तेरापंथ प्रबोध
Terapanth Prabodh
2609
तेरापंथ प्रबोध — Lyrics
तेरापंथ प्रबोध श्रद्धा स्वीकारो तेरापंथ रा अधिदेवता! शक्ति संचारो तेरापंथ शासन देवता! थारै पर म्हारी आस्था अपरंपार हो, जन जीवन आधार हो, हत् तंत्री रा तार हो, मरुधर रा मंदार हो, तेरापंथ रा..........।।
1. राजस्थान गाम कंटालिय आषाढी तेरस आई, बल्लू शा दीपां घर जायो पुत्र, फळी है पुण्याई, हो संतां सतरैसै तंयासी संवत श्रीकार हो।।
2. शुभ मुहुरत में नामकरण-संस्कार सझायो बालक रो, भिक्खण भिक्खू भाव भर्यो भावी शासन-संचालक रो, हो संतां मंगल गीतां री घर घर में गुंजार हो।।
3. 'होनहार विरुवान चीकणा पात' बात विख्यात है, 'उगंतो ही तपै तेज रवि' उदाहरण नवजात है, हो संतां प्रतिभा उत्पत्तिया पाई आकार हो।।
4. सीखी महाजनी विद्या अब महाजना नै मात करै, किण री हिम्मत भिक्खण आगै इसी बिसी कोइ बात करै, हो संतां बचपन में ही बालूड़ो तेज तरार हो।।
5. नान्ही वय में ही भिक्खण शादी री बाजी शहनाई, बगड़ी में ससुराल सहचरी सौभागण सुगणीबाई, हो संतां जाई इक सुता, सहज सिमट्यो परिवार हो।।
6. सन्त-सत्यां री साझै सेवा, करै धर्म री साधना, तात्त्विक बोल थोकड़ा सीखै आध्यात्मिक आराधना, हो संतां! जागी जागरणा जाण्यो जग निस्सार हो।।
7. सही सजोड़ै दीक्षा लेणी मनोमनां संकल्प कर्यो, तब लग शील सजोड़े पाळां, ओ पिण व्रत अविकल्प धरयो, हो सन्तां! प्रारंभ्यो एकांतर तप दुक्करकार हो।।
8. नियति योग पत्नी वियोग, नश्वरता तन री पहचाणी, 'समयं गोयम्, मा पमायए' मुखर हुई आगम-वाणी, हो संतां! अब तो क्षण-क्षण भी बीतै भारी भार हो।।
9. दीक्षा री अनुमति मांगी, मां सिंह-सपन री बात कही, समझावण आण्या रघुराजा, ऊग्यो है परभात सही, हो संतां! मोकै रो मंतर मां पर करग्यो कार हो।।
10. दीपां बाई! थांरो बेटो देख शेर ज्यूं गूंजैला, धूजैला थर-थर कायर, ओ कर्म कटक स्यूं जूझैला, हो संतां! होग्यो भीखण रो अब तो बेड़ो पार हो।।
11. रामचरणजी भीखणजी रै मैत्री रो संबंध हो, एक साथ वैराग साधणै रो कल्पित अनुबंध हो, हो संतां! अब भी सौहार्द, सनेही संव्यवहार हो। हो संतां! दोनूं निर्गुण-पूजा रा पक्षधार हो।।
12. भीखण मुनि बण रघु-चरणां में शास्त्रां रो स्वाध्याय करे, कथनी करणी रो अन्तर लख मानस में संशय उभरै, हो संतां! उमड़यो दुर्वार जिज्ञासा रो ज्वार हो।।
13. रघुवर सोचै-पापभीरु वैरागी जिणस्यूं जिज्ञासा, बड़ो विनीत भक्त है, इण स्यूं है मोटी-मोटी आशा, हो संतां! भीखण खींचै गहरो शास्त्रां रो सार हो।।
14. राजनगर मेवाइ-जातरा रो आयो अवसर ठावो, शंकाशील बण्या है श्रावक, भीखणजी! जा समझावो, हो संतां! अणचित्यो बणग्यो जागृति रो आसार हो।।
15. जा, धीरप स्यूं चतराई स्यूं सब नै लिया प्रभाव में, शंका मूल मिटी नहिं तो भी बहग्या भाबुक भाव में, हो संतां! पायो जस, बहुड़ायो वनणा व्यवहार हो।।
16. कुण जाणै के हुयो, अचानक राते तेज बुखार चढ्यो, सीयो दाहो लग्यो भयानक बेचैनी रो वार बढ्यो, हो संतां! खुलम्यो अंत:स्फुरणा रो अभिनव द्वार हो।।
17. उतरै आज बुखार, परिस्थिति पर मैं पुनर्विचार करूं, हो निष्पक्ष जिनाज्ञा सम्मत साचो पथ स्वीकार करूं, हो संतां! ढळग्यो ज्वर, फळग्यो असमय में सहकार हो।।
18. हर्षविभोर भोर स्यूं ही भिक्खण चिंतन में जोर जुट्यो, धर्म धार्मिकां री दुरवस्था देख कळेजो कांप उठ्यो, हो संतां! सतपथ-स्वीकृति रो घोषित कियो करार हो।।
19. श्रावक बाग-बाग, पर रघुराजा रो मूड विचित्र बण्यो, भिक्खण सविनय शात कियो गुरु मानस तीव्र तणाव तण्यो, हो गुरुवर! चिंतन मांगै अपणो आचार विचार हो।।
20. भिक्खण! बात सही है पिण पंचम आरे री कठिनाई, 'पंच वचन शिरमाथे, पर परनाळै की सी' स्थिति आई, हो संतां! करणो के? आपस में न बढ़ै तकरार हो।।
21. एक ओर आगम है, एक ओर गुरु रो अपनत्व है, पर सिद्धांतां, सच्चाई रो सब स्यूं बड़ों महत्त्व है, हो संतां! एकै बिन हो ज्यावै बिंदयां बेकार हो।।
22. सोच्यो, सही-सही बातां क्यूं नहीं गुरु स्वीकारसी, 'कर कंगण आख्यां स्यूं दीखै, फिर के करसी आरसी?' हो संतां! विस्तृत वार्ता भी असफल आखिरकार हो।।
23. अभिनिष्क्रमण कर्यो 'स्थानक स्यूं' , सुण अवाक रहग्या सारा, भीखणजी-सा संत विरागी हुया संघ स्यूं क्यूं न्यारा? हो संतां! चर्चा चौतरफी बगड़ी रै बाजार हो।।
24. आण-दुहाई फिरी संघ री, स्थान नहीं देणो आंनै, देणैवाळै पर जुर्मानो सुणल्यो सै चोड़ै-छानै, हो संतां! बैठा सब श्रावक मन में करड़ी धार हो।।
25. करां व्यार छोड़ा बगड़ी नै, निर्णय ले चाल्या पुर स्यूं, करतां ही प्रस्थान, उठ्यो तूफान परीषह ओ धुर स्यूं, हो संतां! 'एकानी नदी और एकानी न्हार' हो।।
26. आज रात शमसान वास, कर मतो पधारया छतरी में, साहस शिखर चढ्यो बाबै रो, जाग्यो पोरस खतरी में, हो संतां! पोरस रै आगै मानै सगळा हार हो।।
27. पूरी रात बिताई चिन्तन में, अब आगै के करणो? क्यूं डरणो कष्टां स्यूं, है 'चत्तारी मंगल' रो शरणो, हो संतां! अपणी आत्मा ही अपणी पहरेदार हो।।
28. रघुवर आय बकारै भीखणजी! थे करो न नादानी, आगो थारो पीछो म्हारो, नहीं चलैला मनमानी, हो भिक्खण! पग पग पर लोग लगास्यूं थारै लार हो।।
