सुर नर जिणने शीश नमावै,
Sur Nar Jinne Shish Namavai,
2548
सुर नर जिणने शीश नमावै, — Lyrics
सुर नर जिणने शीश नमावै, नंदन वन री उपमा पावै, च्यारुं कूंटा मांही जिणरी जश झण्डी फहरावै, स्वामीजी रो ओ गण उपवन म्हानै घणो सुहावै, गंगा ज्यूं पावन ओ शासन म्हानै घणो सुहावै।।
शास्त्रां रो कर मंथन बाबो असली तत्त्व निचोड्यो हो, पूजा और प्रतिष्ठा छोड़ी नहीं सत्य नै छोड़यो हो, परमारथ रै खातिर अपणै गुरु स्यू नातो तोड़यो हो आकर्षण, सुविधावां, प्रलोभनां स्यूं मन नै मोड्यो हो प्रतिस्रोत रो पथ अपनायो, नहीं लीक पर चलणो भायो सुणकर प्रभु री गौरव गाथा मन में जोश आवै।।१।।
फौलादी सीनो बाबै रो तूफानां में नहीं हिल्यो भीषण झंझावाता में भी कल्पवृक्ष ओ सदा फल्यो, विद्वेषी बण जो भी आये पथ स्यूं खुद ही दूर टल्यो, तीखा कांटा में भी रहकर ओ सौरभमय फूल खिल खिल्यो, सीख्यो कदै न पथ में रुकणो, बाधावां रै आगै झुकणो, मौत हथेली में राखै बै मानव क्यूं घबरावै।।२।।
पांच वर्ष तक अन पिण पूरो मिल्यो नहीं हो खावण नै, शमशानां री छतरयां मिली स्वाम नै रात बितावण नै, लोग लगाया लारै नई क्रांति रो दीप बुझावण नै कमी नहीं राखी तेरापंथ रो खर खोज मिटावण नै पिण सोनलियो सूरज उगग्यो, आयो महामेघ बो हट्यो, इणरी दिव्य रश्मियां स्यूं लाखां जन मारग पावै।।३।।
एक सुगुरु रै अनुशासन में ओ गण उपवन आज फलै, बाबै रे बतलायै सिद्धांतां पर सारो संघ चलै, गणपति रो पाकर नव सिंचन संत सत्या औ सदा खिलै, त्याग, तपस्या, कला देख जन-जन में श्रद्धा रंग घुलै, छायी रेहवै है खुशहाली, गण में देखा सदा दिवाली, चौथे आरै रो नजारो लख हर मन हुलसावै।।४।।
अपणै उज्ज्वल आदर्शा स्यूं गण ओ बण्यो महान् है, जैन धर्म रो नयो संस्करण मानवता री शान है, इणरी नींवां उंडी गाड़ी आचारज पुनवान है, युगां युगां तक स्मृति में रहसी बाबै रो अवदान है, जन-जन रो है ओ आलंबन, 'विजय' समर्पित इणनै जीवन, ओ है भव सागर रो पोत तीर तक पहुंचावै।।५।।
Roman Transliteration
sur nar jinne shish namavai, nandan van ri upama pavai, chyarun kunta manhi jinri jash jhandi phahravai, svamiji ro o gan upavan mhanai ghano suhavai, ganga jyun pavan o shasan mhanai ghano suhavai..
shastran ro kar manthan babo asali tattva nichodyo ho, puja aur pratishtha chhodi nahin satya nai chhodyo ho, parmarath rai khatir apanai Guru syu nato todyo ho akarshan, suvidhavan, pralobhnan syun man nai modyo ho pratisrot ro path apanayo, nahin lik par chalno bhayo sunakar Prabhu ri gaurav gatha man men josh avai..1..
phauladi sino babai ro tuphanan men nahin hilyo bhishan jhanjhavata men bhi kalpavriksha o sada phalyo, vidveshi ban jo bhi aye path syun khud hi dur talyo, tikha kanta men bhi rahakar o saurabhamay phul khil khilyo, sikhyo kadai n path men rukno, badhavan rai agai jhukno, maut hatheli men rakhai bai manav kyun ghabravai..2..
panch varsha tak an pin puro milyo nahin ho khavan nai, shamshanan ri chhataryan mili svam nai rat bitavan nai, log lagaya larai nai kranti ro dip bujhavan nai kami nahin rakhi Terapanth ro khar khoj mitavan nai pin sonliyo suraj ugagyo, ayo mahamegh bo hatyo, inari divya rashmiyan syun lakhan jan marag pavai..3..
ek suguru rai anushasan men o gan upavan aj phalai, babai re batlayai siddhantan par saro Sangh chalai, ganapti ro pakar nav sinchan sant satya au sada khilai, tyag, tapasya, kala dekh jan-jan men shraddha rang ghulai, chhayi rehvai hai khushhali, gan men dekha sada divali, chauthe arai ro najaro lakh har man hulsavai..4..
apanai ujjval adarsha syun gan o banyo mahan hai, Jain Dharm ro nayo sanskaran manavta ri shan hai, inari ninvan undi gadi acharaj punvan hai, yugan yugan tak smriti men rahsi babai ro avadan hai, jan-jan ro hai o alamban, 'vijay' samarpit inanai jivan, o hai bhav sagar ro pot tir tak pahunchavai..5..