सुगणा! ध्यावो रे,
Sugna! Dhyavo Re,
2512
सुगणा! ध्यावो रे, — Lyrics
सुगणा! ध्यावो रे, वर भिक्खण गुरु रो नाम धरातल चावो रे। भिक्खण गुरु ध्यायां अजरामर पद पावो रे।।
१. श्री जिनशासन में स्थिर शासन भिक्षू आसन-धारी रे। मिथ्या-ध्वांत विनाशन भासन वाण सुधाशन प्यारी रे।।
२. मरुधर देश कंटालिय मांही भिक्ष् गुरु अवतरियों रे। धन्य-धन्य दीपांदे जननी सुत वर उदरे धरियो रे।।
३. है तंयासी जन्म, द्रव्य दीक्षा अष्टादश आठे रे। पोल लखी अष्टादश सतरै, छोड़ चल्या सुध वाटे रे।।
४. दान दया आज्ञा अनुकम्पा सावद निरवद सीध्या रे। दृढ़ आचार-विचार-वीथि स्यूं नेक भव्य प्रतिबोध्या रे।।
५. मिथ्या-मत रो खंड-खंड करवा धृति-खंडो झाल्यो रे। संयम-पाखर मंड वीर-आणा-डंडो ग्रहि चाल्यो रे।।
६. समय-सेन जिन वैन एन सायक वर्षा बर्षई रे। वीर विवेक अबाध देख प्रतिपखियां धृति धर्राई रे।।
७. आगम रेस अनोप तोप कुमत्यां को किल्लो तोड़बो रे। विविध-भांत दृष्टांत-शांत शस्त्रां मिथ्या-दल मोड़दों रे।।
८. वन में वृक वराह स्थाल सूकर सांभर शश चीता रे। मृग मतंग मन रंग रमै पर मृगपति स्यूं रहै बी'ता रे।।
९. जग-कानन में मृग-पाखंडी मन माने ज्यूं जंपै रे। भिक्षु-वचन हरि-हाक सुणे जब कोर ककेजा कंपे रे।।
दारू दाखां रो
१०. धन्य-धन्य भिक्षू री बुद्धि अनुपम नींव जमाई रे। बत्तीसै गुणसट्ठै वर्ष लिखत लिख्यो सुखदाई रे।।
११. भारमल्ल-आणा में रहिणो शिष-शिषणी बलि करणा रे। शेषकाल-चउमास विचरणो भिक्षुवचन उर धरणा रे।।
१२. अन्य ग्राम में दीक्षा आप तो पिण आणी सूंपो रे। सदाकाल गुरु-आण अराधो मुनि-अज्जा धर चूंपो रे।।
१३. भेख-धार शिष-शिषणी फांटे करै मांहो-मां कजिया रे। एक-एक रा अवगुण बोले नाणै किंचित लजिया रे।।
१४. एहवा चिह्न देखी ने स्वामी जिनशासन हितकामी रे। मुनि-मारग सुध रीत चलावण की मर्याद अमामी रे।।
१५. भारिमाल स्वेच्छा स्यूं गुरु-भाई चेला नै आपै रे। युवपद तास आण परमाण करेवी थिर चित थापै रे।।
१६. अशुभ कर्म रै योग एक दो आदी जो अवनीतो रे। शासन छोड़ खोड़ में पड़तां अवगुण लवै वदीतो रे।।
१७. बक-ध्यानी अभिमानी जिण नै तीर्थ विषे नहिं गिणवो रे। पूजा-श्लाघा करै तास जिन-आज्ञा बाहिर भणवो रे।।
१८. गण बाहिर हो मुनि समणी रा अवगुण अंश म बोलो रे। हूंता अणहूंता बोलण रा त्याग साख सिध तोलो रे।।
१९. इण श्रद्धा रा क्षेत्र विषे इक निशि उपरांत न रहणो रे। कारण स्यूं पिण रहै, विगय-परित्याग-माग में वहणो रे।।
२०. वस्त्र-पात्र अरु पुस्तक पानां लिखै जाचै गण मांही रे। ते सारा गणि-निश्चित जाणी संग लेवणां नांही रे।।
२१. इत्यादिक बहु बोल तणी मर्यादा खूब दूढ़ाई रे। सकल श्रमण-गण आरै करि नै लिखत लिख्यो गणराई रे।।
२२. शरमा-शरमी बलि गरमी रो काम रती भर नाहीं रे। दृढधर्मी नर्मी दिल राखी लिखते लिख्यों गणराई रे।।
२३. अष्टादश गुणसठ माघ सित सप्तमि वासर वारू रे। भिक्षूकर रो लिखते पछै मुनिवर हस्ताक्षर चारू रे।।
२४. तस बीजै पट भारिमाल जस भाल विशाल दिदारू रे। गुण-मणि-माल चाल गय वर सम विश्रम-जाल-विदारू रे।।
२५. संघराज ऋषिराज राज जस राज लखी शरमाणो रे। लाज साज तिण ही रयणी में अंग अर्ध परमाणों रे।।
२६. तूर्यपाट जय समय-समय पय समय-सुरभि रो पायो रे। अति उद्यत निर्भय जय करिवा अभय समय सरसायोरे।।
२७. मधवा-तोर जोर लख मघवा दोर-दोर झट चाल्यो रे। ओर ठोर अवकाश न पाम्यो स्वर्गवास निज भाल्यो रे।।
२८. माणक जग जाहिर जाणक मुख माणक सत्य कहायो रे। तसु माणकता निरखी माणक प्रस्तर रूप लखायो रे।।
२९. डालचंद-वदनारविंद रो वच-मकरंद सुहायो रे। पान करन सानंद सदा भविं-भ्रमर-वृन्द लोभायो रे।।
३०. मूल-नंद मुख-चंद चंद-निरखण धरियो अनुरागो रे। प्रभु मुख-चंद चंदता निरखी मंद थवा पुनि लागो रे।।
३१. उगणीसे चोराणूं वर्षे माघमहोचछब मेका रे। च्यार तीर्थ रा झंड जबर गंगाशहरे रंगरेछा रे।।
३२. संत सवा सौ श्रमणी बे शत एकबीस सुखदायो रे। भिक्षूशासन जोर-तोर अति दिन-दिन अधिक सवायो रे।।
Roman Transliteration
sugna! dhyavo re, var bhikkhan Guru ro nam dharatal chavo re. bhikkhan Guru dhyayan ajaramar pad pavo re..