29. आशीर्वाद रूप में ली गुरुबाणी जो अभिशापमयी, दीपां मां नै याद करी, दिलगीरी देख विलापमयी, हो संतां! वीरोचित वीरवृत्ति रो ओ व्यापार हो।।
30. बगड़ी स्यूं बड़लू में गुरु-चेलां बिच चर्चा खूब छिड़ी, जोधाणै में गेरुलालजी व्यास जिस्यां री कड़ी जुड़ी, हो संतां! 'भावी-बीलाड़े' आयो एक उभार हो।।
31. किशनोजी सुत रो कर पकड्यां कठिन समस्या करी खड़ी, रूं-रूं में सांवरियो बसियो अलग रहूं नहिं एक घड़ी, हो संतां! सूंप्या जयमल नै, तीनूं घरां बहार हो।। गावो गीत सुप्यार हो।।
32. जोधाणै री हाटां में श्रावक सामायिक ले बैठा, स्थानक छोड़ अठै सामायिक, कांई बात हुई के' ठा? हो संतां! पूछै दीवान बताओ बेरैवार हो।।
33. करां हाट बैठ्या सामायिक, म्हे सै स्थानक ने छोड़यो, धर्म-क्रांति आ गुरु भिक्खण री, नई दिशा में मुंह मोड्यो, हो संतां! ओ है मंतव्य, ओ असली आचार हो।।
34. तेरा श्रावक, भीखणजी रै साथी तेरा संत है, तेरा ही है नियम, सभी मिल सुन्दर तेरापंथ है, हो संतां! तुक्को, सेवग रो पायो शीघ्र प्रसार हो।।
35. सुण चौंक्या स्वामीजी, फिर मंथनपूर्वक मंजूर कियो, 'हे प्रभो! यह तेरापंथ' पथिक म्है संशय दूर कियो, हो संतां! वंदन-मुद्रा में बोल्या बारंबार हो।।
36. मरुधर स्यूं मेवाड़ केलवा री धरती पर पांव धर्या, मिल्यो नहीं आवास वास हित, मन समता रा भाव भर्या, हो संतां! अंधेरी ओरी रो होणो निस्तार हो।।
37. जिनमंदिर में जक्ष देव-कृत कड़ी कसौटी पार हुई, सही सलामत देख सवारै 'सबकी आंख्यां च्यार हुई , हो संतां! सारै पुर होग्यो तेरापथ स्वीकार हो।।
38. आषाढी पूनम री संध्या बणी अबंध्या इतिहासी, ली सोत्साह सभी नव दीक्षा सुमरत अर्हत अविनासी, हो संतां! कुण-सी बा बेळा पळा आई अविकार हो।।
39. तेरापंथ स्थापना दिन री आज स्वयं शुरुवात हुई, अरे पांचमे आरै चौथे आरै की-सी बात हुई, हो संतां! घणो सुहावै दीपां मात दुलार हो।। गावो गीत सुप्यार हो।।
40. लाभालाभे सुहे दुहे जीणै मरणै में सम रहणो, निंदा और प्रशंसा समता स्यूं अपमान मान सहणो, हो संतां! धार्यो संजम रो पथ तलवार दुधार हो।।
41. स्वागत है अभ्यागत! खुल्लो परीषहां नै आमंत्रण, मेरु सी ऊंचाई सागर गहराई सो साध्यो प्रण, हो संतां! गावो संगीत स्वर लहरी संचार हो।।
42. पांच वरस तक मिली नहीं जीवन-यापन री सुविधावां, पाली घी, घी सहित घाट ली, अगणित है औ घटनावां, हो संतां! पावस बिच में ही करणो पड्यो विहार हो।।
43. पग पग पर अवरोध, विरोधी वातावरण रह्यो बढ़तो, जनता प्रतिबोधण रो सपनो कठै किया शिखरां चढ़तो, हो संतां! लीन्हो आतापना संबल साभार हो।।
44. धम्मगिरी, तरणी तपस्विनी रो बो सीन निहारां म्हे, 'मर पूरा देस्यां तप जप स्यूं आतम कारज सारां म्हे , हो संतां! आई है क्षणिक निराशा एक बार हो।।
45. सूझबूझ थिरपाल फतै री लिखीजसी स्वर्णाक्षर में, संबोधनपूर्वक उद्बोधन दियो सुरंगो सुस्वर में, हो संतां! 'बादळियो आंखड़ल्यां बरस्यो' इकधार हो।। गावो गीत सुप्यार हो।।
46. हो आदेश तपस्या रो, म्हांनै म्हांरो अधिकार मिलै, जन उद्बोधन काम आपरो, जनता रो उपहार मिलै, हो संतां! मानी संतां री अंतरमन मनुहार हो।।
47. प्रारंम्यो अभियान दुबारा, लोग निकट आवण लाग्या, आकर्षण बढग्यो दरसण में, पद परसण स्यूं भ्रम भाग्या, हो संतां! फळग्यो आशीर्वर 'लोग लगास्यूं लार' हो।।
48. तीरथ तीन देख जन बोल्या लाडू है खांडो थारो, खांडो भले चोगुणी रो है, थिरता राखो सुसता रो, हो संतां! सतियां री दीक्षा रो अदभुत इकरार हो।।
49. अटठारे सतरै स्यूं बत्तीसै लग विषम बगत बीत्यो, थोड़ै परिकर में भी स्वामी जबर जंग सो है जीत्यो, हो संतां! दिन रो खाणो निशि सोणो भी दुश्वार हो।।
50. तेरा मां स्यूं सात गया, छव रह्मा परम परमार्थपखी, थिर थिरपाल फते.भी.भारी.हर.टोकर. अभिधान अखी, हो संतां! आगै स्यू आगै अब बढ़सी विस्तार हो।।
51. बत्तीसै मिगसर बिद सातम संविधान रो लिखत लिख्यो, भारिमाल रै खंधां पर भावी शासन रो भार टिक्यो, हो संतां! छोटै सै कागज में कलमा कलदार हो।। हो संतां! 'भारी मर्यादा बांधी', गीत सुप्यार हो।।
52. संविधान सुविधान बणाकर सब संतां नै अवगति दी, अलग-अलग दिखला सारा री हार्दिक भावे सहमति ली, हो संतां! नूतन अध्यात्म तंत्र रो आविष्कार हो।।
53. भारिमालजी तो भोळा, इण पदवी जोग तिलोक है, सही नहीं निर्वाचन, बोल्या चन्द्रभाण बेरोक है, हो संतां! बणग्या खुद सूरीपद उम्मीदवार हो।।
54. सुणी बात स्वामीजी, सहज्यां शब्द वदन स्यूं नीकळ्यो, सूरी नहिं तो सूरदास पद शायद, बो भी है फळ्यो, हो संतां! नैसर्गिक वचन सिद्धि रो साक्षात्कार हो।।
55. अनुशासन आधार संघ रो, अनुशासन ही प्राण है, अनुशासन है पंथ प्रगति रो, अनुशासन ही त्राण है, हो संतां! 'ज्योतिर्मय चिन्मय दीप' हरै अंधार हो।। गावो गीत सुप्यार हो।।
56. हेम हजारी सिरियारी रो बण्यो विमल दिल वेरागी, समै समै शुभ सेवा साझै भिक्खण-चरणां लौ लागी, हो संतां! ताकाताकी में क्यूं बेठो अविचार हो।।
57. 'अरे हेमड़ा! दीक्षा लेसी के तू म्हारै मर्यां पछै- या जीते जी', बोल्या भिक्षु कह दै थारै जिसी जचै, हो संतां! ललचावै यूं म्हांनै क्यूं ऊठसवार हो।।
58. दोरी लागी लज्या जागी त्याग किया अब शादी रा, जियड़ो जगग्यो साधपणां में जगमगग्या दिवला घी रा, हो संतां! अटठारै तेपन में दीक्षा संस्कार हो।।
