बड़ी साधुवंदना
Badi Sadhuvandna
377
बड़ी साधुवंदना — Lyrics
बड़ी साधुवंदना
नमूं अनन्त चौबीसी, ऋषभादिक महावीर। आर्य क्षेत्र मां, घाली धर्म नो सीर।।१।।
महा अतुल बली नर, शूरवीर नैं धीर। तीर्थ प्रव्रतावी पहोंता भवजल तीर।।२।।
सीमंधर प्रमुख, जघन्य तीर्थंकर बीस। छै अढीद्वीप मा, जयवता जगदीश।।३।।
एक सौ ने सित्तर, उत्कृष्ट पदे जगदीश। धन्य मोटा प्रभुजी, जेहने नमावूं शीश।।४।।
केवली दोय कोड़ी, उत्कृष्टा नव क्रोड़। मुनि दोय सहस्र कोड़ी, उत्कृष्ट नव सहस्र कोड़।।५।।
विचरै छै विदेहै, मोटा तपसी घोर। भावे करि वंदू, टाले भव नीं खोड़।।६।।
चौबीसे जिन नां, सघला ए गणधार। चवदैसौ ने बावन, ते प्रणमूं सुखकार।।७।।
जिन-शासन-नायक, धन्य श्री वीर जिणंद। गौतमादिक गणधर, बर्त्ताव्यो आणंद।।८।।
श्री ऋषभदेव नां, भरतादिक सौ पूत। वैराग्य मन आणी, संयम लियो अद्भूत।।९।।
केवल उपजायो, करि करणी करतूत। जिनमत दीपायो, सघला मोक्ष पहूंत।।१०।।
(लय : सुख कारण भवियण)
श्री भरतेश्वर ना, हुवा पटोधर आठ। आदित्य जशादिक, पहोंता शिवपुर बाट।।११।।
श्री जिन अन्तर ना, हुवा पाट असंख। मुनि मुक्ति पहोंता, टाली कर्म नो बंक।।१२।।
धन्य कपिल मुनीश्वर, नमी नमूं अणगार। जेणे तत्क्षण त्याग्यो, सहस्र रमणी परिवार।।१३।।
मुनिवर हरिकेशी, चित्त मुनीश्वर सार। शुद्ध संयम पाली, पाम्या भव नो पार।।१४।।
बलि इखुकार राजा, घर कमलावती नार। भग्गू नैं जशा, तेहनां दोय कुमार।।१५।।
छति ऋद्धि छांडी नैं, लीधो संयम भार। इम अल्प काल मां, पाम्या मोख दुवार।।१६।।
बलि संजती राजा, हिरण आहिड़े जाय। मुनिवर गदभाली, आण्यो मारग ठाय।।१७।।
चारित्र लेई नैं, भेंट्या गुरु नां पाय। क्षत्री राजऋषीश्वर, चर्चा करी चित्त लाय।।१८।।
बलि दशूं चक्रवर्ती, राज्य रमणी ऋद्धि छोड़। दश मुक्ति पहोंता, कुल ने शोभा चोड़।।१६।।
इण अवसर्प्पिणी मां, आठ राम गया मोख। बलभद्र मुनीश्वर, गया पंचम देवलोक।।२०।।
दशार्णभद्र राजा, वीर वाद्या धरि मान। पछे इन्द्र हटायो, दियो छह काय अभयदान।।२१।।
करकंडू प्रमुख, च्यारूं प्रत्येक बुद्ध। मुनि मुक्ति पहुंच्या, जीत्या कर्म महा जुद्ध।।२२।।
धन्य मोटा मुनिवर, मृगापुत्र जगीश। मुनिवर अनाथी, जीता राग नै रीस।।२३।।
बलि समुट्रपाल मुनि, राजमती रहनेम। केशी नैं गौतम, पाम्या शिवपुर सेम।।२४।।
धन्य विजयघोष मुनि, जयघोष बलि जाण। श्री गर्गाचार्य, पहुंच्या छै निर्वाण।।२५।।
श्री उत्तराध्ययन मा, जिनवर किया बखाण। शुद्ध मन सूं ध्यावो, मन में धीरज आण।।२६।।
बली खन्धक संन्यासी, राच्यो गौतम स्नेह। महावीर समीपे, पंच ,महाव्रत लेह।।२७।।
तप कठिन करीनै झोखी अपणी देह। गया अच्युत देवलोके, चवलेसी भव छेह।।२८।।
