ढाल
Dhal
628
ढाल — Lyrics
ढाल
व्यसन सातमो परनारी नो, प्रत्यक्ष पाप देखायो रावण पदमोत्तर मणरथ राजा, तीनूंई राज गमायो।। राजवियां नें राज, पियारो।।रा0।।१।।
मणरथ राजा कर मनसुबो, जुगबाहु ने मारयो। आप मुओ ने राज गमायो, हाथ कछुय न आयो।।रा0।।२।।
रावण राजा पहिला हुवो, पीछै पदमोत्तर रायो। तीजी कथा मणरथ राजा नी, ते सुणज्यो चित्त लायो।।रा0।।३।।
जंबुद्वीप रा भरत क्षेत्र में, नगर सुदर्शण भारी। धन सूं पूरण देखत सुन्दर, रैयत सुखी राजा री।।रा0।।४।।
मणरथ राजा रे धारणी राणी, ऋद्धि तणो विस्तारो। हाथी घोड़ा ने रथ पायक सेना, वरतै चौथो आरो।।रा0।।५।।
स्वचक्र ने परचक्र केरो, विरोध नहीं तिणवारो। मणरथ राजा रे जुगबाहु भाई, मांहो मांहि छै प्यारो।।रा०।।६।।
पांच इन्द्री नां भोग भोगवता, नाटक पड़ै दिन रैणो। विविध प्रकार नीं क्रीडा करतां, विषय विरोध मंडाणो।।रा0।।७।।
मणरथ राजा राज भोगवतां, चढ़ियो महल उदारो। तिण अवसरे मेणरह्या दीठी, जुगबाहु नीं नारो।।रा०।।८।।
रूप देखी ने राजा अचरज पाम्यो, अहो अहो रूप तुमारो। इण राणी ने हूं महल में राखूं, सुख विलसूं संसारो।।रा०।।९।।
मणरथ राजा कर मनसुबो, जुगबाहु ने बुलायो। करो सजाई आयुद्धशाला नीं, हूं देश लेवण ने जायो।।रा०।।१०।।
हाथ जोड़ी ने जुगबाहु बोल्यो, ओ तो छै थोड़ो कामो। राज विराजो राजसभा में, हूं जासूं भाई तामो।।रा०।।११।।
मणरथ राजा राजी हुवो, हुकुम कियो छै भाई। देश किल्लो कायम करी आवो, ले जावो फौज सजाई।।रा०।।१२।।
जुगबाहु तो उठ्यो सताब सूं, हरष हुवो मन मांहि। किल्लो कायम कर पाछो आऊं, जब मुजरो करूंला भाई।।रा०।।१३।।
ले फौजां जुगबाहु चाल्यो, मजलां मजलां जायो। जुगबाहु तो मन में नहीं जाण्यो, मणरथ किया उपायो।।रा०।।१४।।
मणरथ राजा मेणरह्या कारणे, भारी वस्तु मंगावै। गहणा जड़ाव रा पहरण सारू, दासी रै हाथ पहुंचावै।।रा०।।१५।।
दासी राजा रै हुकमे छानै, वस्तु लेई देवै राणी ने जायो। मणरथ राजा चोज वणायो, तिणरी खबर न कायो।।रा०।।१६।।
मेणरह्या मन मांहि जाण्यो, धणी चाल्यो छै गामो। मेणरह्या मन ऊणी जाणी, जेठ पिता री ठामो।।रा0।।१७।।
इम जाणी ने राणी उराह लीधा, वस्तु आभूषण सारो। नेह सनेह वस्तु मेली जाण्यो, राजा लागो म्हारी लारो।।रा०।।१८।।
मेणरह्या ने रीसज आई, दीनो दासी ने झझकारो। धणी तो म्हारो परदेश सिधायो, राजा पड़ियो म्हारी लारो।।रा०।।१९।।
दासी तो मन में दिलगीर हुई, राजा पासे आई। मेणरह्या तो महाराज कोप करी ने, दीनी वस्तु बगाई।।रा०।।२०।।
मणरथ राजा रात समय में, महल भाई रै आयो। दरवाजो तो जड़ियो दीठो, हेलो मारै छै रायो।।रा०।।२१।।
मेणरह्मा तो मन मांहि जाण्यो, मणरथ राजा आयो। बीजो तो कोई उपाय न दीसै, हूं सासु ने द्यूं रे जणायो। रा०।।२२।।
मेणरह्या तो छाने जाय ने, दीनो सासु ने जणायो। अमलां मसता माता जाण्यो, बेटों भोले आयो।।रा०।।२३।।
ओ तो महल बेटा जुगवाहु रो, महल पैली कानी थारो। वचन माता नों सांभल राजा, लाज्यो छै तिणवारो।।रा०।।२४।।
मेणरह्या मन मांहे जाण्यो, पड़ियो राजा म्हारै लारै। तो कासीद मेलूं धणी ने, बेगा आवज्यो इण वारै।।रा०।।२५।।
बीती बात लीखी कागद में, जीवती जाणो मोनै। तो पाछा घरे वेगा आवज्यो, दगो कियो छै थांनै।।रा०।।२६।।
कासीद कागद दियो सताव सू, जुगबाहु ने जाई। कागद वांचने जुगवाहु जाण्यो, दगो कियो छै भाई।।रा०।।२७।।
इम जाणी जुगबाहु वलियो, ढील न कोनी काई। मुहूरत नहीं महलां जावण रो, नीमित्तिये बात बताई।।रा०।।२८।।
जुगबाहु तो डेरा बारै कीना, नगरी में नहीं आयो। मणरथ राजा रो डर जाणी ने, राणी धणी कने जायो।।रा०।।२६।।
मेणरह्या मित्र आप धणी री, पर-पुरुष प्रीत न जाणी। व्रत आपरो राखण सारू, जतन करै छै राणी।।रा०।।३०।।
मेणरह्या तो पहुंती सताब सूं, विध सूं वात सुणाई। जुगबाहु तो मन में न जाण्यो, मारेलो मनै भाई।।रा०।।३१।।
जुगबाहु ने आयो जाणी ने, डर उपनो राजा रै। मनरथ राजा करै विमासण, उमराव छै इण रै सारै।।रा०।।३२।।
जुगबाहु ने राणी कहै छै, दगो करेलो थारी भाई। साथ समान छै इणरै सारै, तो हूं पहेली मारूं जाई।।रा०।।३३।।
भाई मारण राजा रात रो चाल्यो, चढ़ियो एक सखाई। दोड़ीदार चाकर पालतां, गयो धकाय ने मांई।।रा०।।३४।।
मेणरह्या दो मन री दाखवी, जितरे मनरथ आयो। राणी कहै सावधान हुवो, मारेलो थाने भायो।।रा०।।३५।।
मेणरह्या तो न्यारी हुई, राजा नेड़ो आयो। जुगबाहु तो न्यारो सूतो, मणरथ धावज वायो।।रा०।।३६।।
भाई मार राजा पाछो वलियो, हुयो घोड़ै असवारो। सरप पूंछड़ी खुर हेठै चींयी, खाधो छै तिंण वारो।।रा०।।३७।।
मणरथ राजा हेठै पड़ियो, मर ने गयो नरक तत्कालो। खवर नहीं कोई राज सभा में, करमां कीनो छै चालो।।रा०।।३८।।
मेणरह्या तो कने आई, दु:ख धरती मन मांई। मैं तो थांने कह्यो छो महाराजा, मारेलो थाने भाई।।रा०।।३९।।
मेणरह्या तो कहै धणी ने, करो संथारो सोई। च्यारे शरणा थांने होज्यो, नहीं किणही रो कोई।।रा०।।४०।।
मोरा प्रीतमजी! थांनैं द्यूं सीख, वचन हिया में थे धारो। साहिब तो परदेश सिधावो, हूं भातो बांधूं छूं लारो।।रा०।।४१।।