59. संख्या घटी न संतां री, है हयो हेम रो पगफेरो, स्वामीजी स्यूं गुंथ्योड़ो जीवनपोथी रो हर पेरो, हो संतां! विद्यागुरु जयाचार्य मान्या निरधार हो।।
60. गुणसट्ठै मा सुद सातम अंतिम मर्यादापत्र है, मर्यादोत्सव रो निमित्त मर्यादामय गणछत्र है, हो संतां! भिक्षु शासन रो सारो दारमदार हो।।
61. एक हुवै आचार्य संघ में सही एक सामाचारी, परूपणा रो पंथ एक-सो नहीं कोई थारी म्हारी, हो संतां! शैली अलबेली छूट्यो स्वेच्छाचार हो।। गावो गीत सुप्यार हो।।
62. सार्वभौम सिद्धांत घोषणा करी अभय हो स्वामीजी, जिनवाणी पर पूर्ण समर्पित आस्थामय हो स्वामीजी, हो संतां! देता ही रह्या धर्म नै नयो निखार हो।।
63. पोषण जठै असंजम रो बो दान दान है, धर्म नहीं, मारै एकण ने पुचकारै, रोष राग है धर्म नहीं, हो संतां! शिवपथ में साधन री शुद्धी अनिवार हो।।
64. अर्हत आज्ञा धर्म, अनाज्ञा अधरम खरी कसौटी है, धन स्यूं धर्म खरीदीजै, आ श्रद्धा जड़ स्यूं खोटी है, हो संतां! बलजबरी चलै न धार्मिक कारोबार हो।।
65. पुण्य बंध धार्मिक करणी स्यूं, केवल पुण्य स्वतंत्र नहीं, नाज बिना तूड़ी पैदा करणै को कोई तंत्र नहीं, हो संतां! लौकिक लोकोत्तर दोनूं पृथक प्रकार हो।।
66. धूप दीप फळ-फूल आदि स्यूं प्रतिमा पूजा धर्म नहीं, आलम्बण बणणै स्यूं पूजनीय हो, जिनमत मर्म नहीं, हो संतां! निक्षेपो स्थापना निर्गुण आकार हो।।
67. श्वेताम्बर आगम आस्था पर म्हे चारित्र निभावां हां, और धर्म उपकरण रूप में वस्त्र पात्र अपणावां हां, हो संतां! मूर्च्छा नहिं मान्य, पडुत्तर धारफार हो।।
68. आगम परम्परा स्यूं प्राप्त सत्य पर दिल दृढ़ताई हो, अपणै सिद्धांतां में नहीं शिथिलता राई पाई हो, हो संतां! मन की मजबूती कर दै खेवो पार हो।।
69. चालू शब्द समन्वय क्यूं हो किण पर ही आक्षेप कहीं, बेमतलब पर-मन्तव्यां में करणो हस्तक्षेप नहीं, हो संतां! समुचित सापेक्षवाद रो ओ उपहार हो।।
70. नवपदार्थ, अनुकम्पा, श्रद्धाऽऽचार, व्रताव्रत चौपाई, बारहव्रत, निक्षेप, विनीत, विपुल साहित्य पढ़ो भाई, हो संतां! भिक्खू दृष्टान्त तो हिवड़ै रो हार हो।।
71. लिखी शील री बाड़, रास टाळोकर एकल री ढाळां, आगम रा आख्यान, थोकड़ा सावधान हो संभाळां, हो संतां! अपणै जुग रा सर्वोत्तम सिरजणहार हो।।
72. चर्चावादी, कुशल-प्रशासन, मीमांसक, संगायक हा, पुरुष परीक्षक और समीक्षक नव्य नीति निर्णायक हा, हो संतां! प्रगट्यो कोई एक नयो उद्योतकार हो।
73. जीवन भर यायावर स्वामी साठे आया सिरियारी, कच्ची पक्की हाटां में पावस री पूरी रिझवारी, हो संतां! प्रतिदिन व्याख्यान गोचरी श्रम सहचार हो।। गावो गीत सुप्यार हो।।
74. सिरियारी में प्राय आठ सौ ओळी तेरापंथ्यां री, ठाकुर दौलतसिंह हृदय में हरी भरी श्रद्धा क्यारी, हो संतां! सम्मुख है पर्वतमाळा रो प्राकार हो।।
75. सावण सुद पख में स्वामीजी री काया कमजोर पड़ी, अन्न अरुचि है और अपच है तो भी मेहनत करै कड़ी, हो संतां! तर तर तन छीजै आमय अप्रतिकार हो।।
76. भाद्रव शुक्ल चोथ दिन शिष्यां नै स्वामीजी बतलावै, भारिमाल, टोकरजी और खेतसीजी नै विरुदावै, हो संतां! पाल्यो संजय जो निर्मल निरअतिचार हो।।
77. लागै अब आयुष्य निकट है, पर न मौत रो भय म्हारै, रही न कोई ऊणायत देखो चाहे भीतर बारै, हो संतां! अणसणमय जीवन रो अब उपसंहार हो।।
78. रायचन्द! तू बुद्धिमान बालक है, पोटी छोटी है, मोह नहीं कीजै म्हारै स्यूं, आ ही बड़ी कसौटी है, हो गुरुवर! मैं क्यूं मोहाकुल आप करो उद्धार हो।।
79. संत खेतसी बोलै स्वामी! आप पधारो स्वर्गां में, स्वर्ग! मनै नहिं स्वर्ग चाहिजै, मत उलझो थे भी आमें, हो संतां! पुद्गल सुख भुगत्या जीव अनंती बार हो।।
80. पांचम छमच्छरी दिन स्वामी चौविहार उपवास कर्यो, छट्ट पारणो कर्यो अल्प सो, बो भी बिलकुल नहीं जर्यो, हो संतां! काची काया रा औ ही नेगचार हो।।
81. सातम आठम नवमी दशमी अल्प आर आश्वास लियो, एकादशमी अमित आत्मबल स्यूं स्वामी उपवास कियो, हो संतां! बारस बेलै रे दिन अंतर उद्गार हो।।
82. भारमल्ल नै म्हां ज्यूं मानीज्यो थे अन्तर भाव स्यूं, पापभीरु उत्तम प्राणी है, पटधर आत्म प्रभाव स्यूं, हो संतां! रहिज्यो आराधता इंगित आकार हो।।
83. हेत परस्पर राखीज्यो, मत ओगुण किण रा ढूंढज्यो, दीक्षा देख देख नै दीज्यो जिण तिण नै मत मूंडज्यो, हो संतां! ममत चेलां री ले डूबै मझधार हो।।
84. टोळा रा टाळोकरां रो टाळणो संपर्क है, अपछंदां रो, अविनीता रो होवै बेड़ो गर्क है, हो संतां! आज्ञा मर्यादा अपणी यादगार हो।।
85. पक्की हाट पधारया स्वामी पगां चाल दिन दोफारां, 'पुदगल खीण पड़ै है भंते!' तो ल्यो अणसण स्वीकारां, हो संतां! पचख्यो संथारो ऊंचै स्वर तिविहार हो।।
86. लोक हजारां भक्ति भाव स्यूं दर्शण खातिर आवै है, सार्थक और सफल यात्रा, गुण मुक्त कंठ स्यूं गावै है, हो संतां! अपणी तकदीर सरावै सौ-सौ बार हो।।
87. बीती बारस रात प्रात तेरस रो अब ओ उदियायो, चढ़यां प्रहर दिन जळ आरोग्यो, पछे अचानक फरमायो, हो संतां! आवै है सन्त सत्यां जावो पुर-बार हो।।
88. मुहुरत बाद मुनि वेणोजी और कुशालोजी आया, बगतू, झूमा, डाही सतियां गुरु दर्शन कर सुख पाया, हो संतां! जाणक उपज्यो है अवधिज्ञान उदार हो।।