बलि ऋषभदत्त मुनि, सेठ सुदर्शण सार। शिवराज ऋषीश्वर, धन्य गांगेय अणगार।।२९।
शुद्ध संयम पाली, पाम्या केवल सार। ए चारूं मुनिवर, पहुंच्या मोक्ष मझार।।३०।।
भगवन्त नीं माता, धन्य धन्य सति देवानन्दा। बलि सती जयन्ती, छोड़ दिया घर फन्दा।।३१।।
सति मुक्ती पहुंची, बलि ते वीर नैं वन्द। महासती सुदर्शना, घणी सतियां नां वृन्द।।३२।।
बलि कार्तिक सेठे, पड़िमा ग्रही शूरवीर। जिम्यो मोरा ऊपर, तापस बलती खीर।।३३।।
पछी चारित्र लीधुं, मित्र एक सहंस अठ धीर। मरी हुआ शुक्रेंद्र, चव लेसी भव तीर।।३४।।
बलि राय उदाइ, दियो भाणेजा राज। पछी चारित्र लेई, सार्या आतम काज।।३५।।
गंगदत्त मुनि आनन्द, तारणतरण जिहाज। मुनि कोशलजी हो, दियो घणां नैं साज।।३६।।
धन्य सुनक्षत्र मुनिवर, सर्वानुभूति अणगार। आराधक हुई नैं, गया देवलोक मझार।।३७।।
चवि मुक्ती जासे, बलि सिंह मुनीश्वर सार। बीजा पण मुनिवर, भगवती में अधिकार।।३८।।
श्रेणिक नो बेटो, मोटो मुनिवर मेघ। तजी आठ अन्तेउर, आण्यो मन संवेग।।३९।।
वीर पै व्रत लेई नैं, बांधी तप नीं तेग। गया विजय विमाणे, चव लेसी शिव वेग।।४०।।
धन्य थावच्चा पुत्र, तजी बत्तीसूं नार। तेह साथे निकल्या, पुरुष एक हजार।।४१।।
सुकदेव सन्यासी, एक सहस्र शिष्य लार। पांचसौ सूं सेलक, लीधो संयम भार।।४२।।
सर्व सहस्र अढ़ाई, घणा जीवा नै तार। पुंडरीक गिरि ऊपर, कियो पादोपगम संथार।।४३।।
आराधक होई, कोधो खेवो पार। हुआ मोटा मुनिवर, नाम लिया निस्तार।।४४।।
धन्य जिनपाल मुनीश्वर, दोय जणा हुआ साध। गया प्रथम देवलोके, मोक्ष जासे आराध।।४५।।
श्री मल्लि नां छह मित्र, महाबल प्रमुख मुनिराय। सर्व मुक्ति सिधाव्या, मोटी पदवी पाय।।४६।।
बलि जितशत्रु राजा, सुबुद्धि नामे प्रधान। पोते चारित्र लेईनै, पाम्या मोक्ष निधान।।४७।।
धन्य तेतली मुनिवर, दियो छह काय अभयदान। पोटिला प्रतिबोध्या, पाम्यो केवल ज्ञान।।४८।।
धन्य पांचूं पांडव, तजी द्रौपदी नार। स्थविरां नीं पासे, लीधो संयम भार।।४९।।
श्री नेमि वंदण नो, एहवो अभिग्रह कीध। मास-मासखमण तप, शत्रुञ्जय जई सीध।।५०।।
धर्मघोष तणों शिष्य, धर्मरुची अणगार। कोड्यां नीं करुणा, करी दया दिल धार।।५१।।
कडुआ तुंबा नों, कीधो सघलो आहार। सर्वार्थ सिद्ध पहोंता, चव लेसी भवपार।।५२।।
बलि पुंडरीक राजा, कुंडरीक डिगियो जाण। पोते चारित्र लेई नैं, घाली धर्म मां हाण।।५३।।
सर्वार्थ सिद्ध पहोंता, चव लेसी निर्वाण। श्री ज्ञाता सूत्र में, जिनवर कर्या बखाण।।५४।।
गौतमादिक कुमरां, सगा अठारै भ्रात। सर्व अन्धक वृष्णी-सुत, धारणी ज्यांरी मात।।५५।।
तजी आठ अन्तेउर, काढ़ी दीक्षा नीं बात। चारित्र लेईनैं, कीधो मुनि नो साथ।।५६।।
