खिम्या कियां सुख पामिये
Khimya Kiyan Sukh Pamiye
1273
खिम्या कियां सुख पामिये — Lyrics
खिम्या कियां सुख पामिये
खिम्या धर्म पहिलो खरो, इम भाख्यो जगदीशो रे, जो सुख चाहो जीव नो, मत करज्यो कोई रीसो रे। खिम्या कियां सुख पामिये।।१।।
कलह कदे आछी नहीं, लड़तां लिछमी न्हासै रे। दु:ख दारिद्र घर में धसै गुण रा पुंज विणासै रे।।२।।
कोई वचन करड़ो कहै, अथवा आघो नैं पाछो रे। खिम्यां कियां तिण जीव रै, आगै ही फल छै आछो रे।।३।।
कूंजड़ ज्यू लड़बो करै, नीच घरां रा बागा रे। ते किस्या मिनखां में मिनख छै, त्यानैं पहरियां ही कहीजै नागा रे।।४।।
रीस कटारी ले मरै, फांसी लेवै छूरी खावै रे। केई कूवां बावड़ी पड़ै, केई प्रदेशा उठ ज्यावै रे।।५।।
बाप-बेटो सास-बहू, गुरु-चेलो नै गुरु भाई रे। क्रोध तणे वश उछलै, न गिणै नेड़ी सगाई रे।।६।।
गुरु माईत गिणै नहीं, अवनीत अवगुणगारो रे। छांदै चालै आपणौ, विरच्यां करै बिगाड़ो रे।।७।।
गुरु काढ़ै गच्छ बाहिरै, बाप काढ़ै घर बारै रे। लोकां में फिट फिट हुवै, यूं ही नर भव हारै रे।।८।।
पंडित ही क्रोधे चढ़ै, कहिये बाल अज्ञानी रे। नीच चण्डाल नीं ओपमा, दीधी छै केवलज्ञानी रे।।९।।
(लय : शल्य कोई मत राखज्यो)
घर में एक क्रोधी हुवै, सगलां नै तलतलावै रे। जिण घर में क्रोधी घणां, तिणरो दु:ख किम जावै रे।।१०।।
तप जप कोड़ पूरव तणो, क्रोधी खिण में खोवै रे। ते खिम्यां कियां जश गुण वधै, ते पंथ विरला जोवै रे।।११।।
बूढ़ो ही चिड़तो रहे लखण छोरा रा थावै रे। बालक ही खिम्यां कियां बड़ो माणस कुहावै रे।।१२।।
तप जप सर्व जुध सोहिलो, पिण स्वभाव मारणो दोरो रे। पर नैं परचावै घणो, पिण आपो खोजै ते थोड़ो रे।।१३।।
गाळ बरतीजै राड़ में, पिण लाडू नांय बंटीजै रे। बाहला पिण बेरी हुवै, इसड़ो काम न कीजै रे।।१४।।
Roman Transliteration
khimya kiyan sukh pamiye
khimya Dharm pahilo kharo, im bhakhyo jagdisho re, jo sukh chaho jiv no, mat karajyo koi riso re. khimya kiyan sukh pamiye..1..
kalah kade achhi nahin, ladtan lichhmi nhasai re. du:kh daridra ghar men dhasai gun ra punj vinasai re..2..
koi vachan kardo kahai, athava agho nain pachho re. khimyan kiyan tin jiv rai, agai hi phal chhai achho re..3..
kunjad jyu ladbo karai, nich gharan ra baga re. te kisya minkhan men minakh chhai, tyanain pahriyan hi kahijai naga re..4..
ris katari le marai, phansi levai chhuri khavai re. kei kuvan bavdi padai, kei pradesha uth jyavai re..5..
bap-beto sas-bahu, Guru-chelo nai Guru bhai re. krodh tane vash uchhalai, n ginai nedi sagai re..6..
Guru mait ginai nahin, avanit avagungaro re. chhandai chalai apanau, virachyan karai bigado re..7..
Guru kadhai gachchha bahirai, bap kadhai ghar barai re. lokan men phit phit huvai, yun hi nar bhav harai re..8..
pandit hi krodhe chadhai, kahiye bal ajnani re. nich chandal nin opama, didhi chhai kevalajnani re..9..
(lay : shalya koi mat rakhajyo)
ghar men ek krodhi huvai, saglan nai talatlavai re. jin ghar men krodhi ghanan, tinro du:kh kim javai re..10..
tap jap kod purav tano, krodhi khin men khovai re. te khimyan kiyan jash gun vadhai, te panth virla jovai re..11..
budho hi chidto rahe lakhan chhora ra thavai re. balak hi khimyan kiyan bado manas kuhavai re..12..
tap jap sarva judh sohilo, pin svabhav marno doro re. par nain parchavai ghano, pin apo khojai te thodo re..13..
gal bartijai rad men, pin ladu nany bantijai re. bahla pin beri huvai, isado kam n kijai re..14..