ढाल : २
Dhal : 2
636
ढाल : २ — Lyrics
ढाल : २
हिवै मात पिता अञ्जना तणां, लगन लिखाविया मोटे मण्डाण क। विवाह करवा अञ्जना तणो, रतनपुरी वेग मेलियो जाण क। महोच्छव मंडियो अति घणो, बाज रह्या तिहां ढोल निशाण क। मंगल गावै छै गोरड़ी, उच्छव कर रह्या कोड़ कल्याण क।।स०।।१२।।
हिवै राय प्रह्लाद तेड़ाविया, जान में जावो बड़ा बड़ा राजान क। हय गय रथ सझिया घणा, नेतर्या स्वजन ने दियो घणो सनमान क। धन साथे दियो खरचवा, मोटे मण्डाण लेई चाल्या जान क! सामन्त दिया साथे घणा, जोधा सुभट सेना सावधान क।।स०।।१३।।
हिवै बीन बणाव कियो घणो, गेहणा आभूषण पहरिया ताय क। सखियां गावै रे सोहला, देवै आशीष केतुमती माय क।। लूण उतारै रे बैनड़ी, रूप देख मन हरषित थाय क। जाचक बोलै विरुदावली, इण विध पवनजी परणवा जाय क।।स०।।१४।।
सेना सिणगारी चतुरंगिणी, गाजै जी अम्बर बाजै जी तूर क। स्वजन सगा मिलिया घणा, जान चालै जाणै गंगा नो पूर क।। वर विद्याधर दीपतो, शोभ रह्यो तिणरो बदन सनूर क। चिहुं दिश साथे सेवक घणा, हाथ जोड़ी रह्या ऊभा हजूर क।।स०।।१५।।
महिन्दपुरी नेड़ा आविया, आई बधाई राजी हुवो राय क। दीधी बधामणी तेहने, हरषित हुई अञ्जना तणी माय क।। आरती नों महोच्छव करै, महिन्द राजा मन हरष न माय क। स्वजन सगा मिलिया घणा, सेना लेई राजा साहमो जी जाय क।।स०।।१६।।
महिन्द राजा साहमो आवियो, ढोल दमामा ने घूरे निशाण क। राजा हो राणी सहु मिल्या, व्यापियो तिमर ने आंथम्यो भाण क। सुसरो सामेलै आवियो, पवनजी देखने आनन्द थाय क। धवल मङ्गल गावै गोरड़ी, लोक अञ्जना नों वर जोयवा जाय क।।स०।।१७।।
महिन्द राजा मोटा राजा भणी, अति घणो दियो आदर सनमान क। उच्छरंग मन मांहे अति घणो, भाव भगति सूं मिलियो राजान क।। जान उतारी रे आण ने, आपिया भोजन विविध पकवान क। ऊपर सिखरण सांचवै, खादिम स्वादिम दिया घणा मिष्टान क।।स०।।१८।।
हिवै पवनजी तोरण आविया, तो ही अञ्जना ऊपर घणो रे अभाव क। नाम सुण्यां ही राजी नहीं, मूल नहीं मन तेहनी चाव क।। धवल मङ्गल गावै गोरड़ी, पूंरण सासु करै बहु भांत क। पिण मन में न भावे पवन ने, ए तो परणै रे अञ्जना बालवा गात क।।स०।।१९।।
रूपा तणो रे मण्डप रच्यो, सोवन तणी मांडी तिहां वेह क। सोवन पाट मोत्यां जड्यो, अंजना ने पवनजी बैठा छै तेह क।। हथलेवै हाथ मेल्यो तिहां, नयण निहालै छै अञ्जना नार क। पिण पवन ने मूल गमै नहीं, द्वेष जागै पहिली बात विचार क।।स०।।२०।।
हिवै पवनजी परण ने उतस्या, कीधी पहरावणी अञ्जना नो तात क। गयवर आपिया अति घणा, ताजा तुरङ्ग दीधा विख्यात क।। कनक रत्न बहु आपिया, आपी छै रूपा तणी बहु कोड़ क। बसन्तमाला दासी आदि दे, पांचसै दासियां सरीखी जोड़ क।।स०।।२१।।
हिवै परणी ने रतनपुरी संचर्या, साहमो आयो तिहां प्रह्मदराय क। अंजना मन हरषित थई, सासु सुसरा ना पूजिया पाय क।। पांच, सौ गांव राजा दिया, आप्या छै आभरण रतन बहु मोल क। आया छै बीन ने बीनणी, आया छै तिहां बाजते ढोल क।।स०।।२२।।
Roman Transliteration
dhal : 2
hivai mat pita anjana tanan, lagan likhaviya mote mandan k. vivah karva anjana tano, ratanpuri veg meliyo jan k. mahochchhav mandiyo ati ghano, baj rahya tihan dhol nishan k. Mangal gavai chhai gordi, uchchhav kar rahya kod kalyan ka..sa0..12..