श्री अनीक सेनादिक, छऊं सहोदर भाय। वसुदेव नां नन्दन, देवकी ज्यांरी माय।।५७।।
भद्दिलपुर नगरी, नाग गाहावई जाण। सुलसां घर बधिया, सांभल नेमि नी बाण।।५८।।
तजी बत्तीस-बत्तीस अन्तेउर, निकलिया छिटकाय। नल कुबेर समाणा, भेंट्या नेमि नां पाय।।५९।।
करी छठ-छठ पारण, मन में वैराग्य लाय। एक मास संथारे, मुक्ति विराज्या जाय।।६०।।
बलि दारुण सारण, सुमुख दुमुख मुनि राय। बलि कुमर अनादृत, गया मुक्तिगढ़ माय।।६१।।
बसुदेव नां नन्दन, धन्य-धन्य गजसुकुमाल। रूपे अति सुंदर, कलावन्त वय वाल।।६२।।
श्री नेमि समीपे, छोड्यो मोह जजाल। भिक्षु नीं पड़िमा, ग्रही मशाण महाकाल।।६३।।
देखी सोमिल कोप्यो, मस्तक बांधी पाल। खेरी ना खीरा, सिर ठविया असराल।।६४।।
मुनि नजर न खडी, मेटी मन नीं झाल। परीषह सहीनैं, मुक्ति गया तत्काल।।६५।।
धन्य जाली मयाली, उवयालादिक साध। संबुक नैं प्रद्युम्न, अनिरुद्ध साधु अगाध।।६६।।
बलि सचनेमि दृढनेमि, करणी कोधी निरबाध। दशे मुक्ती पहुंता, जिनवर बच आराध।।६७।
धन्य अर्जुनमाली, कर्यो कदाग्रह दूर। वीर पै व्रत लेई नैं, सत्यवादी हुआ शूर।।६८।।
करी छठ छठ पारण, क्षमा करी भरपूर। छह मासे मांही, कर्म किया चकचूर।।६९।।
कुमर अइमुत्ते, दीठा गौतम स्वाम। सुणी वीर नी वाणी, कीधो उत्तम काम।।७०।।
चारित्र लेई नै, पहोंता शिवपुर ठाम। धुर आदि मकाई अन्त अलक्क मुनि नाम।।७१।।
बलि कृष्णराय नीं, अग्रमहिशी आठ। पुत्रबहू दोया, संच्या पुण्य नां ठाट।।७२।।
यादव कुल सतियां, टाली दु:ख ओचाट। पहोंती शिवपुर में, ए छै सूत्र नों पाठ।।७३।।
श्रेणिक नीं राणी, काली आदिक दश जाण। दशे पुत्र वियोगे, सांभली वीर नीं बाण।।७४।।
चन्दनबाला पै, संयम लेई जाण। तप करि देह झोखी, पहोंती छै निर्वाण।।७५।।
नन्दादिक तेरह, श्रेणिक नृप नीं नार। चन्दनबाला पै, लीधो संजम भार।।७६।।
एक मास संथारे, पहोती मुक्ति मझार। ए नवूं जणां नो, अन्तगड़ मां अधिकार।।७७।।
श्रेणिक ना बेटा, जालिआदिक तेवीस। वीर पै ब्रत लेई नैं; पाल्यो विश्वावीस।।७८।।
तप कठिन करी नैं, पूरी मन जगीश। देवलोके पहोता, मोक्ष जासे तज रीस।।७९।।
काकंदी नो धन्नो, तजी बत्तीसूं नार। महावीर समीपे, लीधो संजम भार।।८०।।
करी छठ छठ पारण, आंबिल उज्झित आहार। श्री वीर बखाण्यो, धन्य धन्नो अणगार।।८१।।
एक मास संथारे, सर्वार्थसिद्ध पहोंत। महाविदेह क्षेत्र मां, करसे भव नों भगवंत।।८२।।
धन्ना नीं रीते, हुवा नवूं ही संत। श्री अनुत्तरोववाई मां, भाख गया भगवंत।।८३।।
सुबाहू प्रमुख, पाच-पांच-सौ नार। तजि वीर पै लीधा, पंच महाव्रत सार।।८४।।
चारित्र लेई नैं, पाल्यो निरतिचार। देवलोके पहोंता, सुखविपाक-अधिकार।।८५।।
