माटी री मूरत है काया, क्यूं तूं देख लुभायो?
Mati Ri Murat Hai Kaya, Kyun Tun Dekh Lubhayo?
1455
माटी री मूरत है काया, क्यूं तूं देख लुभायो? — Lyrics
माटी री मूरत है काया, क्यूं तूं देख लुभायो? किंवाड़ी खोल हियै री। झूठी सारी ममता-माया, थोथै भरम भुलायो, किंवाड़ी खोल हियै री।
१. जीणो है थोड़ो-सो, किसी बात पर तं बण्यो आकरो? खावै पंसेरी री, फेंकै जो दूजां ऊपर कांकरो। करै जको ही भरै जगत् में, क्यूं तूं समझ न पायो?
२. ढीलो भलाई में तूं, घणो है बुराई में उंतावळो। स्याणो कहावै कोरो, कामां स्यूं लागै पूरो बाबळो। सुळझण चाल्यो पण उळझण में, खुद नै खूब फंसायो।।
३. टिम-टिम करतो थारो, दियो जिन्दगी रो बुझ जावैला। अंधेरो घिरैला जद, कोई न पूछण वाळो आवैला। सुख रो ही साथी जग सारो, दुख स्यूं है घबरायो।।
४. चालै है सांस जित्तै, सघळां मै लागै तूं सुहावणो। रुकतां ही होवैला, हर पल भारी अलखावणो। 'बुद्व' हुवैला साथी थारो, जो पुण्य-पाप कमायो।।
Roman Transliteration
mati ri murat hai kaya, kyun tun dekh lubhayo? kinvadi khol hiyai ri. jhuthi sari mamta-maya, thothai bharam bhulayo, kinvadi khol hiyai ri.
1. jino hai thodo-so, kisi bat par tam banyo akaro? khavai panseri ri, phenkai jo dujan upar kankro. karai jako hi bharai jagat men, kyun tun samajh n payo?
2. dhilo bhalai men tun, ghano hai burai men untavlo. syano kahavai koro, kaman syun lagai puro bablo. sulajhan chalyo pan ulajhan men, khud nai khub phansayo..
3. tim-tim karto tharo, diyo jindagi ro bujh javaila. andhero ghiraila jad, koi n puchhan valo availa. sukh ro hi sathi jag saro, dukh syun hai ghabrayo..
4. chalai hai sans jittai, saghlan mai lagai tun suhavno. ruktan hi hovaila, har pal bhari alakhavno. 'budva' huvaila sathi tharo, jo punya-pap kamayo..