मोरा प्रीतमजी! थारै देव अरिहन्त छै, गुरु निर्ग्रंथ श्री साधो। धर्म केवली भाख्यो दया में, समकित नियम आराधो।।रा०।।४२।।
मोरा प्रीतमजी! थांनै जीव मारण रो, जाव जीव पचक्खाणो। सर्व प्रकारे मृषावादे, अदत्तादान में जाणो।।रा०।४३।।
मोरा प्रीतमजी! थाने मैथुन सेवेण रो, नवविध बाड़ प्रमाणो। मनुष्य देवता तिर्यञ्च सम्बन्धी, जावजीव पचक्खाणो।।रा०।।४४।।
मोरा प्रीतमजी! थानै क्रोध मान रो, माया लोभ ए च्यारो। मन में तो ममता मती राखज्यो, जावजीव परिहारो।।रा०।।४५।।
मोरा प्रीतमजी! थे राग द्वेष दोई, बंध करमां रा जाणो। कलह अभ्याख्यान पैशुन्य चाड़ी, परपरिवाद पच्चक्खाणो।।रा०।।४६।।
मोरा प्रीतमजी! रति अरति इम जाणो, मायामोसो नहीं भलो। पाप अठारै त्रिविध बोसराऊं, मिथ्या दरशण सलो।।रा०।।४७।।
मोरा प्रीतमजी! मरण तणो भय न आणो, धर्म साचो करि जाणो। परभव में ते साथ चालसी, गांठे बांध्यो नाणो।।रा०।।४८।।
मोरा प्रीतमजी! थे मोह थकी मन वालो, मोह में जीव मती घालो। करो आलोयणा कारज सरै ज्यूं, मत राखो कोई सालो।।रा०।।४९।।
मोरा प्रीतमजी! दश दृष्टान्ते, मनुष्य जमारो दोहेलो। इण भव में जो पुन्य करे तो, भरभव सुख सोहेलो।।रा०।।५०।।
मोरा प्रीतमजी! ज्ञाने विचारो, सुपना री माया जाणो। डाभ अणी जल बिन्दु जिम जाणो, मन में समता आणो।।रा०।।५१।।
मोरा प्रीतमजी! थे दोष करमां रो जाणो, बीजा ने दोष न दीजै। ऋण बैर तो कोई न छोड़े, बांध्या ते भुगतीजै।।रा०।।५२।।
मोरा प्रीतमजी! किण रा मात पिता, कुण कुटुम्ब कुण भाई। घर री तो साहिब नहीं स्त्री, स्वारथ सरब सगाई।।रा०।।५३।।
मोरा प्रीतमजी! नहीं काया आपणी, साची धर्म सगाई। शत्रु मित्र ने सरीखा जाणो, अवसर जावै ठाई।।रा०।।५४।।
मोरा प्रीतमजी! थार सरधणा शुद्ध छै, चौविहार अणशण दियो। मरणो सहु ने एक दिहाड़ै, सेंठो राखज्यो हियो।।रा०।।५५।।
जुगबाहु तो संथारो सरध्यो, साहाज दियो छै राणी। काले मासे काल करी ने, जाय उपनो विमाणी।।रा०।।५६।।
मेणरह्या छाती काठी करने, कारज धणी नों कियो। पूरा मित्र ते पार उतारै, धन जीवित जिण रो जियो।।रा०।।५७।।
मोह वशे होय काम बिगाड़ै, मरण बिरियां नरक में घालै। सगा नहीं ते पूरा बैरी, सूंस लेता ने पालै।।रा०।।५८।।
मित्र हुवै ते मरण सुधारै, करै पर उपकारो। दे सरधणा सूंस करावै, ते विरला संसारो।।रा०।।५९।।
धन्य छै संसार में मेणरह्या राणी, मोह धणी नों निवार्यो। आप तणो भरतार जाणी ने, तिण उपदेश देई ने तारयो।।रा०।।६०।।
मेणरह्या मन मांहि जाण्यो, पकड़ेलो मोने रायो। वेष बदलने परी निकली, दासी नाम धरायो।।रा०।।६१।।
डेरा मांह सूं तो बारै निकली, गई उजाड़ रे मांयो। पूरी आपदा कोइ नहीं साथे, राणी रे कुंवर जायो।।रा०।।६२।।
जिण जायां देशोटन हुंता, वाटता राज बधाई। विषय वियोग में कुंवर जायो, जोईज्यो करम कमाई।।रा०।।६३।।
चांपो पाछैलो राणी डरपै, रखे आवेलो कोई लारो। इम जाणी ने कुंवर ऊंचायो, हुई करमा रै सारो।।रा०।।६४।।
कोमल काया ने कारण पड़ियो, पांव पड़े नहीं ठायो। कुमर तो राणी निभतो न जाण्यो, बालक मेल वन मांयो।।रा०।।६५।।
चीर बिछाई ऊपर सुवाड्यो, बाल बिछोहो जाण्यो। होतब थारो जो होसी रे जाया, मेणरह्या दु:ख आण्यो।।रा0।।६६।।
कुंवर मेल राणी आगी चाली, अन्न बिना सूनी काया। कठै सुवावड़ कुण मंगल गावै, करमा चहन दिखाया।।रा०।।६७।।
घणा दास ने दासी हुता, राजकुंवर नी धायो। डोढ़ी पड़दा माहे रहती, राणी एकली जायो।।रा०।।६८।।
जातां जातां आगे नदी आई, पानी पें वस्त्र पखाला। स्नान करी ने तीरज बैठी, उठी दु:ख री झाला।।रा०।।६६।।
कौन वियोग पड्यो मो मांहै, किसे ठिकाणै आई। रोही में भमती एकलड़ी, रोवै छै विललाई।।रा०।।७०।।
किण घर जनमी किण घर आई, राजा री राणी कहवाई। साहिब म्हारो मुवो मेली, हूं रोही में आई।।रा०।।७१।।
कुंवर विछोहो मात पिता रो, जुगवल्लभ लघु भाई। जुगबल्लभ ने महलां मेल्यो, वालक छै वन माहि।।रा०।।७२।।
महल झरोखा शोभा जाली री, राजवियां रुसनाई। ऋद्धि साहिवी उभी मेली, हूं तीर नदी रण मांहि।।रा०।।७३।।
विषम उजाड़ आय बैठी नों, सुख नहीं तिल रती। मेणरह्या तो दु:ख करती बैठी, संकट पड्यो छै सती।।रा०।।७४।।
झूरै धणी ने करै विलाप, दु:ख भर छाती फारै। मेणरह्या नों दु:ख प्रभु जाणै, बैठी छै तट माटै।।रा०।।७५।।
संयोग रूपणी रोही हुती, विजोगे तिण बाली। नाथ विहुणी दु:खनी करती, आणी रण में राली।।रा०।।७६।।
देखो सगाई इण संसार में, बिछड़तां नहीं वारो। इम जाणी ने सतगुरु सेवो, लाहो लेज्यो लारो।।रा०।।७७।।
तिण अवसर में देवता इम जाण्यो, दु:ख करै छै राणी। वैक्रिय रूप कियो हाथी रो, रमत मांडी पाणी।।रा०।।७८।।
दु:ख विसारण विलम्बज कियो, सूंड सूं उछालै पाणी। दु:ख छोड़ी ने हाथी दीठो, रमत देखे राणी।।रा0।।७६।।
जिम जिम रमत देखै राणी, अचरज रमत भारी धर्म अंकुरो पुन्य संजोगे, आवै छै नर नारी।।रा०।।८०।।
देवता छै कोई पर उपकारी, राणी ने सूंड़ सूं झेलै। जितरे नेड़ा आय निकलिया, ले कर विमाण में मेलै।।रा०।।८१।।
विद्याधर तो राजी हुवो, रूप घणो इण नारी। तुरन्त विमाण में ले पाछो वलियो, सुख विलसां संसारी।।रा०।।८२।।
