गौतम-कुलकं

लुद्धा नरा अत्थपरा हवंति, मूढा नरा कामपरा हवंति। बुद्धा नरा खंतिपरा हवंति, मिस्सा नरा तिण्णि वि आयरंति।।

ते पण्डिया जे विरयाविरोहे, ते सत्तिणो जे न चलंति धम्मं। ते साहुणो जे समयं चरंति, ते बांधवा जे वसिणो हवंति।।

कोहाभिभूया न सुहं लहंति, माणासिणो सोयपरा हवति। मायाविणो हुंति परस्स पेस्सा, लोभामहिच्छा णरयं उवेति।।

कोहो विसं कि अमयं अहिंसा, माणो अरी किं हियमप्पमाओ। माया भयं किं सरणं तु सच्चं, लोहो दुहं किं सुहमाहु तुट्ठी।।

बुद्धी अचंडं भयए विणीयं, कुद्धं कुसीलं भयए अकित्ती। संभिण्णचित्तं भयए अलच्छी, सच्चेट्ठियस्स भयए सिरी य।।

चयंति मित्ताणि नरं कयग्घं, चयंति पावाइ मुणिं जयंतं। चयंति सुक्काणि सराणि हंसा, चएइ बुद्धी कुवियं मणुस्सं।।

अईय-अत्थे कहिए विलावो, असंपहारे कहिए विलावो। विक्खित्तचित्ते कहिए विलावो, बहू कुसीसे कहिए विलावो।।

दुट्ठाहिवा दंडपरा हवंति, विज्जाहरा मंतपरा हवंति। मुक्खा नरा कोवपरा हवंति, सुसाहुणो तत्तपरा हवंति।।

सोहा भवे उग्गतवस्स खंती, समाहिजोगोवसमस्स सोहा। णाणं सुझाणं चरणस्स सोहा, सीसस्स सोहा विणए पवित्ती।।

अभूसणो सोहइ बंभयारी, अकिंचणो सोहइ दिक्खधारी। बुद्धिजुओ सोहइ रायमंती, लज्जाजुया सोहइ एगपत्ती।।

अप्पा अरी होइ अणवट्ठियस्स, अप्पा जसो सीलमओ नरस्स। अप्पा दुरप्पा अणवट्ठियस्स, अप्पा जियप्पा सरणं गई य।।

न धम्मकज्जं परमत्थि कज्जं, न पाणहिंसा परमं अकज्जं। न पेमरागा परमत्थि बंधो, न बोहिलाभा परमत्थि लाभो।

न सेवियव्वा पमया परक्का, न सेवियव्वा पुरिसा अविज्जा। न सेवियव्वा अहमा निहिण्णा, न सेवियव्वा पिसुणा मणुस्सा।।

जे धम्मिया ते खलु सेवियव्वा, जे पंडिया ते खलु पुच्छियव्वा। जे साहवो ते अभिवंदियव्वा, जे णिम्ममा ते पडिलाभियव्वा।।

पुत्ता य सीसा य समं विभत्ता, रिसी य देवा य समं विभत्ता। मुक्खा तिरिक्खा य समं विभत्ता, माया दरिद्दा य समं विभत्ता।।

सव्वं कलं धम्मकला जिणाइ, सव्वं कहं धम्मकहा जिणाइ। सव्वं बलं धम्मबलं जिणाइ, सव्वं सुहं धम्मसुहं जिणाइ।।

सव्वं बलं धम्मबलं जिणाइ, सव्वं सुहं धम्मसुहं जिणाइ।। मज्जे पसत्तस्स जसस्स नासो, वेसापसत्तस्स कुलस्स नासो।।

हिंसा पसत्तस्स सुधम्मनासो, चोरी-पसत्तस्स सरीर-नासो। तहा परत्थी—सुपसत्तयस्स, सव्वस्स नासो अहमा गई यी

दाणं दरिद्दस्स पहुस्स खंती, इच्छाणिरोहो य सुहोइयस्स। तारुण्णए इंदियणिग्गहो य, चत्तारि एयाणि सुदुक्कराणि।।

असासयं जीवियमाहु लोए, धम्मं चरे साहुजणोवइट्ठं। धम्मो य ताणं सरणं गई य, धम्मं निसेवित्तु सुहं लहंति।।