सिरियारी रो संत
Siriyari Ro Sant
2371
सिरियारी रो संत — Lyrics
सिरियारी रो संत तेरापंथ रो भाग्य-विधाता श्रमण संघ रो सक्षम त्राता लाखां आंखड़ल्यां रो तारो हार हिया रो लागै। म्हानै सिरियारी रो संत प्यारो-प्यारो लागै।।
1. सत्य सिराणै सदा राखतो, त्यागी सारी सुविधावां, जिनवाणी पर जीवन-जामा, झोंक्या बलिहारी जावां, बणी साधना सिद्धि स्वयं ही, चीर चल्यो सब बाधावां, आत्म-समर रै अमर वीर री, म्है गौरव गाथा गावां, पावां सुमिरण स्यूं सुखसाता, बण ज्यावां हां ताजा-माता, दाता ज्ञान-चक्षु रो, सूरज सो उणिहारो लागै। म्हांनै सिरियारी रो संत प्यारो-प्यारो लागै।।
2. त्याग तपोबल प्रबल मनोबल, चकित-चकित मानव रहग्या, खड्या हुया अवरोध जिता ही, अपणै आप सभी ढहग्या, प्रतिस्रोत में बढ़यो भले ही, अनुस्रोत में सब बहग्या, पुण्य-पोरसो तेज भोर-सो, घोर विरोधी भी कहग्या, मन संकल्प शक्ति ही भारी, धार्मिक जन जुग-जुग आभारी, मावस रात में बो पूनम-सो उजारो लागै। म्हांनै सिरियारी रो संत प्यारो-प्यारो लागै।।
3. पंथ चलाणो लक्ष्य नहीं हो, चल्या चरण बस पंथ बण्यो, कुण जाणै किण पुळ में दीपां मां अलबेलो पुत्र जण्यो, बचपन स्यूं बुढ़ापे तांई, रह्यो सुरंगो बण्यो-ठण्यो, ढ़िगला-ढ़िगला रतन निकाल्या, नहीं निरर्थक प्हाड़ खण्यो, शासन में अनुशासन थाप्यो, मानदण्ड स्यूं जाय न माप्यो, व्याप्यो जन-जन रै मन-मन में मोहनगारो लागै। म्हांनै सिरियारी रो संत प्यारो-प्यारो लागै।।
4. बिन वैराग भेष साधू रो, भार गधै पर हाथी रो, काच मिणकलो कठै, कठै बो अणमोलो संयम-हीरो। बड़ै घराणै रो चाहे वैधव्य सरावै कुण कीं रो, समझदार समझै है खोटे सिक्के री कीमत जीरो, आ है सांवरियै री वाणी, अनुभव रै छकणै स्यूं छांणी, कानां घणी सुहाणी झालर-सो झणकारो लागै। म्हांनै सिरियारी रो संत प्यारो-प्यारो लागै।।
5. संविधान जद गढ़यो बढ़़यो जस, हुई बगावत भी सागै, घबराहट रो काम नहीं, चढ़ चल्यो स्वयं नाजुक धागै। चंदो वीरो चंदू वीरां फत्तू च्यारां रै ठागै, भेळो आ' र नहीं थारै म्हारै जो पैर धरयो आगै। रुकग्या चरण सतजुगी जी रा, सुणतां रेग्या संत सधीरा, आंखे झांखे बाबलियै रो काम करारो लागै। म्हांनै सिरियारी रो संत प्यारो-प्यारो लागै।।
6. तूं कद दीक्षा लेसी, जब तक जिवै मेरण्यां मगरै री, दुलहिन रोवै न्याय, दूल्हो रोवै कुण-सी दुविधा हेरी। सुण्यां बात संजम री ताव चढ़ै, तब दीक्षा में देरी, एक मरयां दोन्यां नै लेणी पड़सी अणसण री सेरी। इण विध कर कर कड़ी कसौटी, चुपकै खींची सब री चोटी, ज्यूं-त्यूं मूंडणो बाबै नै जे'र खारो लागै। म्हांनै सिरियारी रो संत प्यारो-प्यारो लागै।।
7. आज्ञा धर्म अनाज्ञा अधरम चल्यो सफल अभियान जो, सही समझ दी धार्मिक जग नै ओ मोटो अवदान जो। जाग्रत जीवन जीयो, राखी सम्मुख साध्य महान जो, प्राप्त अतीन्द्रिय ज्ञान अपूरब साहस रो संधान जो। इच्छा मृत्यु वरी ज्योतिर्धर, पद्मासन में समता-निर्झर, स्वामी भवसागर रो जाणक लियो किनारो लागै। म्हांनै सिरियारी रो संत प्यारो-प्यारो लागै।।
Roman Transliteration
siriyari ro sant Terapanth ro bhagya-vidhata shraman Sangh ro saksham trata lakhan ankhadalyan ro taro har hiya ro lagai. mhanai siriyari ro sant pyaro-pyaro lagai..