मेणरह्या तो मन में जाण्यो, तुरत बल्यो छै पाछो। कुण जाणे कुण देश ले जावै, ओ तो नहीं दीसै छै आछो।।रा०।।८३।।
विद्याधर ने मेणरह्मा पूछै जाता किण दिश भाई। अवे तो थे पाछा वलिया, काई दिल में आई।।रा०।।८४।।
भगवन्त न तो दरशण जातां, तो सरीखी मिली नारी। इम जाणी ने पाछो वलियो, सुख विलसां संसारी।।रा०।।८५।।
मेणरह्या मीठे वचने दाखवै, भगवन्त दरशण जातां। मारग में धाने हूंज मिली छुं, नफो घणो दरशण करतां।।रा०।।८६।।
तीर्थंकर नों दरशण करतां, प्रसन्न होसी थारी काया। विद्याधर तो पाछो वलियो, मेणरह्या रे मन भाया।।रा०।।८७।।
समवसरण सूं नेड़ा आया, विमाण सूं उतरिया। कर वन्दना ने सुणै व्याख्यान, कारज सगला सरिया।।रा०।।८८।।
जुगबाहु तो देवता हुवो, उठ्यो छै उमंग आणी। सेवक तो कर जोड़ हरपत है, जय जयकार मुख बाणी।।रा०।।८९।।
इण ठामे स्वामी आय उपना, हुवा हमारा नाथो। कुण गुरु नीं सेवा कीनी, दान दियो छै हाथो।।रा०।।९०।।
ज्ञान करी ने देवता दीठो, पूरव भव नों विचारो। जुगबाहु तो म्हारो नामज हुंतो, मेणरह्या म्हारी नारो।।रा०।।९१।।
मेणरह्या रे कारण मोने, मणरथ भाई मारचयो। दे शरणां ने सूंस करायो, मेणरह्या मोने तारथो।।रा०।।९२।।
उपगारी नों गुण जाणी ने, देवता दरशण जायो। देखूं मेणरह्या कुण ठिकाणै, वैठी समोसरण मांयो।।रा०।।९३।।
परगट रूप कीनो छै देवता, प्रभु ने प्रदक्षिणा दीधी। साधु साध्वी ने वन्दना करने, मेणरह्या ने वन्दना कीधी।।रा०।।९४।।
परणदा देखने हसवा लागी, देव दीसै छै गेलो। स्त्री ने तो वन्दना कीधी, जिण रो प्रभु उत्तर देलो।।रा०।।९५।।
जुगबाहु इणरो नामज हुंतो, मेणंरह्या इणरी नारो। धर्म तणो इण ने साझज दीनो, हुवो सुर अवतारो।।रा०।।९६।।
मेणरह्या रे कारण इण ने, मणरथ भाई मास्यो। दे शरणा नैं सूंस करायो, इण ने मेणरह्या तार्यो।।रा०।।९७।।
मेणरह्या तो मन में जाण्यो, धणी दीसै छै म्हारो। इण अवसर में संयम आवै, पीछे विद्याधर नों नहीं सारो।।रा०।।९८।।
भरी परषदा में मेणरह्या उठी, बोले छै कर जोड़ी। आज्ञा दो तो स्वामी संयम लेऊ, टालूं भव तणी खोड़ी।।रा०।।९९।।
देव कहै थांने आज्ञा म्हारी, ल्यो थे संयम भारी। जुगबाहु तो उऋण हुवो, मेणरह्या ने तारी।।रा०।।१००।।
मोने तो विद्याधर लायो, परवश बात प्रकाशी। कठै विद्याधर कह्यो देवता, गयो विद्याधर न्हासी।।रा०।।१०१।।
मेणरह्या तो संयम लीधो, ज्ञान भणै गुरुणी पासे। विनय करी ने आज्ञा पालै, सुमति गुप्ति प्रकाशे।।रा०।।१०२।।
देवता तो मन में हरषज पाम्यो, पूज्या प्रभूजी नां पायो। साधु साध्वी सर्व वांदी ने, आयो जिण दिश जायो।।रा०।।१०३।।
देवता तो आपणै ठामे पहुंतो, मेणरह्या संजम पाळै। बालक तो मारग में मेल्यो, आपरा पुन्य रुखवाळै।।रा०।।१०४।।
ना तो कोई हिंसक नेड़ो आयो, नहीं कोई पक्षी खायो। देखो पुन्याई के प्रभाव थी, सुकृत कीनी सहायो।।रा०।।१०५।।
मिथला नगरी नों पदमरथ राजा, चढ़ियो शिकारज सोई। पाप करन्ता पड़ै पाधरो, पूरब सुकृत होई।।रा०।।१०६।।
कर असवारी राजा रण में फिरता, जोवै जीव सब कोई। रण मांहि तो बालक सूतो, दीठो राजा सोई।।रा०।।१०७।।
बालक नेड़ो राजा आयो, रूप देखने अचरज पायो। बालक कोई पुण्यवंत दीसै, राजा रे मन भायो।।रा०।।१०८।।
म्हारा राज में पुत्र नहीं छै, म्हारै सहजे आयो। तो इण बालक ने उरो लेऊं, सोंपूं राणी ने जायो।।रा०।।१०९।।
कुंवर लेई ने राजा पाछो वलियो, आयो राज दुवारो। पुष्पमाला राणी राय तेड़ावै, पुत्र दियो छै करतारो।।रा०।।११०।।
नव मास तो भारा मरै छै, देवता पितर मनायो। आपणै पूरव पुण्य करी ने, कुंवर सहज में आयो।।रा०।।१११।।
आपणा राज में पुत्र नहीं छै, करो इणरी प्रतिपालो। राज लायक ओ कुंवरज दीसै, होसी राज रुखवालो।।रा०।।११२।।
भार भोलावण देई राणी ने, कुंवर खोळै घाल्यो। पुण्यवन्त राज में आयां पीछे, भोमिया नमी ने चाल्यो।।रा०।।११३।।
भोमिया म्हारै अनमी हुंता, कुंवर राज में आयो। भोमिया म्हारै सर्व चाकर हुवा, नमी नाम दरशायो।।रा०।।११४।।
नमी कुंवर पदमरथ राजा, दिन दिन बधतो होई। मात पिता बंधव बिछोहो, ते सुणज्यो सहु कोई।।रा०।।११५।।
जुगबाहु ने मणरथ मासयो, विषया रस रे चायो। पाछा वलतां ने सांपज खाधो, गयो नारकी मांयो।।रा०।।११६।।
दोनूं राजा रो मरण हुवो, खबर हुई नगरी मांई। मेणरह्या तो निकल न्हाठी, तिण री खबर न कांई।।रा०।।११७।।
संसार नों तो कारज कियो, राज जुगबल्लभ ने दियो।। किण ने दोष न दीजे प्राणी, करम आपरा कियो।।रा०।।११८।।
जुगबल्लभ तो राज करै छै, वरतै छै चौथो आरो। बाप तणी मन में थोड़ी आवै, पिण ते दुख वरते माता रो।।रा०।।११९।।
नमी कुमार तो मोटो हुवो, विरह पड्यो राजा रो। नमी कुमार ने राज बैसाड्यो, सुख विलसे संसारो।।रा०।।१२०।।
जुगबाहु तो देवता हुवो, मेणरह्या संयम पालै। जुगबल्लभ ने नमी भाई, दोनूं राज रुखवालै।।रा०।।१२१।।
आठ करम छै महा जोरावर, जीवां ने फोड़ा पाड़ै। च्यारां ने तो न्यारा कीना, करतब खेल दिखाड़ै।।रा०।।१२२।।
दोनूं राजा राज भोगवंता, अटवी पड़ी है सीमाड़ै। भूमि आपणी राखण सारू, करै राजवी राड़ै।।रा०।।१२३।।