1. shri jinshasan men sthir shasan bhikshu asan-dhari re. mithya-dhvant vinashan bhasan van sudhashan pyari re..
2. marudhar desh kantaliy manhi bhiksh Guru avatriyon re. dhanya-dhanya dipande janni sut var udare dhariyo re..
3. hai tanyasi janma, dravya diksha ashtadash athe re. pol lakhi ashtadash satrai, chhod chalya sudh vate re..
4. dan daya ajna anukampa savad niravad sidhya re. dridh achar-vichar-vithi syun nek bhavya pratibodhya re..
5. mithya-mat ro khand-khand karva dhriti-khando jhalyo re. sanyam-pakhar mand vir-ana-dando grahi chalyo re..
6. samay-sen Jin vain en sayak varsha barshai re. vir vivek abadh dekh pratipkhiyan dhriti dharrai re..
7. agam res anop top kumatyan ko killo todbo re. vividh-bhant drishtant-shant shastran mithya-dal moddon re..
8. van men vrik varah sthal sukar sambhar shash chita re. mrig matang man rang ramai par mrigapti syun rahai bi'ta re..
9. jag-kanan men mrig-pakhndi man mane jyun jampai re. Bhikshu-vachan hari-hak sune jab kor kakeja kampe re..
daru dakhan ro
10. dhanya-dhanya bhikshu ri buddhi anupam ninv jamai re. battisai gunasatthai varsha likhat likhyo sukhdai re..
11. bharamalla-ana men rahino shish-shishni bali karna re. sheshkal-chaumas vicharno bhikshuvachan ur dharna re..
12. anya gram men diksha ap to pin ani sumpo re. sadakal Guru-an aradho Muni-ajja dhar chumpo re..
13. bhekh-dhar shish-shishni phante karai manho-man kajiya re. ek-ek ra avagun bole nanai kinchit lajiya re..
14. ehava chihna dekhi ne Swami jinshasan hitkami re. Muni-marag sudh rit chalavan ki maryad amami re..
15. bharimal svechchha syun Guru-bhai chela nai apai re. yuvapad tas an parman karevi thir chit thapai re..
16. ashubh Karm rai yog ek do adi jo avanito re. shasan chhod khod men padtan avagun lavai vadito re..
17. bak-dhyani abhimani jin nai tirtha vishe nahin ginvo re. puja-shlagha karai tas Jin-ajna bahir bhanvo re..
18. gan bahir ho Muni samni ra avagun ansh m bolo re. hunta anahunta bolan ra tyag sakh sidh tolo re..
19. in shraddha ra kshetra vishe ik nishi uparant n rahno re. karan syun pin rahai, vigay-parityag-mag men vahno re..
20. vastra-patra aru pustak panan likhai jachai gan manhi re. te sara gani-nishchit jani sang levnan nanhi re..
21. ityadik bahu bol tani maryada khub dudhai re. sakal shraman-gan arai kari nai likhat likhyo ganrai re..
22. sharma-sharmi bali garmi ro kam rati bhar nahin re. dridhadharmi narmi dil rakhi likhte likhyon ganrai re..
23. ashtadash gunasath magh sit saptami vasar varu re. bhikshukar ro likhte pachhai munivar hastakshar charu re..
24. tas bijai pat bharimal jas bhal vishal didaru re. gun-mani-mal chal gay var sam vishram-jal-vidaru re..
25. sanghraj rishiraj raj jas raj lakhi sharmano re. laj saj tin hi rayni men ang ardha parmanon re..
26. turyapat jay samay-samay pay samay-surbhi ro payo re. ati udyat nirbhay jay kariva abhay samay sarsayore..
27. madhva-tor jor lakh Maghava dor-dor jhat chalyo re. or thor avakash n pamyo svargavas nij bhalyo re..
28. Manak jag jahir janak mukh Manak satya kahayo re. tasu manakta nirkhi Manak prastar rup lakhayo re..
29. dalachand-vadnaravind ro vach-makarand suhayo re. pan karan sanand sada bhavin-bhramar-vrinda lobhayo re..
30. mul-nand mukh-chand chand-nirakhan dhariyo anurago re. Prabhu mukh-chand chandta nirkhi mand thava puni lago re..
31. uganise choranun varshe maghamhochachhab meka re. chyar tirtha ra jhand jabar gangashahre rangrechha re..
32. sant sava sau shramni be shat ekabis sukhdayo re. bhikshushasan jor-tor ati din-din adhik savayo re..