89. पोढायां नै देर हुई तब संत बिठाया स्वामी नै, ध्यानासन में ध्यानलीन निज अतंर आत्मा रै चीन्है, हो संतां! झिगमिगती तेरह खंडी मंडी त्यार हो।।
90. सुई खसोळी पगड़ी में सम्पूर्ण काम, दरजी बोल्यो, देर लखावै स्वामीजी रै, कहतां ही अम्बर डोल्यो, हो संतां! साठे भादूड़ी तेरस मंगलवार हो।। गावो गीत सुप्यार हो।।
91. परम समाधी में स्वामीजी सात पोर रो संथारो, 'सिरियारी रो संत' अंत तक देखायो चोथो आरो, हो संतां! उमड़ी है जनता, भक्तां री भरमार हो।। गावो गीत सुप्यार हो।।
92. धम्मगिरी री पुण्य तलेटी तपस्विनी सरिता चर में, करै चरम संस्कार स्वाम रो, ओजस्वी ऊंचै स्वर में, हो संतां! धरणी-अंबर में जय जय की धुंकार हो।।
93. दो 'री लगी घणां नै पण जति हीरविजै दिलगीर बण्या, म्हारै प्रश्नां रो उत्तर अब कुण देसी? गंभीर बण्या, हो संतां! पूछयो निज इष्टदेव स्मृति में संभार हो।।
94. कहै देव-'सीमन्धर समवसरण' स्यूं सीधो आयो हूं, स्वर्ग सिधाऱया भीखणजी विश्वस्त खबर मैं ल्यायो हूं, हो संतां! पंचम स्वर्गाधिप वैभव रो अंबार हो।। हो संतां! 'शासन प्रभाकर'स्यूं म्है लियो उधार हो।।
95. घोर विरोधी भी बोलै-बो सन्त अजब हो अलबेलो, सिद्धान्तां को साथी, छोड्यो कदे नहीं अपणो गेलो, हो संतां! सहजोगी जुड्यो काफिलो जोरदार हो।।
96. उणपच्चास संत स्वामी युग में छप्पन सतियां सारी, अट्ठारह सतरै गण बाहर, शेष रहया संयमधारी, हो संतां! श्रद्धालू श्रावक संख्या शानदान हो।।
97. चम्मालीस बरस रो पूरो स्वामीजी रो बरतारो, जिनशासन री आब बढ़ाई चमक्यो तेरापथ तारो, हो संतां! भव-भव में क्यूंकर भूलां ओ आभार हो।।
98. ॐ भिक्षु-जय भिक्षु' मंत्र ओ विघ्नहरण मंगलकारी, जन-मन रोचक, संकट-मोचक सुखकारी भवभयहारी, हो संतां! गूंगो भी बौलै, पंगू चढ़ै पहाड़ हो।।
99. पुण्य पोरसा स्वामीजी निज कर स्यूं जो विरवो रोप्यो, पीढी दर पीढी सिंचन स्यूं बण शतशाखी हद ओप्यो, हो संतां! मौसम-मौसम रा फळ, तरु छायादार हो।।
100. 'भागी भारमल्ल' गुरुवर रो आशीर्वर मूंघा-मोलो, रह्यो छत्र बण सिर पर, आयो नहीं कहीं उन्हों झोलो, हो संतां! भारी पटधारी दीप्यो दिव्य दिदार हो।।
101. उदयपुरी घटना में केसर भंडारी रो चित्र बण्यो, भारिमाल बरतारे अनुशासन रो वृत्त विचित्र बण्यो, हो संतां! भिक्षु साहित्य रा सुंदर लिपिकार हो।।
102. भारिमालजी री गादी पर रायऋषीजी राज कर्यो, 'टाबर मनै न समझो कोई' बैनया ही ओगाज कर्यो, हो संतां! चमक्या सूरज सा भैक्षव गण गिगनार हो।।
103. जनम लियो प्हाड़ी भूमी पर? शेर गुफा में ही जनमै, सिंह-वृत्ति स्यूं संयम पाळयो, मस्त रह्मा अपणैपन में, हो संतां! जीवन जीयो बण ज्योतिर्मय अंगार हो।। गावो गीत सुप्यार हो।।
104. स्वामीजी स्वर्गस्थ, जीत रो जनम, जुगल मरुधर-धोरी, पंथ प्रगति पर रही एक-सी सांवरियै री थिर थ्योरी, हो संतां! जन भाषा में 'श्री जय' भीखण रा अवतार हो।।
105. जयाचार्य अनिवार्य रूप शासन रो कायाकल्प कर्यो, गढ़यो नयो इतिहास खास सार्थक स्वीकृत संकल्प वरर्यो, हो संतां! वज्रासन मुद्रा में जुड़तो दरबार हो, हो संतां! भैक्षव-वाङ्मय रा भास्वर भाष्यकार हो।।
106. महासती सरदारांजी री दीक्षा शिक्षा जय कर स्यूं, दियो विपुल सम्मान संघ में, नारी क्यूं है कम नर स्यूं, हो संतां! बंधु त्रिपुटी स्यूं होग्यो गण गुलजार हो।।
107. मघजी पुण्यवान है, म्हारै पंडित है, जय शब्द कह्या, अट्टारै ग्यारै बरसां लग युवाचार्य आचार्य रह्या, हो संतां! निर्मल निर्मायी निश्छल निरहंकार हो।।
108. भगी भाई दोनूं पाई कला सत्य-संधान की, आत्म विजेता नव नचिकेता वीतराग री बानगी, हो संतां! जुग रा अजातशत्रु मघवा जगतार हो।। गावो गीत सुप्यार हो।।
109. जयपुर रो जौहरी है, कियो परीक्षण क्षण में जैगणी, लाला लिछमणजी स्यूं जाच्यो मूंघामोलो ओ मणी, हो संतां! भावी मघ पटधारी माणक अणगार हो।।
110. अति विश्वास देव ज्योतिष को हुवै अहितकर कम बेसी, सक्रिय शिक्षण सदा संघ नै माणक-युग देतो रेसी, हो संतां! शासन संभाळयो वर संवत्सर च्यार हो।। गावो गीत सुप्यार हो।।
111. सप्तम पट अधिकारी प्रभुताधारी डालिम देवता, तेजस्वी आचार्य आर्यजन दूर दूर स्यूं सेवता, हो संता! ओजस्वी वाणी, करता उग्र बिहार हो।।
112. अपणै पथ पर बढ़ो निरन्तर पड़ो न खलता खोड़ में, कहता डालिम सोवो सुख भर सात हाथ री सोड में, हो संतां! छोड्या सहणी पड़सी फणधर फुंकार हो।। गावो गीत सुप्यार हो।।
113. मघवा की-सी आकृति मघवा प्रतिकृति मम जीवन ज्योती, करुणा री इकलौती मूरत, कालू काया कलधौती, हो संतां! संचित पुण्याई रो नहिं आर-पार हो।।
114. दीक्षा में शिक्षा में, समय-समीक्षा में अगवाणी की, गण में बोया बीज प्रगति रा, जाणक भविष्यवाणी की, हो संतां! शास्ता-सो शासन, मात पिता-सो प्यार हो।।
115. आठ पाट री सकल संपदा सूंपी मुझनै श्रीकालू, मैं मानूं म्हारी गतिविधि में सदा सहायक श्रीकालू, हो संतां! युग नै परखण री दी दृष्टि दिलदार हो।।
116. महाप्रज्ञ सा युवाचार्य सहयोगी है हर बात में, छाया बणकर रहै साथ निशि वासर यातायात में, हो संतां! महाश्रमणी महाश्रमण सब साझीदार हो।।
117. श्री सरदार गुलाब नवलसति जेठां कानकुमारी है, झमकूजी लाड़ांजी कनकप्रभा केसर की क्यारी है, हो संतां! साध्वीप्रमुखा श्रमणीगण में श्रृंगार हो।।