जुगबल्लभ तो मन में जाण्यो, आय लड़ दिसै कठा रो। देखोने म्हारी धरती लेसी, राजवियां अहंकारो।।रा०।।१२४।।
जुगबल्लभ तो फौजां ले चढ़ियो, कांकड़ सीमे जावै। नमी राजा मन में कोप करी ने, मन में मगज न मावै।।रा०।।१२५।।
नमीराय तो करी सजाई, बोले दै बांकी बाणी। मरम मोसो वोलै माता रो, चढ़ियो छै इम जाणी।।रा०।।१२६।।
तिण अवसर में मेणरह्याजी, मन में इसड़ी आणी। अंगजात छै दोनूं म्हारा, नहीं हटे पुन्य प्राणी।।रा०।।१२७।।
घणा जीव री घातज होसी, मरसी घणा अजाणी। यासूं बणै जो उपगार कीजै, मेणरह्या मन आणी।।रा०।।१२८।।
कर वंदना गुरुणी ने पूछे, आप कहो तो हूं जाऊं। दोनूं राजा रै राड़ मंडी छै, हूं जाई ने समझाऊं।।रा०।।१२९।।
मांहो मांहि तो कोई न हटसी, अंगजात छै म्हारा। घणा जीव नीं घातज होसी, परिणाम एक दया।।रा।।१३०।।
देखो पुन्याई राजवियां री, गुरणी तो पिण नहीं बरजे। वस्तु आप री सेंठी राखने, पीछे परोपकार करजै।।रा०।।१३१।।
कर वन्दना ने मेणरह्या चाली, ले सतिया नो साथो। जुगबल्लभ सूं तो सेंध पिछाण, पहेली उण सूं बातो।।रा०।।१३२।।
कांकड़ सीमा ठौर ठिकाणै, फौजा पड़ी छै दोई। जुगबल्लभ नो लशकर पूछी, चाली मेणरह्या सोई।।र०।।१३३।।
मेणरह्या सती चरम शरीरी, आप तिरै पर तारी। राज कचेड़ी सूं नेड़ी आई, निजर पड़ी राजा री।।रा०।।१३४।।
जुगबल्लभ तो उठ्यो सताब सूं, विनय करयो छै भारी। सात आठ पग सामो जाई ने, महासतियां केम पधारी।।रा०।।१३५।।
मेणरह्या तो कहै राजा ने, कारण पड़ियो तोस्यूस्यूं भारी। फौज बंधी तो थे भेली कीनी, में तिण सूं कारण विचारी।।रा०।।१३६।।
आय लड़ म्हारी धरती लेसी, नीच चण्डाल घर जायो। साथ सामान इण भेलो कीनो, तिण कारण चढ़ी आयो।।रा०।।१३७।।
बेटा छो थे राजवियां रा, बोलो बोल विचारो। और थां ऊपर कीण चढ़ आसी, यो भाई छै धारो।।रा०।।१३८।।
बात सुणी ने राजा लाज्यो, नीचो मुख करी जोवै। भारी वचन कह्यो माता ने, राजा ने नहीं सोवै।।रा०।।१३९।।
जुगवल्लभ तो कहै माता ने, थे लीधो संयम भारों। मौत आपदा किणविध हुई, बात कहो विस्तारों।।रा०।।१४०।।
मणरथ राजा थांरा पिता ने मार्यो, हूं रात ने निकली आई। जनम नमी रो बन में हुवो, हूं मेल आई बन में भाई।।रा०।।१४१।।
तीर नदी ने बैठी हुंती, विमाण विद्याधर नों आयो। देव उंचाय ने मोने माहे मेली, हूं गई समोसरण मांयो।।रा०।।१४२।।
पिता तो थांरो देवता हुवो, दरशन प्रभु के आयो। आज्ञा मांगी ने मैं तो संयम लीधो, भेट्या प्रभु रा पायो।।रा०।।१४३।।
दोनूं राजा रे मैं बैरज सुणियो, लड़सी मांहो माई। घणा आदमी मरण पामसी, तिण कारण हूं आई।।रा०।।१४४।।
जुगबल्लभ राजा बात सुणी ने, चिन्ता फिकर मन आई। जुगबल्लभ तो कहे माता ने, जाय मिलूं हूं भाई।।रा०।।१४५।।
ठीक नहीं छै नमीराय ने, यो छै म्हारो भाई। नहीं विश्वास राजवियां केरो, तिण सूं मिलूं हूं पहेली जाई।।रा०।।१४६।।
जुगवल्लभ ने तो दियो समझाई, नमीराय कनै जाय। सतियां नजर पड़ी राजा री, विनय करी सामो आय।।रा०।।१४७।।
हाथ जोड़ी ने राजा वोल्यो, महासतियां किम आई। का सूं कारण पड़ियो थारे, इसड़ै अवसर मांई।।रा०।।१४८।।
कांई कारण थारै दोनूं राजा रे, झगड़ो पड़ियो मांहो माई। फौज बन्धी तो थे भेली कीनी, तिण कारण हूं आई।।रा०।।१४९।।
बाप मार्यो ने मां निकल भागी, गई ए किण रे लारे। देखो ने ए म्हारी धरती लेसी, कही सनमुख माता रे।।रा०।।१५०।।
बेटा थे छो राजवियां रा, बोलो बोल विचारो और थां ऊपर कुण चढ़ आसी, भाई छै ओ थारो।।रा०।।१५१।।
जुगबल्लभ ने मोटो मेल्यो, खबर पड़ी अनुसारे। नानो बालक नमी ने जाणी, बात कही विस्तारे।।रा०।।१५२।।
बात सुणी ने राजा लाज्यो, नीचो मुख करी जोवै। भारी वचन कह्यो माता ने, राजा ने नहीं सोवै।।रा०।।१५३।।
नमी राजा तो मन माहि जाण्यो, जुगबल्लभ राजा म्हारो भाई। नेह सनेह धरी दोनूं बेटा रो, तिण सूं माजी आई।।रा०।।१५४।।
नमी राजा तो मिलण चाल्यो, जुगबल्लभ सामो जाई। हरष भाव सूं बांह पसारी, मिलिया दोनूं भाई।।रा०।।१५५।।
एकण हाथी रे होदै बैठा, जुगबल्लभ नमी भाई। जुगबल्लभ रा डेरा कानी, हुई अब हरष सवाई।।रा०।।१५६।।
लोक लड़ाई री बाता करता, लड़ता होडा होडी। लोकां मन में अचरज पाम्या, कांई कियो इण मोडी।।रा०।।१५७।।
वैर मिटाय ने मेल करायो, घणा लोक हुवा राजी। घणा जणां रा माथा पड़ता, राख्या छै इण माजी।।रा०।।१५८।।
लोक राजा रे कुशलज हुवो, घर घर हरष बधाई। भलो होज्यो इण सती केरो, यश लीधो जग माई।।रा०।।१५९।।
राज कचेड़ी में आई बैठा, जुगबल्लभ नमी भाई। जुगबल्लभ सुख अथिर जाणी ने, वैराग री मन में आई।।रा०।।१६०।।
जुगवल्लभ कहे मोने दीक्षा लेण द्यो, राज करो मह रायो। राज ऋद्धि ने सर्व संपदा, में थाने भोलायो।।रा०।।१६१।।
जुगवल्लभ तो दीक्षा लीधी, हरप घणो मन माई। भाई विछोहो दु:ख री लहरां, नमी कुमर नैं आई।।रा०।।१६२।।
नमी राजा तो राज करै छै, राणी एक सौ आठो। हुवै नाटक ने घुरे नगारा, दोनूं राज रो पाटो।।रा०।।१६३।।
दाघ ज्वर ने जोग करी ने, लेसी संयम भारो। इन्द्र परीक्षा करवा आसी, उत्तराध्ययन विस्तारो।।रा०।।१६४।।