hivai ray prahlad tedaviya, jan men javo bada bada rajan k. hay gay rath sajhiya ghana, netarya svajan ne diyo ghano sanman k. dhan sathe diyo kharachva, mote mandan lei chalya jan k! samanta diya sathe ghana, jodha subhat sena savdhan ka..sa0..13..
hivai bin banav kiyo ghano, gehna abhushan pahriya tay k. sakhiyan gavai re sohla, devai ashish ketumti may k.. lun utarai re baindi, rup dekh man harshit thay k. jachak bolai virudavli, in vidh pavanji paranva jay ka..sa0..14..
sena singari chaturngini, gajai ji ambar bajai ji tur k. svajan saga miliya ghana, jan chalai janai ganga no pur k.. var vidyadhar dipto, shobh rahyo tinro badan sanur k. chihun dish sathe sevak ghana, hath jodi rahya ubha hajur ka..sa0..15..
mahindapuri neda aviya, ai badhai raji huvo ray k. didhi badhamni tehne, harshit hui anjana tani may k.. Aarti non mahochchhav karai, mahinda raja man harash n may k. svajan saga miliya ghana, sena lei raja sahmo ji jay ka..sa0..16..
mahinda raja sahmo aviyo, dhol damama ne ghure nishan k. raja ho rani sahu milya, vyapiyo timar ne anthamyo bhan k. susro samelai aviyo, pavanji dekhne ananda thay k. dhaval mangal gavai gordi, lok anjana non var joyva jay ka..sa0..17..
mahinda raja mota raja bhani, ati ghano diyo adar sanman k. uchchharang man manhe ati ghano, bhav bhagti sun miliyo rajan k.. jan utari re an ne, apiya bhojan vividh pakvan k. upar sikharan sanchvai, khadim svadim diya ghana mishtan ka..sa0..18..
hivai pavanji toran aviya, to hi anjana upar ghano re abhav k. nam sunyan hi raji nahin, mul nahin man tehni chav k.. dhaval mangal gavai gordi, punran sasu karai bahu bhant k. pin man men n bhave pavan ne, e to parnai re anjana balva gat ka..sa0..19..
rupa tano re mandap rachyo, sovan tani mandi tihan veh k. sovan pat motyan jadyo, anjana ne pavanji baitha chhai teh k.. hathlevai hath melyo tihan, nayan nihalai chhai anjana nar k. pin pavan ne mul gamai nahin, dvesh jagai pahili bat vichar ka..sa0..20..
hivai pavanji paran ne utasya, kidhi pahravani anjana no tat k. gayavar apiya ati ghana, taja turanga didha vikhyat k.. kanak ratna bahu apiya, api chhai rupa tani bahu kod k. basantamala dasi adi de, panchsai dasiyan sarikhi jod ka..sa0..21..
hivai parni ne ratanpuri sancharya, sahmo ayo tihan prahmadray k. anjana man harshit thai, sasu susra na pujiya pay k.. panch, sau ganv raja diya, apya chhai abharan ratan bahu mol k. aya chhai bin ne binni, aya chhai tihan bajte dhol ka..sa0..22..