118. मानवीय मूल्यां री जागरणां, जीवन रो सत्त्व है, नैतिकता-संयुक्त धरम री व्याख्या अभिनव तत्त्व है, हो संतां! अणुव्रत-आचार-संहिता अगदंकार हो।। गावो गीत सुप्यार हो।।
119. ध्यान धरम रो प्राणबीज हो, पतो नहीं क्यूं छूटग्यो? अपणो रूप निहारै जिणमें, जाणक दर्पण टूटग्यो, हो संतां! प्रेक्षा तिण परंपरा रो पुनरुद्धार हो।। गावो गीत सुप्यार हो।।
120. शिक्षा आज समस्या बणगी सबकी एक जबान है, समाधान आपां नै मिलग्यो जो जीवन-विज्ञान है, हो संतां! संस्कृति-संरचना रो ओ सूत्रधार हो।। गावो गीत सुप्यार हो।।
121. आगम-संपादन नै सारा सुधिजन शीश चढायो है, नव युग रै चिंतन रो प्रतिनिधि सत्साहित्य सुहायो है , हो संतां! प्रज्ञाचक्षु रा प्रेरक हदयोद्गार हो।।
122. कामधेनु है विश्वभारती, शिक्षण संस्था वरदाई, युग री मांग समण श्रेणी है, आ पुरखां री पुण्याई, हो संतां! युनिवर्सिटी मान्य करी भारत सरकार हो।। जै.वि.भा. जानदार हो।। समन्वित सात सकार हो, हो संतां! भैक्षव शासन री सुषमा सौरभदार हो। हो संतां! तेरापथ परिधी में सारो संसार हो।। बढो ज्यूं देवदार हो, जुगोजुग जय जयकार हो, गावो गीत सुप्यार हो।।
123. आषाढी पूनम निशा धम्म-जागरणा, जागरणा तेरापंथ-वृत्त-वागरणा, शुरुवात हुई है योगक्षेम बरस में, सुन्दर सुनियोजित वातावरण सरस में।।
124. तिण हित ओ 'तेरापथ प्रबोध' रच्यो है, स्वामीजी रै जीवन रो चित्र खच्यो है। संवत सहस्र दो उणपच्चास प्रवर है, आषाढ़ शु ल एकम अरु बुध वासर है।।
125. अठहत्तर वय आज, 'तुलसी 'गुरु करुणा तरुण। तेरापंथ समाज, शुभ भविष्य है सामनै।।
Roman Transliteration
Terapanth prabodh shraddha svikaro Terapanth ra adhidevta! shakti sancharo Terapanth shasan devta! tharai par mhari astha aparmpar ho, jan jivan adhar ho, hat tantri ra tar ho, marudhar ra mandar ho, Terapanth ra............
1. rajasthan gam kantaliy ashadhi teras ai, ballu sha dipan ghar jayo putra, phali hai punyai, ho santan satraisai tanyasi sanvat shrikar ho..
2. shubh muhurat men namakaran-sanskar sajhayo balak ro, bhikkhan bhikkhu bhav bharyo bhavi shasan-sanchalak ro, ho santan Mangal gitan ri ghar ghar men gunjar ho..
3. 'honhar viruvan chikna pat' bat vikhyat hai, 'uganto hi tapai tej ravi' udaharan navjat hai, ho santan pratibha utpattiya pai akar ho..
4. sikhi mahajni vidya ab mahajna nai mat karai, kin ri himmat bhikkhan agai isi bisi koi bat karai, ho santan bachapan men hi baludo tej tarar ho..
5. nanhi vay men hi bhikkhan shadi ri baji shahnai, bagdi men sasural sahachri saubhagan sugnibai, ho santan jai ik suta, sahaj simatyo parivar ho..
6. santa-satyan ri sajhai seva, karai Dharm ri sadhna, tattvik bol thokda sikhai adhyatmik aradhna, ho santan! jagi jagarna janyo jag nissar ho..
7. sahi sajodai diksha leni manomnan sankalpa karyo, tab lag shil sajode palan, o pin vrat avikalpa dharyo, ho santan! prarambhyo ekantar tap dukkarkar ho..
8. niyti yog patni viyog, nashvarta tan ri pahchani, 'samayam goyam, ma pamayae' mukhar hui agam-vani, ho santan! ab to kshan-kshan bhi bitai bhari bhar ho..
9. diksha ri anumti mangi, man sinh-sapan ri bat kahi, samjhavan anya raghuraja, ugyo hai parbhat sahi, ho santan! mokai ro mantar man par karagyo kar ho..
10. dipan bai! thanro beto dekh sher jyun gunjaila, dhujaila thar-thar kayar, o Karm katak syun jujhaila, ho santan! hogyo Bhikhan ro ab to bedo par ho..
11. ramacharanji bhikhanji rai maitri ro sambandh ho, ek sath vairag sadhnai ro kalpit anubandh ho, ho santan! ab bhi sauharda, sanehi sanvyavhar ho. ho santan! donun nirgun-puja ra pakshadhar ho..
12. Bhikhan Muni ban raghu-charnan men shastran ro svadhyay kare, kathni karni ro antar lakh manas men sanshay ubharai, ho santan! umadyo durvar jijnasa ro jvar ho..
13. raghuvar sochai-papbhiru vairagi jinasyun jijnasa, bado vinit bhakta hai, in syun hai moti-moti asha, ho santan! Bhikhan khinchai gahro shastran ro sar ho..
14. rajanagar mevai-jatra ro ayo avasar thavo, shankashil banya hai shravak, bhikhanji! ja samjhavo, ho santan! anachityo banagyo jagriti ro asar ho..
15. ja, dhirap syun chatrai syun sab nai liya prabhav men, shanka mul miti nahin to bhi bahagya bhabuk bhav men, ho santan! payo jas, bahudayo vanna vyavhar ho..
16. kun janai ke huyo, achanak rate tej bukhar chadhyo, siyo daho lagyo bhayanak bechaini ro var badhyo, ho santan! khulamyo ant:sphurna ro abhinav dvar ho..
17. utarai aj bukhar, paristhiti par main punarvichar karun, ho nishpaksha jinajna sammat sacho path svikar karun, ho santan! dhalagyo jvar, phalagyo asamay men sahkar ho..