दोनूं भायां रे मेल करायो, मेणरह्या पाछी आई। गुरुणीजी रे पाय लागने, विध सूं बात सुणाई।।रा०।।१६५।।
मोटा राजा रै मेल करायो, राखी घणां री बाजी। मेणरह्या ना गुण जाणी ने, गुरणी हुई छै राजी।।रा०।।१६६।।
छत्तीस हजार आरज्यां मांहै, गुरुणी चन्दनवाला। तिण रे पाटे पदवी पाई, शिष्यणी रतना री माला।।रा०।।१६७।।
चेड़ा नी जे साते पुत्री, भगवन्त आप बखाणी। चेलणा, मृगावती तीजी प्रभावती, चौथी शिवादे राणी।।रा०।।१६८।।
पांचवीं पद्मावती छठी सुलसा, ज्येष्ठा सातमी जाणी। संकट पड्यां सती शीलज राख्यो, दमयन्ती नल राणी।।रा०।।१६९।।
अञ्जना सती छै महिन्द राजा नीं बेटी, बिखो सह्यो बन मांही। संकट पड्यां सती शीलज राख्यो, यश कीरत जग मांही।।रा०।।१७०।।
सती द्रौपदी तो आगै हुई, यश लीधो जग मांई। मोटा राजा रो विरोध मिटायो, मेणरह्या री अधिकाई।।रा०।।१७१।।
संयम लेने सुकृत कीज्यो, मनुष्य जमारो मत खोज्यो। जिन शासन में जिम मेणरह्मा कीनी, तिम सब कोई कीज्यो। रा०।।१७२।।
मंणरह्या तो दीक्षा लेई, मन शुद्ध संयम पालै। जिन मारग में नाम दीपायो, भव दूघण सहु टालै।।रा०।।१७३।।
मेणरह्या तो कुलतारक हुई, लज्जा आप री राखी। बिखो सह्यो पिण शील न भांज्यो, भगवन्त तेहनां साखी।।रा०।।१७४।।
जुगबाहु ने मेणरह्या सती, जुगबल्लभ नमी भाई। च्यारां रो तो कारज सीधो, मणरथ दुर्गति मांही।।रा०।।१७५।।
व्यसन सातमो परनारी नों, जीव घात घर हाणी। मणरथ राजा नरक पहुंतो, कुयश बांधने प्राणी।।रा०।।१७६।।
एक कुव्यसन मणरथ सेव्यो, बहु रुलियो संसारो। सातूं कुव्यसन जे सेवै प्राणी, तिण ने दु:ख अपारो।।रा०।।१७७।।
विषया रस ते विष सम जाणी ने, सतगुरु सेवा कीजै। मणरथ राजा नीं बात सुणी ने, परनारी संग न कीजै।।रा०।।१७८।।
दान शील तप संयम पालो, दोषण सगला टालो। दया धर्म री समता आणी, शुद्ध आचार ते पालो।।रा०।।१७६।।
धर्म दया में केवली भाष्यो, ते साचो कर जाणो। जे जाणी सेवै भव प्राणी, ते पामै निरवाणो।।रा०।।१८०।।
जप तप संयम पालो रे भाई, विषय विकार गमाई। जीव जिके तो शिव सुख पावै, श्रीवीर वचन मन लाई।।रा०।।१८१।।
Roman Transliteration
dhal
vyasan satmo parnari no, pratyaksha pap dekhayo ravan padmottar manarath raja, tinuni raj gamayo.. rajviyan nen raj, piyaro..ra0..1..
manarath raja kar mansubo, jugbahu ne maryo. ap muo ne raj gamayo, hath kachhuy n ayo..ra0..2..
ravan raja pahila huvo, pichhai padmottar rayo. tiji katha manarath raja ni, te sunajyo chitta layo..ra0..3..
jambudvip ra bharat kshetra men, nagar sudarshan bhari. dhan sun puran dekhat sundar, raiyat sukhi raja ri..ra0..4..
manarath raja re dharni rani, riddhi tano vistaro. hathi ghoda ne rath payak sena, vartai chautho aro..ra0..5..
svachakra ne parachakra kero, virodh nahin tinvaro. manarath raja re jugbahu bhai, manho manhi chhai pyaro..ra0..6..
panch indri nan bhog bhogavta, natak padai din raino. vividh prakar nin krida kartan, vishay virodh mandano..ra0..7..
manarath raja raj bhogavtan, chadhiyo mahal udaro. tin avasre menarahya dithi, jugbahu nin naro..ra0..8..
rup dekhi ne raja acharaj pamyo, aho aho rup tumaro. in rani ne hun mahal men rakhun, sukh vilsun sansaro..ra0..9..
manarath raja kar mansubo, jugbahu ne bulayo. karo sajai ayuddhashala nin, hun desh levan ne jayo..ra0..10..
hath jodi ne jugbahu bolyo, o to chhai thodo kamo. raj virajo rajasbha men, hun jasun bhai tamo..ra0..11..
manarath raja raji huvo, hukum kiyo chhai bhai. desh killo kayam kari avo, le javo phauj sajai..ra0..12..
jugbahu to uthyo satab sun, harash huvo man manhi. killo kayam kar pachho aun, jab mujro karunla bhai..ra0..13..
le phaujan jugbahu chalyo, majlan majlan jayo. jugbahu to man men nahin janyo, manarath kiya upayo..ra0..14..
manarath raja menarahya karne, bhari vastu mangavai. gahna jadav ra paharan saru, dasi rai hath pahunchavai..ra0..15..
dasi raja rai hukme chhanai, vastu lei devai rani ne jayo. manarath raja choj vanayo, tinri khabar n kayo..ra0..16..
menarahya man manhi janyo, dhani chalyo chhai gamo. menarahya man uni jani, jeth pita ri thamo..ra0..17..
im jani ne rani urah lidha, vastu abhushan saro. neh saneh vastu meli janyo, raja lago mhari laro..ra0..18..
menarahya ne risaj ai, dino dasi ne jhajhkaro. dhani to mharo pardesh sidhayo, raja padiyo mhari laro..ra0..19..
dasi to man men dilgir hui, raja pase ai. menarahya to maharaj kop kari ne, dini vastu bagai..ra0..20..
manarath raja rat samay men, mahal bhai rai ayo. darvajo to jadiyo ditho, helo marai chhai rayo..ra0..21..