श्रेणिक नां पोत्रा, पौमादिक हुवा दश। वीर पै व्रत लेई, काढ्यो देही नों कस।।८६।।
संजम आराधी, देवलोक मा जई वस। महाविदेह क्षेत्र मां, मोक्ष जासे लेई जश।।८७।।
बलभद्र नां नन्दन, निषधादिक हुवा बार। तजी पचास अन्तेउर, त्याग दियो संसार।।८८।।
सहु नेभि समीपे, चार महाव्रत लीध। सर्वार्थसिद्ध: पहोंता, होसे विदेहे सीध।।८९।।
धन्नो नैं सालीभद्र, मुनीसरो' नीं जोड़। नारी रा बन्धन, तत्क्षण न्हाख्या तोड़।।९०।।
तज कुटुम्ब कबीलो, धन कंचन नीं कोड़।, मास-मासखमण तप, टालसे भवां नीं खोड़।।९१।।
श्री सुधर्म स्वामी नां, शिष्य धन्य जम्बू स्वाम। तजी आठ अन्तेउर, मातपिता धन धाम।।९२।।
प्रभवादिक तारी, पहोंता शिवपुर ठाम। सूत्र प्रवर्तावी, जग मां राख्युं नाम।।९३।।
धन्य ढंढण मुनिवर, कृष्णराय नां नदं। शुद्ध अभिग्रह पाली, टाल दियो भव फंद।।९४।।
बलि खन्धक ऋषि नीं, देह उतारी खाल। परीषह सही नैं, भव फेरा दिया टाल।।९५।।
बलि खन्धक ऋषि नां, हुआ पांच सौ शीष। घाणी मां पील्या, मुक्ति गयां तज रीस।।९६।।
संभूतिविजय शिष्य, भद्रबाहु मुनिराय। चवदे पूरवधारी, चन्द्रगुप्त आण्यो ठाय।।९७।।
बलि आर्द्रकुमार मुनि, स्थूलिभद्र नन्दिषेण। अरणक अइमुत्तो, मुनीश्वरां री श्रेण।।९८।।
चौबीस जिन नां मुनि, संख्या अठावीस लाख। ऊपर सहस्र अड़तालीस, सूत्र परंपरा भाख।।९९।।
कोई उत्तम बांचो, मूंढै जयणा राख। उघाड़े मुख बोल्यां, पाप लागे इम भाख।।१००।।
धन्य मरुदेवी माता, ध्यायो निर्मल ध्यान। गज होदे पायो, निर्मल केवलज्ञान।।१०१।।
धन्य आदीश्वर नीं, पुत्री ब्राह्मी सुन्दरी दोय। चारित्र लेई नै, मुक्ति गयी सिद्ध होय।।१०२।।
चौबीसे जिन नीं, बड़ी शिष्यणी चौबीस। सती मुक्ति पहोंती, पूरी मन जगीश।।१०३।।
चौबीसे जिन नीं, सर्व साधावी सार। अड़तालीस लाख नैं, आठसौ सितर हजार।।१०४।।
चेड़ा नीं पुत्री, राखी धर्म सूं प्रीत। राजीमती विजया, मृगाधती सुविनीत।।१०५।।
पद्मावती मयणरेहा, द्रौपदी दमयन्ती सीत। इत्यादिक सतियां, गई जमारो जीत।।१०६।।
चौबीसे जिन नां, साधु साध्वी सार। गया मोंक्ष देवलोके, हृदये राखो धार।।१०७।।
इण अढीद्वीप मा, गरडा तपसी बाल। पंच महाव्रतधारी, नमो नमो त्रिउं काल।।१०८।।
ए संत सत्यां ना, लीजे नितप्रति नाम। शुद्ध मन थी ध्याओ, एह तिरण नों ठाम।।१०९।।
ए यति सतियां स्यूं, राखो उज्ज्वल भाव। इम कहै ऋषि जयमल, एह तरण नों दाव।।११०।।
संवत अठारै नैं, वर्ष साते सिरदार। गढ़ जालोर मांही, एह कह्यो अधिकार।।१११।।
Roman Transliteration
badi sadhuvandna
namun ananta Chaubisi, rishabhadik mahavir. arya kshetra man, ghali Dharm no sira..1..
maha atul bali nar, shurvir nain dhir. tirtha pravratavi pahonta bhavajal tira..2..
