ढाल : १
Dhal : 1
630
ढाल : १ — Lyrics
ढाल : १
ए वचन सुणी न दासी इम भणै, करती ज्ञान विलास। सहु परिवार कहयो जिन कारमो, तूं क्यूं थयो रे उदास। सांभल रे योगी! ते योग री युक्ति रीत जाणी नहीं।।1।।
सुरपति नरपाते सर्व अथिर छै, श्वास रो किसो विश्वास। तूं क्यूं हुवो रे योगी गळगळो, थारै नहीं आयो ज्ञान प्रकाश।।२।।
ऊंच नें नीच रंक राजा सहु, अविचमरण अपेक्षाय। क्षण क्षण मरै छै श्री जिन भाखियो, तूं सोच देख मन मांय।।३।।
निज आत्मज्ञान स्वभावे थिर कह्या, ते किण स्यूं लूंट्या नहीं जाय। थारों रे म्हांरो माया जाल छै, मूरख रह्या मुरझाय।।४।।
जे नर आत्म स्वभाव नहीं ओलख्यो, पुद्गल तें जाणे निज स्वभाव। मोहजाल में खूता मानवी, ते किम पामै तिरण रो डाव।।५।।
तूं अन्तर रोगी योगी कहण रो, निज आत्म स्वभाव रो अजाण। कुमर रो मरण देख दुमणो थयो, थांरै मोटो रोग पिछाण।।६।।
जे जीवन में हर्ष प्रमोद होवै घणो, मरण में होवै दिलगीर। राग द्वेष में खूता मानवी, ते किम पामै भव जल तीर।।७।।
असंयती जीव रो बंछै जीवणो, ते प्रत्यक्ष राग पहिचाण। राग छै ते तो दशमो पाप छै, राग नें दया कहै ते अजाण।।८।।
मरणो बंछै ते तो द्वेष छै, ते ओलखणो सोरो जग मांय। राग ओलखणी दोरी तेह थी, श्री वीतराग कहै वाय।।९।।
जे राग नें द्वेष तणै वश मानवी, ज्यारे हर्ष शोक रह्यो व्याप। ते भ्रमण करसी चिहुंगत संसार में, सहसी नरक निगोद सन्ताप।।१०।।
(लय : महलां में बैठी हो राणी कमलावती)
ए फल मोह कर्म नां जिन कहया, ते टालै राग द्वेष नीं ताप। निज आतम ज्ञान स्वभावे रम रहया, सम भावे चित्त थाप।।११।।
जीव अनन्ता नित्य ही मर रहया, मच्छ गळागळ पेख। तूं सोच करसी रे किण किण जीव रो, तिण स्यूस्यूं समभाव रहणो विशेष। १२।।
योगी तो सुण नें रह्यो जोवतो, इणरे तो मूल न दाह। अद्भुत रचना देखी एहनीं, मन दृढ़ बोले अथाह।।१३।।
Roman Transliteration
dhal : 1
e vachan suni n dasi im bhanai, karti jnan vilas. sahu parivar kahyo Jin karmo, tun kyun thayo re udas. sambhal re yogi! te yog ri yukti rit jani nahin..1..
surapti narpate sarva athir chhai, shvas ro kiso vishvas. tun kyun huvo re yogi galaglo, tharai nahin ayo jnan prakasha..2..
unch nen nich rank raja sahu, avichamaran apekshay. kshan kshan marai chhai shri Jin bhakhiyo, tun soch dekh man manya..3..
nij atmajnan svabhave thir kahya, te kin syun luntya nahin jay. tharon re mhanro maya jal chhai, murakh rahya murjhaya..4..
je nar atma svabhav nahin olakhyo, pudgal ten jane nij svabhav. mohjal men khuta manvi, te kim pamai tiran ro dava..5..
tun antar rogi yogi kahan ro, nij atma svabhav ro ajan. kumar ro maran dekh dumno thayo, thanrai moto rog pichhana..6..
je jivan men harsha pramod hovai ghano, maran men hovai dilgir. rag dvesh men khuta manvi, te kim pamai bhav jal tira..7..
asanyti jiv ro banchhai jivno, te pratyaksha rag pahichan. rag chhai te to dashmo pap chhai, rag nen daya kahai te ajana..8..
marno banchhai te to dvesh chhai, te olakhno soro jag many. rag olakhni dori teh thi, shri vitrag kahai vaya..9..
je rag nen dvesh tanai vash manvi, jyare harsha shok rahyo vyap. te bhraman karsi chihungat sansar men, sahsi narak nigod santapa..10..
(lay : mahlan men baithi ho rani kamlavati)
e phal moh Karm nan Jin kahya, te talai rag dvesh nin tap. nij atam jnan svabhave ram rahya, sam bhave chitta thapa..11..
jiv ananta nitya hi mar rahya, machchha galagal pekh. tun soch karsi re kin kin jiv ro, tin syusyun sambhav rahno vishesh. 12..
yogi to sun nen rahyo jovto, inare to mul n dah. adbhut rachna dekhi ehanin, man dridh bole athaha..13..