ho muni0 thanri kisik bata..13..
jihan tihai vicharsi, ho muni0 nagran ne bali gram. stri dekhi chitta dolsi, ho muni0 nari narak nin thama..14..
sahu sarikha to ghar nahin, ho muni0 n huyai sarikhi nar. kei bhunda main kei bhala, ho muni0 chaliyo jay sansara..15..
bahmi sundari bahandi, ho muni0 satiyan men sirdar. karni kar mugte gai, ho muni0 nam liyan nistara..16..
Tirthankar vavisma, ho muni0 jag men mota soy. balapne taj nisarya, ho muni0 bandhav sahmo joya..17..
nari dukh nin beldi, ho muni0 nari dukh nin khan. im jani ne chetajyo, ho muni0 kahno mharo mana..18..
vachan suni rajul tanan, ho muni0 hiyo thikanai lyar. dhan dhan tu moti sati, ho muni0 gai mugat majhar ho..19..
e donun uttam huva, ho muni0 pamya kevalajnan. e donun uttam huva, ho muni0 kojyo tin ro dhyana..20..
sanvat atharai bavnai, ho muni0 shravan mas majhar. chauthamal kahe pipade, ho muni0 sudi pancham mangalvara..21..