Simandhar pramukh, jaghanya Tirthankar bis. chhai adhidvip ma, jayavta jagdisha..3..
ek sau ne sittar, utkrishta pade jagdish. dhanya mota prabhuji, jehne namavun shisha..4..
kevli doy kodi, utkrishta nav krod. Muni doy sahasra kodi, utkrishta nav sahasra koda..5..
vichrai chhai videhai, mota tapsi ghor. bhave kari vandu, tale bhav nin khoda..6..
chaubise Jin nan, saghla e gandhar. chavdaisau ne bavan, te pranmun sukhkara..7..
Jin-shasan-nayak, dhanya shri vir jinand. gautmadik ganadhar, barttavyo ananda..8..
shri Rishabhdev nan, bhartadik sau put. vairagya man ani, sanyam liyo adbhuta..9..
keval upajayo, kari karni kartut. jinamat dipayo, saghla Moksha pahunta..10..
(lay : sukh karan bhaviyan)
shri bharteshvar na, huva patodhar ath. aditya jashadik, pahonta shivpur bata..11..
shri Jin antar na, huva pat asankh. Muni mukti pahonta, tali Karm no banka..12..
dhanya kapil munishvar, nami namun anagar. jene tatkshan tyagyo, sahasra ramni parivara..13..
munivar harikeshi, chitta munishvar sar. shuddha sanyam pali, pamya bhav no para..14..
bali ikhukar raja, ghar kamlavati nar. bhaggu nain jasha, tehnan doy kumara..15..
chhati riddhi chhandi nain, lidho sanyam bhar. im alpa kal man, pamya mokh duvara..16..
bali sanjti raja, hiran ahide jay. munivar gadbhali, anyo marag thaya..17..
charitra lei nain, bhentya Guru nan pay. kshatri rajarishishvar, charcha kari chitta laya..18..
bali dashun chakravarti, rajya ramni riddhi chhod. dash mukti pahonta, kul ne shobha choda..16..
in avasarppini man, ath Ram gaya mokh. balabhadra munishvar, gaya pancham devloka..20..
dasharnabhadra raja, vir vadya dhari man. pachhe Indra hatayo, diyo chhah kay abhaydana..21..
karakndu pramukh, chyarun pratyek buddha. Muni mukti pahunchya, jitya Karm maha juddha..22..
dhanya mota munivar, mrigaputra jagish. munivar anathi, jita rag nai risa..23..
bali samutrapal Muni, rajamti rahnem. keshi nain Gautam, pamya shivpur sema..24..
dhanya vijayghosh Muni, jayghosh bali jan. shri gargacharya, pahunchya chhai nirvana..25..
shri uttaradhyayan ma, jinavar kiya bakhan. shuddha man sun dhyavo, man men dhiraj ana..26..
bali khandhak sannyasi, rachyo Gautam sneh. Mahavir samipe, panch ,mahavrat leha..27..
tap kathin karinai jhokhi apani deh. gaya achyut devloke, chavlesi bhav chheha..28..
bali rishabhadatta Muni, seth sudarshan sar. shivraj rishishvar, dhanya gangey anagara..29.
shuddha sanyam pali, pamya keval sar. e charun munivar, pahunchya Moksha majhara..30..
bhagavanta nin mata, dhanya dhanya sati devananda. bali sati jayanti, chhod diya ghar phanda..31..
sati mukti pahunchi, bali te vir nain vanda. mahasti sudarshana, ghani satiyan nan vrinda..32..
bali kartik sethe, padima grahi shurvir. jimyo mora upar, tapas balti khira..33..
pachhi charitra lidhun, mitra ek sahans ath dhir. mari hua shukrendra, chav lesi bhav tira..34..
bali ray udai, diyo bhaneja raj. pachhi charitra lei, sarya atam kaja..35..