1. satya siranai sada rakhto, tyagi sari suvidhavan, jinvani par jivan-jama, jhonkya balihari javan, bani sadhna siddhi svayam hi, chir chalyo sab badhavan, atma-samar rai amar vir ri, mhai gaurav gatha gavan, pavan sumiran syun sukhsata, ban jyavan han taja-mata, data jnan-chakshu ro, suraj so uniharo lagai. mhannai siriyari ro sant pyaro-pyaro lagai..
2. tyag tapobal prabal manobal, chakit-chakit manav rahagya, khadya huya avarodh jita hi, apanai ap sabhi dhahagya, pratisrot men badhyo bhale hi, anusrot men sab bahagya, punya-porso tej bhor-so, ghor virodhi bhi kahagya, man sankalpa shakti hi bhari, dharmik jan jug-jug abhari, mavas rat men bo punam-so ujaro lagai. mhannai siriyari ro sant pyaro-pyaro lagai..
3. panth chalano lakshya nahin ho, chalya charan bas panth banyo, kun janai kin pul men dipan man alabelo putra janyo, bachapan syun budhape tani, rahyo surngo banyo-thanyo, dhigla-dhigla ratan nikalya, nahin nirarthak phad khanyo, shasan men anushasan thapyo, manadanda syun jay n mapyo, vyapyo jan-jan rai man-man men mohangaro lagai. mhannai siriyari ro sant pyaro-pyaro lagai..
4. bin vairag bhesh sadhu ro, bhar gadhai par hathi ro, kach minaklo kathai, kathai bo anamolo sanyam-hiro. badai gharanai ro chahe vaidhavya saravai kun kin ro, samajhdar samjhai hai khote sikke ri kimat jiro, a hai sanvriyai ri vani, anubhav rai chhaknai syun chhanni, kanan ghani suhani jhalar-so jhankaro lagai. mhannai siriyari ro sant pyaro-pyaro lagai..
5. sanvidhan jad gadhyo badhyo jas, hui bagavat bhi sagai, ghabrahat ro kam nahin, chadh chalyo svayam najuk dhagai. chando viro chandu viran phattu chyaran rai thagai, bhelo a' r nahin tharai mharai jo pair dharyo agai. rukagya charan satjugi ji ra, suntan regya sant sadhira, ankhe jhankhe babliyai ro kam kararo lagai. mhannai siriyari ro sant pyaro-pyaro lagai..
6. tun kad diksha lesi, jab tak jivai meranyan magrai ri, dulhin rovai nyay, dulho rovai kun-si duvidha heri. sunyan bat sanjam ri tav chadhai, tab diksha men deri, ek maryan donyan nai leni padsi anasan ri seri. in vidh kar kar kadi kasauti, chupkai khinchi sab ri choti, jyun-tyun mundno babai nai je'r kharo lagai. mhannai siriyari ro sant pyaro-pyaro lagai..
7. ajna Dharm anajna adharam chalyo saphal abhiyan jo, sahi samajh di dharmik jag nai o moto avadan jo. jagrat jivan jiyo, rakhi sammukh sadhya mahan jo, prapta atindriy jnan apurab sahas ro sandhan jo. ichchha mrityu vari jyotirdhar, padmasan men samta-nirjhar, Swami bhavsagar ro janak liyo kinaro lagai. mhannai siriyari ro sant pyaro-pyaro lagai..