menarahma to man manhi janyo, manarath raja ayo. bijo to koi upay n disai, hun sasu ne dyun re janayo. ra0..22..
menarahya to chhane jay ne, dino sasu ne janayo. amalan masta mata janyo, beton bhole ayo..ra0..23..
o to mahal beta jugvahu ro, mahal paili kani tharo. vachan mata non sambhal raja, lajyo chhai tinvaro..ra0..24..
menarahya man manhe janyo, padiyo raja mharai larai. to kasid melun dhani ne, bega avajyo in varai..ra0..25..
biti bat likhi kagad men, jivti jano monai. to pachha ghare vega avajyo, dago kiyo chhai thannai..ra0..26..
kasid kagad diyo satav su, jugbahu ne jai. kagad vanchne jugvahu janyo, dago kiyo chhai bhai..ra0..27..
im jani jugbahu valiyo, dhil n koni kai. muhurat nahin mahlan javan ro, nimittiye bat batai..ra0..28..
jugbahu to dera barai kina, nagri men nahin ayo. manarath raja ro dar jani ne, rani dhani kane jayo..ra0..26..
menarahya mitra ap dhani ri, par-purush prit n jani. vrat aparo rakhan saru, jatan karai chhai rani..ra0..30..
menarahya to pahunti satab sun, vidh sun vat sunai. jugbahu to man men n janyo, marelo manai bhai..ra0..31..
jugbahu ne ayo jani ne, dar upano raja rai. manarath raja karai vimasan, umarav chhai in rai sarai..ra0..32..
jugbahu ne rani kahai chhai, dago karelo thari bhai. sath saman chhai inarai sarai, to hun paheli marun jai..ra0..33..
bhai maran raja rat ro chalyo, chadhiyo ek sakhai. dodidar chakar paltan, gayo dhakay ne mani..ra0..34..
menarahya do man ri dakhvi, jitre manarath ayo. rani kahai savdhan huvo, marelo thane bhayo..ra0..35..
menarahya to nyari hui, raja nedo ayo. jugbahu to nyaro suto, manarath dhavaj vayo..ra0..36..
bhai mar raja pachho valiyo, huyo ghodai asavaro. sarap punchhdi khur hethai chinyi, khadho chhai tinn varo..ra0..37..
manarath raja hethai padiyo, mar ne gayo narak tatkalo. khavar nahin koi raj sabha men, karman kino chhai chalo..ra0..38..
menarahya to kane ai, du:kh dharti man mani. main to thanne kahyo chho maharaja, marelo thane bhai..ra0..39..
menarahya to kahai dhani ne, karo santharo soi. chyare sharna thanne hojyo, nahin kinhi ro koi..ra0..40..
mora pritamji! thannain dyun sikh, vachan hiya men the dharo. sahib to pardesh sidhavo, hun bhato bandhun chhun laro..ra0..41..
mora pritamji! tharai Dev arihanta chhai, Guru nirgranth shri sadho. Dharm kevli bhakhyo daya men, samkit niyam aradho..ra0..42..
mora pritamji! thannai jiv maran ro, jav jiv pachakkhano. sarva prakare mrishavade, adattadan men jano..ra0.43..
mora pritamji! thane maithun seven ro, navvidh bad pramano. manushya devta tiryancha sambandhi, javjiv pachakkhano..ra0..44..
mora pritamji! thanai krodh man ro, maya lobh e chyaro. man men to mamta mati rakhajyo, javjiv pariharo..ra0..45..
mora pritamji! the rag dvesh doi, bandh karman ra jano. kalah abhyakhyan paishunya chadi, paraprivad pachchakkhano..ra0..46..
mora pritamji! rati arati im jano, mayamoso nahin bhalo. pap atharai trividh bosraun, mithya darashan salo..ra0..47..
mora pritamji! maran tano bhay n ano, Dharm sacho kari jano. parabhav men te sath chalsi, ganthe bandhyo nano..ra0..48..
mora pritamji! the moh thaki man valo, moh men jiv mati ghalo. karo aloyna karaj sarai jyun, mat rakho koi salo..ra0..49..
mora pritamji! dash drishtante, manushya jamaro dohelo. in bhav men jo punya kare to, bharabhav sukh sohelo..ra0..50..
mora pritamji! jnane vicharo, supna ri maya jano. dabh ani jal bindu jim jano, man men samta ano..ra0..51..
mora pritamji! the dosh karman ro jano, bija ne dosh n dijai. rin bair to koi n chhode, bandhya te bhugtijai..ra0..52..
mora pritamji! kin ra mat pita, kun kutumba kun bhai. ghar ri to sahib nahin stri, svarath sarab sagai..ra0..53..
mora pritamji! nahin kaya apani, sachi Dharm sagai. shatru mitra ne sarikha jano, avasar javai thai..ra0..54..
mora pritamji! thar saradhna shuddha chhai, chauvihar anashan diyo. marno sahu ne ek dihadai, sentho rakhajyo hiyo..ra0..55..
jugbahu to santharo saradhyo, sahaj diyo chhai rani. kale mase kal kari ne, jay upano vimani..ra0..56..
menarahya chhati kathi karne, karaj dhani non kiyo. pura mitra te par utarai, dhan jivit jin ro jiyo..ra0..57..
moh vashe hoy kam bigadai, maran biriyan narak men ghalai. saga nahin te pura bairi, suns leta ne palai..ra0..58..
mitra huvai te maran sudharai, karai par upakaro. de saradhna suns karavai, te virla sansaro..ra0..59..
dhanya chhai sansar men menarahya rani, moh dhani non nivaryo. ap tano bhartar jani ne, tin upadesh dei ne taryo..ra0..60..
menarahya man manhi janyo, pakdelo mone rayo. vesh badalne pari nikli, dasi nam dharayo..ra0..61..
dera manh sun to barai nikli, gai ujad re manyo. puri apada koi nahin sathe, rani re kunvar jayo..ra0..62..
jin jayan deshotan hunta, vatta raj badhai. vishay viyog men kunvar jayo, joijyo karam kamai..ra0..63..
champo pachhailo rani darpai, rakhe avelo koi laro. im jani ne kunvar unchayo, hui karma rai saro..ra0..64..
komal kaya ne karan padiyo, panv pade nahin thayo. kumar to rani nibhto n janyo, balak mel van manyo..ra0..65..
chir bichhai upar suvadyo, bal bichhoho janyo. hotab tharo jo hosi re jaya, menarahya du:kh anyo..ra0..66..
kunvar mel rani agi chali, anna bina suni kaya. kathai suvavad kun Mangal gavai, karma chahan dikhaya..ra0..67..
ghana das ne dasi huta, rajkunvar ni dhayo. dodhi padda mahe rahti, rani ekali jayo..ra0..68..
jatan jatan age nadi ai, pani pen vastra pakhala. snan kari ne tiraj baithi, uthi du:kh ri jhala..ra0..66..
kaun viyog padyo mo manhai, kise thikanai ai. rohi men bhamti ekaldi, rovai chhai villai..ra0..70..
kin ghar janmi kin ghar ai, raja ri rani kahvai. sahib mharo muvo meli, hun rohi men ai..ra0..71..
kunvar vichhoho mat pita ro, jugavallabh laghu bhai. jugaballabh ne mahlan melyo, valak chhai van mahi..ra0..72..
mahal jharokha shobha jali ri, rajviyan rusnai. riddhi sahivi ubhi meli, hun tir nadi ran manhi..ra0..73..
visham ujad ay baithi non, sukh nahin til rati. menarahya to du:kh karti baithi, sankat padyo chhai sati..ra0..74..
