सिरियारी रो संत
Siriyari Ro Sant
71
सिरियारी रो संत — Lyrics
तेरापथ रो भाग्य-विधाता श्रमण संघ रो सक्षम त्राता लाखां आंखड़ल्यां रो तारो हार हिया रो लागै। म्हांनै सिरियारी रो संत प्यारो-प्यारो लागै॥
सत्य सिराणै सदा राखतो, त्यागी सारी सुविधावां, जिनवाणी पर जीवन-जामा, झोंक्या बलिहारी जावां, बणी साधना सिद्धि स्वयं ही, चीर चल्यो सब बाधावां, आत्म-समर रै अमर वीर री, म्हे गौरव गाथा गावां, पावां सुमिरण स्यूं सुखसाता, बण ज्यावां हां ताजा-माता, दाता ज्ञान-चक्षु रो, सूरज सो उणिहारो लागै॥
त्याग तपोबल प्रबल मनोबल, चकित-चकित मानव रहग्या, खड़ग्या हुया अवरोध जिता ही, अपणै आप सभी ढहग्या, प्रतिस्रोत में बढ्यो भले ही, अनुस्रोत में सब बहग्या, पुण्य पोरसो तेज भोर-सो, घोर विरोधी भी कहग्या, मन संकल्प-शक्ति ही भारी, धार्मिक जन जुग-जुग आभारी, मावस रात में बो पूनम सो उजारो लागै॥
पंथ चलाणो लक्ष्य नहीं हो, चल्या चरण बस पंथ बण्यो, कुण जाणै किण पुळ में दीपां मां अलबेलो पुत्र जण्यो, बचपन स्यूं बूढ़ापै तांई रह्यो सुरंगो बण्यो-ठण्यो, ढिगला-ढिगला रतन निकाल्या, नहीं निरर्थक पहाड़ खण्यो, शासन में अनुशासन थाप्यो, मानदण्ड स्यूं जाय न माप्यो, व्याप्यो जन-जन रै मन-मन में मोहनगारो लागै॥
बिन वैराग भेष साधू रो, भार गधै पर हाथी रो, काच मिणकलो कठै, कठै बो अणमोलो संयम हीरो, बड़ै घराणै रो चाहे वैधव्य सरावै कुण कीं-रो, समझदार समझै है खोटै सिक्कै री कीमत जीरो, आ है सांवरियै री वाणी, अनुभव रै छकणै स्यूं छाणी, कानां घणी सुहाणी झालर-सो झणकारो लागै॥
संविधान जद गढ्यो, बढ्यो जस, हुई बगावत भी सागै, घबराहट रो काम नहीं, चढ़ चल्यो स्वयं नाजुक धागै, चंदो वीरो, चंदु वीरां फत्तू च्यारां रै सागै, भेळो आ'र नहीं थारै म्हारै जो पैर धर्यो आगै, रुकग्या चरण सतजुगीजी रा, सुणता रेग्या संत सधीरा, आंखै झांखै बाबलिये रो काम करारो लागै॥
तू कद दीक्षा लेसी? जब तक जिवै मेरण्यां मगरै री, दुलहिन रोवै न्याय, दूल्हो रोवै कुण सी दुविधा हेरी, सुण्यां बात संजम री ताव चढ़ै तब दीक्षा में देरी, एक मर्यां दोन्यां नै लेणी पड़सी अणसण री सेरी, इण विध कर कर कड़ी कसौटी, चुपकै खींची सब री चोटी, ज्यूं-त्यूं मूंडणो बाबै नै जैर खारो लागै॥
आज्ञा धर्म अनाज्ञा अधरम चल्यो सफल अभियान जो, सही समझ दी धार्मिक जग नै, ओ मोटो अवदान जो, जाग्रत जीवन जीयो राखी, सम्मुख साध्य महान जो, प्राप्त अतीन्द्रिय ज्ञान, अपूरब साहस रो संधान जो, इच्छा मृत्यु वरी ज्योतिर्धर, पद्मासन में समता निर्झर, स्वामी भवसागर रो जाणक लियो किनारो लागै॥
संवत दो हजार उणचालीस सन् बैंयासी खास है, वरसां स्यूं आश्वासित पायो राणावास प्रवास है, नव-निर्वाचित आया राष्ट्राध्यक्ष स्वयं सोल्लास है, निर्वाणोत्सव रो ज्ञानीजी गढ्यो अजब इतिहास है, मेहरा राज्यपाल रस पावै, माथुर मुदित मुदित गुण गावै, जनता सरिता में न समावै, कांठै री कलियां खिल ज्यावै, गगन धरा गुंजावै जय भिक्षु रो नारो लागै॥
चंदन बैद वित्त मंत्री, शिक्षा मंत्री विख्यात है, श्रावक-निष्ठा-पत्र पढ्यो आ नई हुई शुरूआत है, दीक्षा-सीन नवीन निहारो म्हारो यातायात है, आस्थामय उपवास हजारां सारो संघ सनाथ है, हेम-मातृभूमी सिरियारी, भिक्षु-तपोभूमी सिरियारी, अंतिम अनशन स्थल सिरियारी, स्वाम-समाधिस्थल सिरियारी, श्रद्धानत ठाकुर सिरियारी, तुलसी सिरियारी रो निरखण जिस्यो निजारो लागै॥
Roman Transliteration
terapath ro bhagya-vidhata shraman Sangh ro saksham trata lakhan ankhadalyan ro taro har hiya ro lagai. mhannai siriyari ro sant pyaro-pyaro lagai..