18. harshavibhor bhor syun hi bhikkhan chintan men jor jutyo, Dharm dharmikan ri duravastha dekh kalejo kamp uthyo, ho santan! satapath-svikriti ro ghoshit kiyo karar ho..
19. shravak bag-bag, par raghuraja ro mud vichitra banyo, bhikkhan savinay shat kiyo Guru manas tivra tanav tanyo, ho guruvar! chintan mangai apano achar vichar ho..
20. bhikkhan! bat sahi hai pin pancham are ri kathinai, 'panch vachan shirmathe, par parnalai ki si' sthiti ai, ho santan! karno ke? apas men n badhai takrar ho..
21. ek or agam hai, ek or Guru ro apanatva hai, par siddhantan, sachchai ro sab syun badon mahattva hai, ho santan! ekai bin ho jyavai bindyan bekar ho..
22. sochyo, sahi-sahi batan kyun nahin Guru svikarsi, 'kar kangan akhyan syun dikhai, phir ke karsi arasi?' ho santan! vistrit varta bhi asaphal akhirkar ho..
23. abhinishkraman karyo 'sthanak syun' , sun avak rahagya sara, bhikhanji-sa sant viragi huya Sangh syun kyun nyara? ho santan! charcha chautarphi bagdi rai bajar ho..
24. an-duhai phiri Sangh ri, sthan nahin deno annai, denaivalai par jurmano sunalyo sai chodai-chhanai, ho santan! baitha sab shravak man men kardi dhar ho..
25. karan vyar chhoda bagdi nai, nirnay le chalya pur syun, kartan hi prasthan, uthyo tuphan parishah o dhur syun, ho santan! 'ekani nadi aur ekani nhar' ho..
26. aj rat shamsan vas, kar mato padharya chhatri men, sahas shikhar chadhyo babai ro, jagyo poras khatri men, ho santan! poras rai agai manai sagla har ho..
27. puri rat bitai chintan men, ab agai ke karno? kyun darno kashtan syun, hai 'chattari Mangal' ro sharno, ho santan! apani atma hi apani pahredar ho..
28. raghuvar ay bakarai bhikhanji! the karo n nadani, ago tharo pichho mharo, nahin chalaila manmani, ho bhikkhan! pag pag par log lagasyun tharai lar ho..
29. ashirvad rup men li gurubani jo abhishapamyi, dipan man nai yad kari, dilgiri dekh vilapamyi, ho santan! virochit virvritti ro o vyapar ho..
30. bagdi syun badlu men Guru-chelan bich charcha khub chhidi, jodhanai men gerulalji vyas jisyan ri kadi judi, ho santan! 'bhavi-bilade' ayo ek ubhar ho..
31. kishnoji sut ro kar pakadyan kathin samasya kari khadi, run-run men sanvriyo basiyo alag rahun nahin ek ghadi, ho santan! sumpya jayamal nai, tinun gharan bahar ho.. gavo git supyar ho..
32. jodhanai ri hatan men shravak Samayik le baitha, sthanak chhod athai Samayik, kani bat hui ke' tha? ho santan! puchhai divan batao beraivar ho..
33. karan hat baithya Samayik, mhe sai sthanak ne chhodyo, Dharm-kranti a Guru bhikkhan ri, nai disha men munh modyo, ho santan! o hai mantavya, o asali achar ho..
34. tera shravak, bhikhanji rai sathi tera sant hai, tera hi hai niyam, sabhi mil sundar Terapanth hai, ho santan! tukko, sevag ro payo shighra prasar ho..
35. sun chaunkya svamiji, phir manthanpurvak manjur kiyo, 'he prabho! yah Terapanth' pathik mhai sanshay dur kiyo, ho santan! vandan-mudra men bolya barmbar ho..
36. marudhar syun mevad kelva ri dharti par panv dharya, milyo nahin avas vas hit, man samta ra bhav bharya, ho santan! andheri ori ro hono nistar ho..
37. jinamndir men jaksha Dev-krit kadi kasauti par hui, sahi salamat dekh savarai 'sabki ankhyan chyar hui , ho santan! sarai pur hogyo terapath svikar ho..
38. ashadhi punam ri sandhya bani abandhya itihasi, li sotsah sabhi nav diksha sumarat arhat avinasi, ho santan! kun-si ba bela pala ai avikar ho..
39. Terapanth sthapna din ri aj svayam shuruvat hui, are panchme arai chauthe arai ki-si bat hui, ho santan! ghano suhavai dipan mat dular ho.. gavo git supyar ho..
40. labhalabhe suhe duhe jinai marnai men sam rahno, ninda aur prashnsa samta syun apaman man sahno, ho santan! dharyo sanjam ro path talvar dudhar ho..
41. svagat hai abhyagat! khullo parishhan nai amantran, meru si unchai sagar gahrai so sadhyo pran, ho santan! gavo sangit svar lahri sanchar ho..
42. panch varas tak mili nahin jivan-yapan ri suvidhavan, pali ghi, ghi sahit ghat li, aganit hai au ghatnavan, ho santan! pavas bich men hi karno padyo vihar ho..
43. pag pag par avarodh, virodhi vatavaran rahyo badhto, janta pratibodhan ro sapno kathai kiya shikhran chadhto, ho santan! linho atapna sambal sabhar ho..
44. dhammagiri, tarni tapasvini ro bo sin niharan mhe, 'mar pura desyan tap jap syun atam karaj saran mhe , ho santan! ai hai kshanik nirasha ek bar ho..
45. sujhbujh thirpal phatai ri likhijsi svarnakshar men, sambodhanpurvak udbodhan diyo surngo susvar men, ho santan! 'badliyo ankhadalyan barasyo' ikadhar ho.. gavo git supyar ho..
46. ho adesh tapasya ro, mhannai mhanro adhikar milai, jan udbodhan kam aparo, janta ro upahar milai, ho santan! mani santan ri antaraman manuhar ho..
47. prarammyo abhiyan dubara, log nikat avan lagya, akarshan badhagyo darasan men, pad parasan syun bhram bhagya, ho santan! phalagyo ashirvar 'log lagasyun lar' ho..
48. tirath tin dekh jan bolya ladu hai khando tharo, khando bhale choguni ro hai, thirta rakho susta ro, ho santan! satiyan ri diksha ro adabhut ikarar ho..
49. atathare satrai syun battisai lag visham bagat bityo, thodai parikar men bhi Swami jabar jang so hai jityo, ho santan! din ro khano nishi sono bhi dushvar ho..
50. tera man syun sat gaya, chhav rahma param parmarthapakhi, thir thirpal phate.bhi.bhari.har.tokar. abhidhan akhi, ho santan! agai syu agai ab badhsi vistar ho..
51. battisai migasar bid satam sanvidhan ro likhat likhyo, bharimal rai khandhan par bhavi shasan ro bhar tikyo, ho santan! chhotai sai kagaj men kalma kaldar ho.. ho santan! 'bhari maryada bandhi', git supyar ho..
52. sanvidhan suvidhan banakar sab santan nai avagti di, alag-alag dikhla sara ri hardik bhave sahamti li, ho santan! nutan adhyatma tantra ro avishkar ho..
53. bharimalji to bhola, in padvi jog tilok hai, sahi nahin nirvachan, bolya chandrabhan berok hai, ho santan! banagya khud suripad ummidvar ho..