jhurai dhani ne karai vilap, du:kh bhar chhati pharai. menarahya non du:kh Prabhu janai, baithi chhai tat matai..ra0..75..
sanyog rupni rohi huti, vijoge tin bali. nath vihuni du:khani karti, ani ran men rali..ra0..76..
dekho sagai in sansar men, bichhadtan nahin varo. im jani ne satguru sevo, laho lejyo laro..ra0..77..
tin avasar men devta im janyo, du:kh karai chhai rani. vaikriy rup kiyo hathi ro, ramat mandi pani..ra0..78..
du:kh visaran vilambaj kiyo, sund sun uchhalai pani. du:kh chhodi ne hathi ditho, ramat dekhe rani..ra0..76..
jim jim ramat dekhai rani, acharaj ramat bhari Dharm ankuro punya sanjoge, avai chhai nar nari..ra0..80..
devta chhai koi par upakari, rani ne sund sun jhelai. jitre neda ay nikliya, le kar viman men melai..ra0..81..
vidyadhar to raji huvo, rup ghano in nari. turanta viman men le pachho valiyo, sukh vilsan sansari..ra0..82..
menarahya to man men janyo, turat balyo chhai pachho. kun jane kun desh le javai, o to nahin disai chhai achho..ra0..83..
vidyadhar ne menarahma puchhai jata kin dish bhai. ave to the pachha valiya, kai dil men ai..ra0..84..
bhagavanta n to darashan jatan, to sarikhi mili nari. im jani ne pachho valiyo, sukh vilsan sansari..ra0..85..
menarahya mithe vachne dakhvai, bhagavanta darashan jatan. marag men dhane hunj mili chhun, napho ghano darashan kartan..ra0..86..
Tirthankar non darashan kartan, prasanna hosi thari kaya. vidyadhar to pachho valiyo, menarahya re man bhaya..ra0..87..
samavasaran sun neda aya, viman sun utariya. kar vandana ne sunai vyakhyan, karaj sagla sariya..ra0..88..
jugbahu to devta huvo, uthyo chhai umang ani. sevak to kar jod harapat hai, jay jaykar mukh bani..ra0..89..
in thame Swami ay upana, huva hamara natho. kun Guru nin seva kini, dan diyo chhai hatho..ra0..90..
jnan kari ne devta ditho, purav bhav non vicharo. jugbahu to mharo namaj hunto, menarahya mhari naro..ra0..91..
menarahya re karan mone, manarath bhai marachyo. de sharnan ne suns karayo, menarahya mone tartho..ra0..92..
upagari non gun jani ne, devta darashan jayo. dekhun menarahya kun thikanai, vaithi samosaran manyo..ra0..93..
paragat rup kino chhai devta, Prabhu ne pradakshina didhi. sadhu Sadhvi ne vandana karne, menarahya ne vandana kidhi..ra0..94..
paranda dekhne hasva lagi, Dev disai chhai gelo. stri ne to vandana kidhi, jin ro Prabhu uttar delo..ra0..95..
jugbahu inaro namaj hunto, menanrahya inari naro. Dharm tano in ne sajhaj dino, huvo sur avataro..ra0..96..
menarahya re karan in ne, manarath bhai masyo. de sharna nain suns karayo, in ne menarahya taryo..ra0..97..
menarahya to man men janyo, dhani disai chhai mharo. in avasar men sanyam avai, pichhe vidyadhar non nahin saro..ra0..98..
bhari parashda men menarahya uthi, bole chhai kar jodi. ajna do to Swami sanyam leu, talun bhav tani khodi..ra0..99..
Dev kahai thanne ajna mhari, lyo the sanyam bhari. jugbahu to urin huvo, menarahya ne tari..ra0..100..
mone to vidyadhar layo, paravash bat prakashi. kathai vidyadhar kahyo devta, gayo vidyadhar nhasi..ra0..101..
menarahya to sanyam lidho, jnan bhanai guruni pase. vinay kari ne ajna palai, sumti gupti prakashe..ra0..102..
devta to man men harashaj pamyo, pujya prabhuji nan payo. sadhu Sadhvi sarva vandi ne, ayo jin dish jayo..ra0..103..
devta to apanai thame pahunto, menarahya sanjam palai. balak to marag men melyo, apara punya rukhvalai..ra0..104..
na to koi hinsak nedo ayo, nahin koi pakshi khayo. dekho punyai ke prabhav thi, sukrit kini sahayo..ra0..105..
mithla nagri non padamarath raja, chadhiyo shikaraj soi. pap karanta padai padhro, purab sukrit hoi..ra0..106..
kar asavari raja ran men phirta, jovai jiv sab koi. ran manhi to balak suto, ditho raja soi..ra0..107..
balak nedo raja ayo, rup dekhne acharaj payo. balak koi punyavant disai, raja re man bhayo..ra0..108..
mhara raj men putra nahin chhai, mharai sahje ayo. to in balak ne uro leun, sompun rani ne jayo..ra0..109..
kunvar lei ne raja pachho valiyo, ayo raj duvaro. pushpamala rani ray tedavai, putra diyo chhai kartaro..ra0..110..
nav mas to bhara marai chhai, devta pitar manayo. apanai purav punya kari ne, kunvar sahaj men ayo..ra0..111..
apana raj men putra nahin chhai, karo inari pratipalo. raj layak o kunvaraj disai, hosi raj rukhvalo..ra0..112..
bhar bholavan dei rani ne, kunvar kholai ghalyo. punyavanta raj men ayan pichhe, bhomiya nami ne chalyo..ra0..113..
bhomiya mharai anami hunta, kunvar raj men ayo. bhomiya mharai sarva chakar huva, nami nam darshayo..ra0..114..
nami kunvar padamarath raja, din din badhto hoi. mat pita bandhav bichhoho, te sunajyo sahu koi..ra0..115..
jugbahu ne manarath masyo, vishya ras re chayo. pachha valtan ne sampaj khadho, gayo narki manyo..ra0..116..
donun raja ro maran huvo, khabar hui nagri mani. menarahya to nikal nhathi, tin ri khabar n kani..ra0..117..
sansar non to karaj kiyo, raj jugaballabh ne diyo.. kin ne dosh n dije prani, karam apara kiyo..ra0..118..
jugaballabh to raj karai chhai, vartai chhai chautho aro. bap tani man men thodi avai, pin te dukh varte mata ro..ra0..119..
nami kumar to moto huvo, virah padyo raja ro. nami kumar ne raj baisadyo, sukh vilse sansaro..ra0..120..
jugbahu to devta huvo, menarahya sanyam palai. jugaballabh ne nami bhai, donun raj rukhvalai..ra0..121..
ath karam chhai maha joravar, jivan ne phoda padai. chyaran ne to nyara kina, karatab khel dikhadai..ra0..122..
donun raja raj bhogavnta, atavi padi hai simadai. bhumi apani rakhan saru, karai rajvi radai..ra0..123..
jugaballabh to man men janyo, ay lad disai katha ro. dekhone mhari dharti lesi, rajviyan ahankaro..ra0..124..
jugaballabh to phaujan le chadhiyo, kankad sime javai. nami raja man men kop kari ne, man men magaj n mavai..ra0..125..
namiray to kari sajai, bole dai banki bani. maram moso volai mata ro, chadhiyo chhai im jani..ra0..126..
tin avasar men menarahyaji, man men isadi ani. angajat chhai donun mhara, nahin hate punya prani..ra0..127..
ghana jiv ri ghataj hosi, marsi ghana ajani. yasun banai jo upagar kijai, menarahya man ani..ra0..128..