gangadatta Muni ananda, taranataran jihaj. Muni koshalji ho, diyo ghanan nain saja..36..
dhanya sunakshatra munivar, sarvanubhuti anagar. aradhak hui nain, gaya devlok majhara..37..
chavi mukti jase, bali sinh munishvar sar. bija pan munivar, bhagavti men adhikara..38..
shrenik no beto, moto munivar megh. taji ath anteur, anyo man sanvega..39..
vir pai vrat lei nain, bandhi tap nin teg. gaya vijay vimane, chav lesi shiv vega..40..
dhanya thavachcha putra, taji battisun nar. teh sathe nikalya, purush ek hajara..41..
sukdev sanyasi, ek sahasra shishya lar. panchsau sun selak, lidho sanyam bhara..42..
sarva sahasra adhai, ghana jiva nai tar. pundrik giri upar, kiyo padopagam santhara..43..
aradhak hoi, kodho khevo par. hua mota munivar, nam liya nistara..44..
dhanya jinpal munishvar, doy jana hua sadh. gaya pratham devloke, Moksha jase aradha..45..
shri malli nan chhah mitra, mahabal pramukh muniray. sarva mukti sidhavya, moti padvi paya..46..
bali jitashatru raja, subuddhi name pradhan. pote charitra leinai, pamya Moksha nidhana..47..
dhanya tetli munivar, diyo chhah kay abhaydan. potila pratibodhya, pamyo keval jnana..48..
dhanya panchun pandav, taji draupdi nar. sthaviran nin pase, lidho sanyam bhara..49..
shri nemi vandan no, ehavo abhigrah kidh. mas-masakhaman tap, shatrunjay jai sidha..50..
dharmaghosh tanon shishya, dharmaruchi anagar. kodyan nin karuna, kari daya dil dhara..51..
kadua tumba non, kidho saghlo ahar. sarvartha Siddha pahonta, chav lesi bhavpara..52..
bali pundrik raja, kundrik digiyo jan. pote charitra lei nain, ghali Dharm man hana..53..
sarvartha Siddha pahonta, chav lesi nirvan. shri jnata sutra men, jinavar karya bakhana..54..
gautmadik kumran, saga atharai bhrat. sarva andhak vrishni-sut, dharni jyanri mata..55..
taji ath anteur, kadhi diksha nin bat. charitra leinain, kidho Muni no satha..56..
shri anik senadik, chhaun sahodar bhay. vasudev nan nandan, devki jyanri maya..57..
bhaddilpur nagri, nag gahavai jan. sulsan ghar badhiya, sambhal nemi ni bana..58..
taji battis-battis anteur, nikliya chhitkay. nal kuber samana, bhentya nemi nan paya..59..
kari chhath-chhath paran, man men vairagya lay. ek mas santhare, mukti virajya jaya..60..
bali darun saran, sumukh dumukh Muni ray. bali kumar anadrit, gaya muktigadh maya..61..
basudev nan nandan, dhanya-dhanya gajsukumal. rupe ati sundar, kalavanta vay vala..62..
shri nemi samipe, chhodyo moh jajal. Bhikshu nin padima, grahi mashan mahakala..63..
dekhi somil kopyo, mastak bandhi pal. kheri na khira, sir thaviya asarala..64..
Muni najar n khadi, meti man nin jhal. parishah sahinain, mukti gaya tatkala..65..
dhanya jali mayali, uvayaladik sadh. sambuk nain pradyumna, aniruddha sadhu agadha..66..
bali sachnemi dridhnemi, karni kodhi nirbadh. dashe mukti pahunta, jinavar bach aradha..67.
dhanya arjunmali, karyo kadagrah dur. vir pai vrat lei nain, satyavadi hua shura..68..
kari chhath chhath paran, Kshama kari bharpur. chhah mase manhi, Karm kiya chakchura..69..
kumar aimutte, ditha Gautam svam. suni vir ni vani, kidho uttam kama..70..
charitra lei nai, pahonta shivpur tham. dhur adi makai anta alakka Muni nama..71..
bali krishnaray nin, agramhishi ath. putrabhu doya, sanchya punya nan thata..72..
yadav kul satiyan, tali du:kh ochat. pahonti shivpur men, e chhai sutra non patha..73..