satya siranai sada rakhto, tyagi sari suvidhavan, jinvani par jivan-jama, jhonkya balihari javan, bani sadhna siddhi svayam hi, chir chalyo sab badhavan, atma-samar rai amar vir ri, mhe gaurav gatha gavan, pavan sumiran syun sukhsata, ban jyavan han taja-mata, data jnan-chakshu ro, suraj so uniharo lagai..
tyag tapobal prabal manobal, chakit-chakit manav rahagya, khadagya huya avarodh jita hi, apanai ap sabhi dhahagya, pratisrot men badhyo bhale hi, anusrot men sab bahagya, punya porso tej bhor-so, ghor virodhi bhi kahagya, man sankalpa-shakti hi bhari, dharmik jan jug-jug abhari, mavas rat men bo punam so ujaro lagai..
panth chalano lakshya nahin ho, chalya charan bas panth banyo, kun janai kin pul men dipan man alabelo putra janyo, bachapan syun budhapai tani rahyo surngo banyo-thanyo, dhigla-dhigla ratan nikalya, nahin nirarthak pahad khanyo, shasan men anushasan thapyo, manadanda syun jay n mapyo, vyapyo jan-jan rai man-man men mohangaro lagai..
bin vairag bhesh sadhu ro, bhar gadhai par hathi ro, kach minaklo kathai, kathai bo anamolo sanyam hiro, badai gharanai ro chahe vaidhavya saravai kun kin-ro, samajhdar samjhai hai khotai sikkai ri kimat jiro, a hai sanvriyai ri vani, anubhav rai chhaknai syun chhani, kanan ghani suhani jhalar-so jhankaro lagai..
sanvidhan jad gadhyo, badhyo jas, hui bagavat bhi sagai, ghabrahat ro kam nahin, chadh chalyo svayam najuk dhagai, chando viro, chandu viran phattu chyaran rai sagai, bhelo a'r nahin tharai mharai jo pair dharyo agai, rukagya charan satjugiji ra, sunta regya sant sadhira, ankhai jhankhai babliye ro kam kararo lagai..
tu kad diksha lesi? jab tak jivai meranyan magrai ri, dulhin rovai nyay, dulho rovai kun si duvidha heri, sunyan bat sanjam ri tav chadhai tab diksha men deri, ek maryan donyan nai leni padsi anasan ri seri, in vidh kar kar kadi kasauti, chupkai khinchi sab ri choti, jyun-tyun mundno babai nai jair kharo lagai..
ajna Dharm anajna adharam chalyo saphal abhiyan jo, sahi samajh di dharmik jag nai, o moto avadan jo, jagrat jivan jiyo rakhi, sammukh sadhya mahan jo, prapta atindriy jnan, apurab sahas ro sandhan jo, ichchha mrityu vari jyotirdhar, padmasan men samta nirjhar, Swami bhavsagar ro janak liyo kinaro lagai..
sanvat do hajar unachalis san bainyasi khas hai, varsan syun ashvasit payo ranavas pravas hai, nav-nirvachit aya rashtradhyaksha svayam sollas hai, nirvanotsav ro jnaniji gadhyo ajab itihas hai, mehra rajyapal ras pavai, mathur mudit mudit gun gavai, janta sarita men n samavai, kanthai ri kaliyan khil jyavai, gagan dhara gunjavai jay Bhikshu ro naro lagai..
chandan baid vitta mantri, shiksha mantri vikhyat hai, shravak-nishtha-patra padhyo a nai hui shuruat hai, diksha-sin navin niharo mharo yatayat hai, asthamay upavas hajaran saro Sangh sanath hai, hem-matribhumi siriyari, Bhikshu-tapobhumi siriyari, antim anashan sthal siriyari, svam-samadhisthal siriyari, shraddhanat thakur siriyari, Tulsi siriyari ro nirakhan jisyo nijaro lagai..