kar vandna guruni ne puchhe, ap kaho to hun jaun. donun raja rai rad mandi chhai, hun jai ne samjhaun..ra0..129..
manho manhi to koi n hatsi, angajat chhai mhara. ghana jiv nin ghataj hosi, parinam ek daya..ra..130..
dekho punyai rajviyan ri, gurni to pin nahin barje. vastu ap ri senthi rakhne, pichhe paropkar karjai..ra0..131..
kar vandana ne menarahya chali, le satiya no satho. jugaballabh sun to sendh pichhan, paheli un sun bato..ra0..132..
kankad sima thaur thikanai, phauja padi chhai doi. jugaballabh no lashakar puchhi, chali menarahya soi..ra0..133..
menarahya sati charam shariri, ap tirai par tari. raj kachedi sun nedi ai, nijar padi raja ri..ra0..134..
jugaballabh to uthyo satab sun, vinay karyo chhai bhari. sat ath pag samo jai ne, mahastiyan kem padhari..ra0..135..
menarahya to kahai raja ne, karan padiyo tosyusyun bhari. phauj bandhi to the bheli kini, men tin sun karan vichari..ra0..136..
ay lad mhari dharti lesi, nich chandal ghar jayo. sath saman in bhelo kino, tin karan chadhi ayo..ra0..137..
beta chho the rajviyan ra, bolo bol vicharo. aur than upar kin chadh asi, yo bhai chhai dharo..ra0..138..
bat suni ne raja lajyo, nicho mukh kari jovai. bhari vachan kahyo mata ne, raja ne nahin sovai..ra0..139..
jugavallabh to kahai mata ne, the lidho sanyam bharon. maut apada kinvidh hui, bat kaho vistaron..ra0..140..
manarath raja thanra pita ne maryo, hun rat ne nikli ai. janam nami ro ban men huvo, hun mel ai ban men bhai..ra0..141..
tir nadi ne baithi hunti, viman vidyadhar non ayo. Dev unchay ne mone mahe meli, hun gai samosaran manyo..ra0..142..
pita to thanro devta huvo, darashan Prabhu ke ayo. ajna mangi ne main to sanyam lidho, bhetya Prabhu ra payo..ra0..143..
donun raja re main bairaj suniyo, ladsi manho mai. ghana adami maran pamsi, tin karan hun ai..ra0..144..
jugaballabh raja bat suni ne, chinta phikar man ai. jugaballabh to kahe mata ne, jay milun hun bhai..ra0..145..
thik nahin chhai namiray ne, yo chhai mharo bhai. nahin vishvas rajviyan kero, tin sun milun hun paheli jai..ra0..146..
jugavallabh ne to diyo samjhai, namiray kanai jay. satiyan najar padi raja ri, vinay kari samo aya..ra0..147..
hath jodi ne raja volyo, mahastiyan kim ai. ka sun karan padiyo thare, isadai avasar mani..ra0..148..
kani karan tharai donun raja re, jhagdo padiyo manho mai. phauj bandhi to the bheli kini, tin karan hun ai..ra0..149..
bap maryo ne man nikal bhagi, gai e kin re lare. dekho ne e mhari dharti lesi, kahi sanmukh mata re..ra0..150..
beta the chho rajviyan ra, bolo bol vicharo aur than upar kun chadh asi, bhai chhai o tharo..ra0..151..
jugaballabh ne moto melyo, khabar padi anusare. nano balak nami ne jani, bat kahi vistare..ra0..152..
bat suni ne raja lajyo, nicho mukh kari jovai. bhari vachan kahyo mata ne, raja ne nahin sovai..ra0..153..
nami raja to man mahi janyo, jugaballabh raja mharo bhai. neh saneh dhari donun beta ro, tin sun maji ai..ra0..154..
nami raja to milan chalyo, jugaballabh samo jai. harash bhav sun banh pasari, miliya donun bhai..ra0..155..
ekan hathi re hodai baitha, jugaballabh nami bhai. jugaballabh ra dera kani, hui ab harash savai..ra0..156..
lok ladai ri bata karta, ladta hoda hodi. lokan man men acharaj pamya, kani kiyo in modi..ra0..157..
vair mitay ne mel karayo, ghana lok huva raji. ghana janan ra matha padta, rakhya chhai in maji..ra0..158..
lok raja re kushalaj huvo, ghar ghar harash badhai. bhalo hojyo in sati kero, yash lidho jag mai..ra0..159..
raj kachedi men ai baitha, jugaballabh nami bhai. jugaballabh sukh athir jani ne, vairag ri man men ai..ra0..160..
jugavallabh kahe mone diksha len dyo, raj karo mah rayo. raj riddhi ne sarva sampda, men thane bholayo..ra0..161..
jugavallabh to diksha lidhi, harap ghano man mai. bhai vichhoho du:kh ri lahran, nami kumar nain ai..ra0..162..
nami raja to raj karai chhai, rani ek sau atho. huvai natak ne ghure nagara, donun raj ro pato..ra0..163..
dagh jvar ne jog kari ne, lesi sanyam bharo. Indra pariksha karva asi, uttaradhyayan vistaro..ra0..164..
donun bhayan re mel karayo, menarahya pachhi ai. guruniji re pay lagne, vidh sun bat sunai..ra0..165..
mota raja rai mel karayo, rakhi ghanan ri baji. menarahya na gun jani ne, gurni hui chhai raji..ra0..166..
chhattis hajar arajyan manhai, guruni chandanvala. tin re pate padvi pai, shishyani ratna ri mala..ra0..167..
cheda ni je sate putri, bhagavanta ap bakhani. chelna, mrigavti tiji prabhavti, chauthi shivade rani..ra0..168..
panchvin padmavti chhathi sulsa, jyeshtha satmi jani. sankat padyan sati shilaj rakhyo, damayanti nal rani..ra0..169..
anjana sati chhai mahinda raja nin beti, bikho sahyo ban manhi. sankat padyan sati shilaj rakhyo, yash kirat jag manhi..ra0..170..
sati draupdi to agai hui, yash lidho jag mani. mota raja ro virodh mitayo, menarahya ri adhikai..ra0..171..
sanyam lene sukrit kijyo, manushya jamaro mat khojyo. Jin shasan men jim menarahma kini, tim sab koi kijyo. ra0..172..
mannarahya to diksha lei, man shuddha sanyam palai. Jin marag men nam dipayo, bhav dughan sahu talai..ra0..173..
menarahya to kultarak hui, lajja ap ri rakhi. bikho sahyo pin shil n bhanjyo, bhagavanta tehnan sakhi..ra0..174..
jugbahu ne menarahya sati, jugaballabh nami bhai. chyaran ro to karaj sidho, manarath durgati manhi..ra0..175..
vyasan satmo parnari non, jiv ghat ghar hani. manarath raja narak pahunto, kuyash bandhne prani..ra0..176..
ek kuvyasan manarath sevyo, bahu ruliyo sansaro. satun kuvyasan je sevai prani, tin ne du:kh aparo..ra0..177..
vishya ras te vish sam jani ne, satguru seva kijai. manarath raja nin bat suni ne, parnari sang n kijai..ra0..178..
dan shil tap sanyam palo, doshan sagla talo. daya Dharm ri samta ani, shuddha achar te palo..ra0..176..
Dharm daya men kevli bhashyo, te sacho kar jano. je jani sevai bhav prani, te pamai nirvano..ra0..180..
jap tap sanyam palo re bhai, vishay vikar gamai. jiv jike to shiv sukh pavai, shrivir vachan man lai..ra0..181..