54. suni bat svamiji, sahajyan shabda vadan syun nikalyo, suri nahin to surdas pad shayad, bo bhi hai phalyo, ho santan! naisargik vachan siddhi ro sakshatkar ho..
55. anushasan adhar Sangh ro, anushasan hi pran hai, anushasan hai panth pragti ro, anushasan hi tran hai, ho santan! 'jyotirmay chinmay dip' harai andhar ho.. gavo git supyar ho..
56. hem hajari siriyari ro banyo vimal dil veragi, samai samai shubh seva sajhai bhikkhan-charnan lau lagi, ho santan! takataki men kyun betho avichar ho..
57. 'are hemda! diksha lesi ke tu mharai maryan pachhai- ya jite ji', bolya Bhikshu kah dai tharai jisi jachai, ho santan! lalchavai yun mhannai kyun uthasvar ho..
58. dori lagi lajya jagi tyag kiya ab shadi ra, jiydo jagagyo sadhapnan men jagamagagya divla ghi ra, ho santan! atatharai tepan men diksha sanskar ho..
59. sankhya ghati n santan ri, hai hayo hem ro pagphero, svamiji syun gunthyodo jivanpothi ro har pero, ho santan! vidyaguru Jayacharya manya nirdhar ho..
60. gunasatthai ma sud satam antim maryadapatra hai, maryadotsav ro nimitta maryadamay ganachhatra hai, ho santan! Bhikshu shasan ro saro daramdar ho..
61. ek huvai Acharya Sangh men sahi ek samachari, parupna ro panth ek-so nahin koi thari mhari, ho santan! shaili alabeli chhutyo svechchhachar ho.. gavo git supyar ho..
62. sarvabhaum siddhant ghoshna kari abhay ho svamiji, jinvani par purna samarpit asthamay ho svamiji, ho santan! deta hi rahya Dharm nai nayo nikhar ho..
63. poshan jathai asanjam ro bo dan dan hai, Dharm nahin, marai ekan ne puchkarai, rosh rag hai Dharm nahin, ho santan! shivapath men sadhan ri shuddhi anivar ho..
64. arhat ajna Dharm, anajna adharam khari kasauti hai, dhan syun Dharm kharidijai, a shraddha jad syun khoti hai, ho santan! balajabri chalai n dharmik karobar ho..
65. punya bandh dharmik karni syun, keval punya svatantra nahin, naj bina tudi paida karnai ko koi tantra nahin, ho santan! laukik lokottar donun prithak prakar ho..
66. dhup dip phal-phul adi syun pratima puja Dharm nahin, alamban bannai syun pujniy ho, jinamat marma nahin, ho santan! nikshepo sthapna nirgun akar ho..
67. shvetambar agam astha par mhe charitra nibhavan han, aur Dharm upakaran rup men vastra patra apanavan han, ho santan! murchchha nahin manya, paduttar dharphar ho..
68. agam parampara syun prapta satya par dil dridhtai ho, apanai siddhantan men nahin shithilta rai pai ho, ho santan! man ki majbuti kar dai khevo par ho..
69. chalu shabda samanvay kyun ho kin par hi akshep kahin, bematalab par-mantavyan men karno hastakshep nahin, ho santan! samuchit sapekshavad ro o upahar ho..
70. navapdartha, anukampa, shraddhachar, vratavrat chaupai, barahavrat, nikshep, vinit, vipul sahitya padho bhai, ho santan! bhikkhu drishtanta to hivdai ro har ho..
71. likhi shil ri bad, ras talokar ekal ri dhalan, agam ra akhyan, thokda savdhan ho sambhalan, ho santan! apanai jug ra sarvottam sirajanhar ho..
72. charchavadi, kushal-prashasan, mimansak, sangayak ha, purush parikshak aur samikshak navya niti nirnayak ha, ho santan! pragatyo koi ek nayo udyotkar ho.
73. jivan bhar yayavar Swami sathe aya siriyari, kachchi pakki hatan men pavas ri puri rijhvari, ho santan! pratidin vyakhyan gochri shram sahchar ho.. gavo git supyar ho..
74. siriyari men pray ath sau oli terapanthyan ri, thakur daulatsinh hriday men hari bhari shraddha kyari, ho santan! sammukh hai parvatmala ro prakar ho..
75. savan sud pakh men svamiji ri kaya kamjor padi, anna aruchi hai aur apach hai to bhi mehanat karai kadi, ho santan! tar tar tan chhijai amay apratikar ho..
76. bhadrav shukla choth din shishyan nai svamiji batlavai, bharimal, tokarji aur khetsiji nai virudavai, ho santan! palyo sanjay jo nirmal niraatichar ho..
77. lagai ab ayushya nikat hai, par n maut ro bhay mharai, rahi n koi unayat dekho chahe bhitar barai, ho santan! anasanamay jivan ro ab upasnhar ho..
78. rayachanda! tu buddhiman balak hai, poti chhoti hai, moh nahin kijai mharai syun, a hi badi kasauti hai, ho guruvar! main kyun mohakul ap karo uddhar ho..
79. sant khetsi bolai Swami! ap padharo svargan men, svarga! manai nahin svarga chahijai, mat ulajho the bhi amen, ho santan! pudgal sukh bhugatya jiv ananti bar ho..
80. pancham chhamachchhari din Swami chauvihar upavas karyo, chhatta parno karyo alpa so, bo bhi bilkul nahin jaryo, ho santan! kachi kaya ra au hi negchar ho..
81. satam atham navmi dashmi alpa ar ashvas liyo, ekadashmi amit atmabal syun Swami upavas kiyo, ho santan! baras belai re din antar udgar ho..
82. bharamalla nai mhan jyun manijyo the antar bhav syun, papbhiru uttam prani hai, patadhar atma prabhav syun, ho santan! rahijyo aradhta ingit akar ho..
83. het paraspar rakhijyo, mat ogun kin ra dhundhajyo, diksha dekh dekh nai dijyo jin tin nai mat mundajyo, ho santan! mamat chelan ri le dubai majhdhar ho..
84. tola ra talokran ro talno samparka hai, apachhndan ro, avinita ro hovai bedo garka hai, ho santan! ajna maryada apani yadgar ho..
85. pakki hat padharya Swami pagan chal din dopharan, 'pudagal khin padai hai bhante!' to lyo anasan svikaran, ho santan! pachakhyo santharo unchai svar tivihar ho..
86. lok hajaran bhakti bhav syun darshan khatir avai hai, sarthak aur saphal yatra, gun mukta kanth syun gavai hai, ho santan! apani takdir saravai sau-sau bar ho..
87. biti baras rat prat teras ro ab o udiyayo, chadhyan prahar din jal arogyo, pachhe achanak pharmayo, ho santan! avai hai santa satyan javo pur-bar ho..
88. muhurat bad Muni venoji aur kushaloji aya, bagtu, jhuma, dahi satiyan Guru darshan kar sukh paya, ho santan! janak upajyo hai avadhijnan udar ho..
89. podhayan nai der hui tab sant bithaya Swami nai, dhyanasan men dhyanlin nij atanr atma rai chinhai, ho santan! jhigmigati terah khandi mandi tyar ho..
90. sui khasoli pagdi men sampurna kam, darji bolyo, der lakhavai svamiji rai, kahtan hi ambar dolyo, ho santan! sathe bhadudi teras mangalvar ho.. gavo git supyar ho..
91. param samadhi men svamiji sat por ro santharo, 'siriyari ro sant' ant tak dekhayo chotho aro, ho santan! umadi hai janta, bhaktan ri bharmar ho.. gavo git supyar ho..