shrenik nin rani, kali adik dash jan. dashe putra viyoge, sambhli vir nin bana..74..
chandanbala pai, sanyam lei jan. tap kari deh jhokhi, pahonti chhai nirvana..75..
nandadik terah, shrenik nrip nin nar. chandanbala pai, lidho sanjam bhara..76..
ek mas santhare, pahoti mukti majhar. e navun janan no, antagad man adhikara..77..
shrenik na beta, jaliadik tevis. vir pai brat lei nain; palyo vishvavisa..78..
tap kathin kari nain, puri man jagish. devloke pahota, Moksha jase taj risa..79..
kakndi no dhanno, taji battisun nar. Mahavir samipe, lidho sanjam bhara..80..
kari chhath chhath paran, ambil ujjhit ahar. shri vir bakhanyo, dhanya dhanno anagara..81..
ek mas santhare, sarvarthasiddha pahont. mahavideh kshetra man, karse bhav non bhagavanta..82..
dhanna nin rite, huva navun hi sant. shri anuttarovvai man, bhakh gaya bhagavanta..83..
subahu pramukh, pach-panch-sau nar. taji vir pai lidha, panch mahavrat sara..84..
charitra lei nain, palyo nirtichar. devloke pahonta, sukhvipak-adhikara..85..
shrenik nan potra, paumadik huva dash. vir pai vrat lei, kadhyo dehi non kasa..86..
sanjam aradhi, devlok ma jai vas. mahavideh kshetra man, Moksha jase lei jasha..87..
balabhadra nan nandan, nishdhadik huva bar. taji pachas anteur, tyag diyo sansara..88..
sahu nebhi samipe, char mahavrat lidh. sarvarthasiddha: pahonta, hose videhe sidha..89..
dhanno nain salibhadra, munisro' nin jod. nari ra bandhan, tatkshan nhakhya toda..90..
taj kutumba kabilo, dhan kanchan nin kod., mas-masakhaman tap, talse bhavan nin khoda..91..
shri sudharma Swami nan, shishya dhanya jambu svam. taji ath anteur, matpita dhan dhama..92..
prabhvadik tari, pahonta shivpur tham. sutra pravartavi, jag man rakhyun nama..93..
dhanya dhandhan munivar, krishnaray nan nadn. shuddha abhigrah pali, tal diyo bhav phanda..94..
bali khandhak rishi nin, deh utari khal. parishah sahi nain, bhav phera diya tala..95..
bali khandhak rishi nan, hua panch sau shish. ghani man pilya, mukti gayan taj risa..96..
sambhutivijay shishya, bhadrabahu muniray. chavde puravdhari, chandragupta anyo thaya..97..
bali ardrakumar Muni, sthulibhadra nandishen. aranak aimutto, munishvaran ri shrena..98..
chaubis Jin nan Muni, sankhya athavis lakh. upar sahasra adatalis, sutra parampra bhakha..99..
koi uttam bancho, mundhai jayna rakh. ughade mukh bolyan, pap lage im bhakha..100..
dhanya marudevi mata, dhyayo nirmal dhyan. gaj hode payo, nirmal kevalajnana..101..
dhanya adishvar nin, putri brahmi sundari doy. charitra lei nai, mukti gayi Siddha hoya..102..
chaubise Jin nin, badi shishyani chaubis. sati mukti pahonti, puri man jagisha..103..
chaubise Jin nin, sarva sadhavi sar. adatalis lakh nain, athasau sitar hajara..104..
cheda nin putri, rakhi Dharm sun prit. Rajimati vijya, mrigadhti suvinita..105..
padmavti mayanreha, draupdi damayanti sit. ityadik satiyan, gai jamaro jita..106..
chaubise Jin nan, sadhu Sadhvi sar. gaya monksha devloke, hridye rakho dhara..107..
in adhidvip ma, garda tapsi bal. panch mahavratdhari, namo namo triun kala..108..
e sant satyan na, lije nitaprati nam. shuddha man thi dhyao, eh tiran non thama..109..
e yati satiyan syun, rakho ujjval bhav. im kahai rishi jayamal, eh taran non dava..110..
sanvat atharai nain, varsha sate sirdar. gadh jalor manhi, eh kahyo adhikara..111..