92. dhammagiri ri punya taleti tapasvini sarita char men, karai charam sanskar svam ro, ojasvi unchai svar men, ho santan! dharni-ambar men jay jay ki dhunkar ho..
93. do 'ri lagi ghanan nai pan jati hirvijai dilgir banya, mharai prashnan ro uttar ab kun desi? gambhir banya, ho santan! puchhyo nij ishtadev smriti men sambhar ho..
94. kahai Dev-'simandhar samavasaran' syun sidho ayo hun, svarga sidhaऱya bhikhanji vishvasta khabar main lyayo hun, ho santan! pancham svargadhip vaibhav ro ambar ho.. ho santan! 'shasan prabhakar'syun mhai liyo udhar ho..
95. ghor virodhi bhi bolai-bo santa ajab ho alabelo, siddhantan ko sathi, chhodyo kade nahin apano gelo, ho santan! sahjogi judyo kaphilo jordar ho..
96. unapachchas sant Swami yug men chhappan satiyan sari, attharah satrai gan bahar, shesh rahya sanyamdhari, ho santan! shraddhalu shravak sankhya shandan ho..
97. chammalis baras ro puro svamiji ro bartaro, jinshasan ri ab badhai chamakyo terapath taro, ho santan! bhav-bhav men kyunkar bhulan o abhar ho..
98. Om Bhikshu-jay Bhikshu' Mantra o vighnaharan mangalkari, jan-man rochak, sankat-mochak sukhkari bhavabhayhari, ho santan! gungo bhi baulai, pangu chadhai pahad ho..
99. punya porsa svamiji nij kar syun jo virvo ropyo, pidhi dar pidhi sinchan syun ban shatshakhi had opyo, ho santan! mausam-mausam ra phal, taru chhayadar ho..
100. 'bhagi bharamalla' guruvar ro ashirvar mungha-molo, rahyo chhatra ban sir par, ayo nahin kahin unhon jholo, ho santan! bhari patdhari dipyo divya didar ho..
101. udaypuri ghatna men kesar bhandari ro chitra banyo, bharimal bartare anushasan ro vritta vichitra banyo, ho santan! Bhikshu sahitya ra sundar lipikar ho..
102. bharimalji ri gadi par rayarishiji raj karyo, 'tabar manai n samjho koi' bainya hi ogaj karyo, ho santan! chamakya suraj sa bhaikshav gan gignar ho..
103. janam liyo phadi bhumi par? sher gupha men hi janmai, sinh-vritti syun sanyam palyo, masta rahma apanaipan men, ho santan! jivan jiyo ban jyotirmay angar ho.. gavo git supyar ho..
104. svamiji svargastha, jit ro janam, jugal marudhar-dhori, panth pragti par rahi ek-si sanvriyai ri thir thyori, ho santan! jan bhasha men 'shri jay' Bhikhan ra avatar ho..
105. Jayacharya anivarya rup shasan ro kayakalpa karyo, gadhyo nayo itihas khas sarthak svikrit sankalpa vararyo, ho santan! vajrasan mudra men judto darbar ho, ho santan! bhaikshav-vanmay ra bhasvar bhashyakar ho..
106. mahasti sardaranji ri diksha shiksha jay kar syun, diyo vipul samman Sangh men, nari kyun hai kam nar syun, ho santan! bandhu triputi syun hogyo gan guljar ho..
107. maghji punyavan hai, mharai pandit hai, jay shabda kahya, attarai gyarai barsan lag yuvacharya Acharya rahya, ho santan! nirmal nirmayi nishchhal nirahnkar ho..
108. bhagi bhai donun pai kala satya-sandhan ki, atma vijeta nav nachiketa vitrag ri bangi, ho santan! jug ra ajatashatru Maghava jagtar ho.. gavo git supyar ho..
109. jaypur ro jauhri hai, kiyo parikshan kshan men jaigni, lala lichhamanji syun jachyo munghamolo o mani, ho santan! bhavi magh patdhari Manak anagar ho..
110. ati vishvas Dev jyotish ko huvai ahitakar kam besi, sakriy shikshan sada Sangh nai Manak-yug deto resi, ho santan! shasan sambhalyo var sanvatsar chyar ho.. gavo git supyar ho..
111. saptam pat adhikari prabhutadhari dalim devta, tejasvi Acharya aryajan dur dur syun sevta, ho santa! ojasvi vani, karta ugra bihar ho..
112. apanai path par badho nirantar pado n khalta khod men, kahta dalim sovo sukh bhar sat hath ri sod men, ho santan! chhodya sahni padsi phanadhar phunkar ho.. gavo git supyar ho..
113. Maghava ki-si akriti Maghava pratikriti mam jivan jyoti, karuna ri ikalauti murat, Kalu kaya kaldhauti, ho santan! sanchit punyai ro nahin ar-par ho..
114. diksha men shiksha men, samay-samiksha men agavani ki, gan men boya bij pragti ra, janak bhavishyavani ki, ho santan! shasta-so shasan, mat pita-so pyar ho..
115. ath pat ri sakal sampda sumpi mujhnai shrikalu, main manun mhari gatividhi men sada sahayak shrikalu, ho santan! yug nai parakhan ri di drishti dildar ho..
116. Mahapragya sa yuvacharya sahyogi hai har bat men, chhaya banakar rahai sath nishi vasar yatayat men, ho santan! mahashramni Mahashraman sab sajhidar ho..
117. shri sardar gulab navalasti jethan kankumari hai, jhamkuji ladanji Kanakprabha kesar ki kyari hai, ho santan! Sadhvipramukha shramnigan men shrringar ho..
118. manviy mulyan ri jagarnan, jivan ro sattva hai, naitikta-sanyukta dharam ri vyakhya abhinav tattva hai, ho santan! Anuvrat-achar-sanhita agadnkar ho.. gavo git supyar ho..
119. dhyan dharam ro pranbij ho, pato nahin kyun chhutagyo? apano rup niharai jinmen, janak darpan tutagyo, ho santan! Preksha tin parampra ro punruddhar ho.. gavo git supyar ho..
120. shiksha aj samasya bangi sabki ek jaban hai, samadhan apan nai milagyo jo jivan-vijnan hai, ho santan! sanskriti-sanrachna ro o sutradhar ho.. gavo git supyar ho..
121. agam-sampadan nai sara sudhijan shish chadhayo hai, nav yug rai chintan ro pratinidhi satsahitya suhayo hai , ho santan! prajnachakshu ra prerak hadyodgar ho..
122. kamdhenu hai vishvabharti, shikshan sanstha vardai, yug ri mang saman shreni hai, a purkhan ri punyai, ho santan! yunivarsiti manya kari bharat sarkar ho.. jai.vi.bha. jandar ho.. samanvit sat sakar ho, ho santan! bhaikshav shasan ri sushma saurabhdar ho. ho santan! terapath paridhi men saro sansar ho.. badho jyun devdar ho, jugojug jay jaykar ho, gavo git supyar ho..
123. ashadhi punam nisha dhamma-jagarna, jagarna Terapanth-vritta-vagarna, shuruvat hui hai yogakshem baras men, sundar suniyojit vatavaran saras men..
124. tin hit o 'terapath prabodh' rachyo hai, svamiji rai jivan ro chitra khachyo hai. sanvat sahasra do unapachchas pravar hai, ashadh shu l ekam aru budh vasar hai..
125. athahattar vay aj, 'Tulsi 'Guru karuna tarun. Terapanth samaj, shubh bhavishya hai samnai..